Vyjšaŭ pieršy studyjny albom Viktara Šałkieviča za 15 hadoŭ AŬDYJA

Hetaj padziei prychilniki haradzienskaha muzyki čakali 15 hadoŭ. Šałkievič zapisaŭ studyjny albom novych piesień dy jašče ŭ poŭnym huku. Reliz vyjšaŭ padvojenym z 14 hitami vykanaŭcy ŭ dadatak. Internet-premjera na TuzinFM!

Pra svoj namier naviedać studyju, kab zapisać albom Viktar Šałkievič abvieściŭ jašče piać hadoŭ tamu. Ale dalej za prezentacyju kancertnych versijaŭ novych piesień sprava za hety čas tak i nie dachodziła. Papiarednija dva albomy haradzienskaha barda «Ščaślivaja siamiorka» (2010) i «Haradzieniec pryziamliŭsia ŭ Miensku» (2006) taksama ŭjaŭlali ź siabie kancertnyja zapisy. I voś narešcie na 60-hodździe muzyki pabačyŭ śviet padvojenny CD «Takaja doŭhaja zima» z novymi zapisami i daŭnimi hitami. Usiaho ŭ reliz uvajšło 33 treki — 9 ź ich zusim novyja, jakija zapisvalisia ŭ studyi klaštaru ŭ Baranavičach. Da kožnaha ź ich muzyka zapisaŭ jašče pradmovu. A ŭ druhi dysk uvajšło 14 abranych hitoŭ Šałkieviča, jakija ŭ svoj čas byli zapisanyja i źviedzienyja ŭ studyi «Radyjo Biełastok». Admysłova da prezentacyi na TuzinFM aŭtar albomu padrychtavaŭ pradmovu.

Viktar Šałkievič na kancercie da ŭłasnaha 60-hodździa, Miensk, 2019 hod, fota Leanida Drazdova

Chiba hady z paŭtary tamu da mianie padyšoŭ viadomy haradzienski žurnalist, hramadzki dziejač i prosta charošy čałaviek, Pavał Mažejka, dyrektar Centra haradzkoha žyćcia ŭ Harodni, i zaprapanavaŭ mnie da majho 60-hadovaha jubileju vydać albom…

Albom zapisvać vielmi ciažka. Arhanizacyjnych pytańniaŭ bolš, čym tvorčych adkazaŭ — ź kim, kali, dzie, za jakija hrošy, što, chto budzie rabić vokładku, dzie drukavać dyski, ci dobra syhraje toj ci hety? Ale hrošy znajšlisia, i jakraz na dzieviać piesień…

Z vopytu pracy nad papiarednimi albomami viedaješ adno — važna ŭsich paźbirać, sustreć, napaić, nakarmić, prymusić zajhrać toje, što ty chočaš, z druhoha ci treciaha dublu, addać hanarar, pasadzić na bližejšy ciahnik ci ŭ aŭtobus i adpravić dachaty.

Toje, što ty tam naśpiavaješ — heta na apošnim miescy … Hałoŭnaje — kalektyŭ…

Jość u fajnym horadzie Baranavičy pry klaštary ajcoŭ verbistaŭ studyja hukazapisu, stvareńnie jakoj dabrasłaviŭ sam kardynał Kazimir Śviontak, a paradku tam pilnuje Viečasłaŭ Bankievič, Słava, vielmi čujny muzyka i vydatny hukarežyser. Ź im my zhavarylisia, što budziem pracavać, i Słava ŭziaŭ na siabie adkaznaść za muzyčny bok, tym bolš što ŭ jaho mieŭsia ceły śpis charošych studyjnych baranavickich muzykantaŭ, siabroŭ i znajomych.

Voś my i zapisali dzieviać tvoraŭ, i atrymaŭsia albom. Albom padvojny — aprača novych piesień, na druhim dysku sabranyja čatyrnaccać najlepšych starych baladaŭ…

Kancepcyja jahonaja ŭ im ža i vykładziena — pierad kožnaju pieśniaju ja raspaviadaju, čamu jana i našto jana.

Pryjemnaha prasłuchoŭvańnia!

• 0
• 0
• 0
• 0
• 0
• 0
• 0
• 0