Trahičnaja dylema Izrailu ŭ Hazie

Heta moža praciahnucca tydni ci miesiacy, kažuć jany, ale moža spracavać. Ale, kali heta navat i tak, usio adno zastajucca pytańni: koštam kolkich ludziakich žyćciaŭ?

U niadzielu izrailskaja bronietechnika i vojski ŭvajšli ŭ Hazu ŭ ramkach čarhovaha etapu ŭpartaj sproby Izraila spynić rakietny abstreł, ale nad usioj hetaj aperacyjaj łunaje nastupnaje pytańnie: ci sapraŭdy mahčyma spynić rakiety na choć niejki peryjad času, pakul «Chamas» zastajecca pry ŭładzie ŭ sektary Haza?

I kali adkaz na hetaje pytańnie budzie admoŭnym, dyk tady treba mierkavać, što sapraŭdnaj metaj aperacyi źjaŭlajecca poŭnaje ŭstaranieńnie lubym koštam «Chamasu»?

Paśla svajho čaćviarhovaha vizytu ŭ Paryž, kab patłumačyć francuskamu kiraŭnictvu, čamu jana miarkuje, što zaraz nia čas dla terminovaha spynieńnia ahniu, ministarka zamiežnych spraŭ Izraila Cypi Liŭni zaznačyła: «Niama sumnievaŭ, što pakul «Chamas» kantraluje Hazu, heta ŭjaŭlaje saboj prablemu dla Izraila, prablemu dla palestyncaŭ i prablemu dla ŭsiaho rehijonu».

Zastupnik premjer-ministra Izraila Chaim Ramon u svaim interviju izrailskamu TB u piatnicu viečaram pajšoŭ navat jašče dalej, abvieściŭšy, što Izrail nie pavinien spyniać aperacyi, pakul «Chamas» kiruje Hazaj.

«Na maju dumku, my pavinny dasiahnuć sytuacyi, u ramkach jakoj my nie dazvolim «Chamasu» kiravać», — zajaviŭ Ramon na Pieršym kanale. «Heta – samaje važnaje»

Ani premjer-ministar Ehud Ołmert, ani ministar abarony Ehud Barak padobnych zajavaŭ nie rabili. Tym nia mienš, siarod izrailskaha kiraŭnictva isnuje ŭsio bolš pašyranaje supolnaje mierkavańnie, što luboje adstupleńnie pierad «Chamasam» stvoryć prablemu dla šyrokamaštabnych metaŭ Izraila ŭ doŭhaterminovaj perspektyvie, bo moža ŭmacavać hetuju arhanizacyju i nadać joj lehitymnaść.

«Kali vajna, jak i čakajecca, skončycca adstupleńniem, a Izrail ustrymajecca ad paŭtornaj akupacyi Hazy, dyk «Chamas» damožacca dyplamatyčnaha pryznańnia», — napisaŭ u piatničnym numary hazety «Haarec» palityčny analityk Ałuf Ben. «Niavažna, jak vy heta nazaviecie», dadaje jon, «Chamas atrymaje lehitymnaść».

Da taho ž, luboje patencyjnaje mirnaje pahadnieńnie, mabyć, budzie ŭklučać u siabie pavieličeńnie kamercyjnych znosinaŭ Hazy ź Izrailem i Ehiptam, jakoje źjaŭlajecca adnym z asnoŭnych patrabavańniaŭ «Chamasu»: pakončyć z ekanamičnym bajkotam i zakryćciom miežaŭ, ź jakim sutyknułasia Haza. Raźvivać ekanomiku Hazy pad uładaj «Chamasu», ćvierdziać izralskija kiraŭniki, aznačała b raźvivać «Chamas». U toj samy čas spynieńnie kamercyjnych znosinaŭ aznačaje, što 1,5 miljony hazaŭcaŭ zastanucca ŭ adčajnym stanoviščy.

U arhumentach Bena prychavanaje mierkavańnie, što adzinym šlacham nie dapuścić atrymańnia «Chamasam» lehalnaści, budzie paŭtornaja poŭnaja akupacyja Izrailem Hazy ciapier, bolš čym praz try hady paśla vyvadu adtul izrailskich vojskaŭ i vydaleńnia niezakonnych habrejskich pasialencaŭ. Heta perspektyva, za jakuju praktyčna nichto ŭ Izraili ci za miažoj nie vystupaje.

Bolš za toje, chacia rytoryka pra ŭstaranieńnie «Chamasu» ad ułady moža i zdavacca rašučaj, ale vidać nivodzin čałaviek, abaznany u hazaŭskaj i palestynskaj palitycy, nie paličyć heta realistyčnym. Deputaty ad «Chamasu» vyjhrali demakratyčnuju bolšaść na vybaroch čatyry hady tamu, a ŭ rasparadžeńni arhanizacyi znachodzicca ad 15 000 da 20 000 bajazdolnych čalcoŭ. Jana ŭmacavała svaju ŭłada za apošnija 18 miesiacaŭ, što minuli paśla vyciaśnieńnia z Hazy svaich supiernikaŭ, lajalnych da bolš prazachodniaj i ŭmierkavanaj partyi «Fatach» prezydenta Machmuda Abasa, jaki zasiadaje ŭ Ramale, na Zachodnim bierazie.

I chacia jość niamała hazaŭcaŭ, jakija schilnyja addavać pieravahu «Fatachu», jany naŭrad ci dastatkova arhanizavanyja ci mocnyja, kab stać novymi kiraŭnikami Hazy, navat pry dapamozie byłych kalehaŭ, što znachodziacca ŭ vyhnańni ŭ Ramale i, darečy, zajaŭlajuć, što jany ni ŭ jakim razie nia zhodnyja viarnucca ŭ Hazu na izrailskich tankoch. Faktyčna, čym bolš Izrail dziaŭbie Hazu, tym słabiejšym stanie, vierahodna, «Fatach», bo jaho palestyncy buduć razhladać jak kalabaranta.

Bolš vierajemnym vynikam razbureńnia infrastruktury «Chamasu», u takim razie, budzie chaos, zdań jakoha pałochaje nia tolki žycharoŭ Hazy, ale i ŭsich, chto spadziajecca na mir u Paŭdniovym Izraili.

Adnak dahetul u svajoj kampanii, jakaja zabrała žyćci dziasiatkaŭ dziaciej i inšych minakoŭ, Izrail nie škadavaŭ atrybuty suverenitetu «Chamasa» i nie abmiežavaŭsia vajennymi celami. Izrailcy kažuć, što razburanyja imi miačety byli składami zbroi, a ŭ šmatkroć abstrelvanym Isłamskim universytecie byli majsterni pa vyrabie vybuchoŭki. Ale izrailskija vojski zrujnavali taksama mnohija ŭradavyja budynki, navat i nie sprabujučy zajavić ab ich vajennym pryznačeńni .

«Uradavyja budynki źjaŭlajucca miescam, u jakim finansavyja, lahistyčnyja i čałaviečyja resursy słužać padtrymcy teroru», - zajaviŭ presavy sakratar izrailskaha vojska Bendžamin Ratłend. «Značnaja častka ŭradavych strukturaŭ uciahnutaja ŭ aktyŭnuju padtrymku i planavańnie teroru».

Zvažajučy na ŭsio heta, možna mierkavać, što navat kali Izrail namierany ŭstrymacca ad poŭnaha zrynańnia «Chamasu», jaho vybar taktyki ŭ svaich atakach moža tak ci inakš da hetaha pryvieści. I izrailcy ŭžo, mahčyma, sutykajucca z dylemaj u svaich dziejańniach: urešcie, kali dastatkova šmat infrastruktury «Chamasu» budzie razburana, zadača kiravańnia Hazaj – hustanasielenym rajonam z mnostvam uciekačoŭ, čyja słabaja ekanomika zrujnavanaja ŭviedzienym z boku Izraila bajkotam, budzie nievierahodna ciažkoj da vyrašeńnia.

Usio heta adbyvajecca taksama na tle šyrokaj mižnarodnaj krytyki vajny ŭ Hazie, spryčynienaj nia tolki nievymoŭnymi pakutami, vidočnymi z teleekranaŭ, ale i mierkavańniem, što Izrail užo vykarystoŭvaŭ takuju taktyku ŭ minułym i nikoli nie dasiahaŭ pośpiechu.

U pryvatnaści, mnohija zhadvajuć pra vajnu 2006 hodu ź libanskim «Chezbałaham», kali Izrail taksama sprabavaŭ źniščyć rakietnyja ŭstanoŭki i infrastrukturu varožaj jamu arhanizacyi, ale ŭsio skončyłasia zabojstvam mnostva cyvilnych žycharoŭ, a «Chezbałah» staŭ jašče bolš papularnym i, mahčyma, urešcie navat macniejšym, čym pierad toj vajnoj.

Adnak vajskovyja planiroŭščyki adkazvajuć na heta, što paralel niedakładnaja, i jany taksama vučacca na minułym dośviedzie. Maŭlaŭ, Haza mienšaja i bolš roŭnaja pa reljefie, čym Paŭdniovy Liban, dyj, što samaje istotnaje, u jaje niama napaŭadčynienaj miažy z krainaj nakštałt Syryi, adkul było b mahčyma papaŭniać zapasy zbroi. Razbureńnie ž kantrabandysckich tunelaŭ pamiž Hazaj i ehipieckaj Synajskaj paŭvyspaj i systematyčnaje źniščeńnie schovanak zbroi dy puskavych placovak, razam z dapamožnaj infrastrukturaj, u kančatkovym vyniku pryviadzie da pośpiechu, ćvierdziać jany.

Heta moža praciahnucca tydni ci miesiacy, kažuć jany, ale moža spracavać. Ale, kali heta navat i tak, usio adno zastajucca pytańni: koštam kolkich ludziakich žyćciaŭ? I chto budzie kiravać, kali ŭsio heta skončycca?

• 0
• 0
• 0
• 0
• 0
• 0
• 0
• 0