Biełaruskaje MZS pra situacyju z pareštkami Kalinoŭskaha: Našy ekśpierty jeździli ŭ Vilniu, abmiarkoŭvajem i movu nadpisaŭ na mahiłach
Dniami stała viadoma, jak rasijskija sałdaty pachavali Kastusia Kalinoŭskaha — ruki źviazanyja za śpinaj, cieła zasypanaje vapnaj.
![](http://nnexpictures.fra1.digitaloceanspaces.com/img/w732d4webp1/photos/z_2019_03/f87c5137-c6ef-45f6-95f4-e6878fc1f201_w1023_r0_s-gihsh.jpg.webp)
Daśledavańniem pareštkaŭ zajmajucca litoŭskija navukoŭcy.
Jak zajaviŭ «Radyjo Svaboda» doktar humanitarnych navuk, były dyrektar Instytutu historyi Litvy Alvidas Nikžantajcis, pakul litoŭski i polski bok damaŭlajucca ab niuansach memaryjalizacyi, aficyjnaja Biełaruś heta paprostu ihnaruje. Kali źjaviłasia infarmacyja, što nadpisy na mahiłach hierojaŭ płanujucca tolki pa-litoŭsku i pa-polsku, biełaruskaja hramadzianskaja supolnaść vykazała niezadavalnieńnie, a ŭłady Biełarusi na heta nie adreahavali.
«Naša Niva» spytała pra vytoki takoj pazicyi ŭ MZS, nam adkazaŭ pres-sakratar Anatol Hłaz. Jon zapeŭnivaje, što takoje śćvierdžańnie nie adpaviadaje rečaisnaści.
«Na moj pohlad, heta pamyłkovaje ŭražańnie. Dla Biełarusi Kastuś Kalinoŭski — značny histaryčny dziejač. U hetym nie moža być sumnievaŭ. Nie treba dzialić, kamu jon bolš naležyć. Heta sumiesnaja spadčyna, jakaja abjadnoŭvaje narody Biełarusi, Polščy i Litvy. Z hetaha punktu hledžańnia my zychodzili i zychodzim. Taki ž padychod znachodzim i ź litoŭskaha boku, jakomu my vielmi ŭdziačny za poŭnuju hatoŭnaść supracoŭničać.
Mabyć, uražańnie skłałasia, tamu što my kancentravali namahańni na kankretnych spravach i nie tak aktyŭna infarmavali ŚMI ab svaich krokach, ale heta nie aznačaje, što ničoha nie robicca.
Nahadaju, što jašče ŭ listapadzie 2018 hoda biełaruskija dziaržaŭnyja ekśpierty aficyjna pryjazdžali ŭ Vilnius, dzie aznajomilisia z daśledavańniami astankaŭ udzielnikaŭ paŭstańnia 1863 hoda, praviali plonnyja sustrečy ź litoŭskimi kalehami, zrabili svaje vysnovy.
Zaraz my abmiarkoŭvajem ź litoŭskim bokam mahčymaści sumiesnaj pracy dla bolš dakładnaj identyfikacyi astankaŭ. U pryvatnaści, havorka idzie pra mahčymaść daśledavańnia astankaŭ starejšaha brata Kastusia Kalinoŭskaha, pachavanaha ŭ Biełarusi.
Litaralna siońnia ŭ MZS adbyłasia sustreča z ambasadaram Litvy, dzie abmiarkoŭvalisia i inšyja praktyčnyja kroki ŭ supracoŭnictvie pa hetaj temie. Siarod ich — nadpisy na biełaruskaj movie na mahiłach pry pierapachavańni.
My vielmi zacikaŭleny ŭ dasiahnieńni histaryčnaj spraviadlivaści adnosna hetaj asoby i hatovy aktyŭna ŭzajemadziejničać i z našymi litoŭskimi, i polskimi partniorami, i ź biełaruskaj supolnaściu», — zajaviŭ Anatol Hłaz.
Pa infarmacyi «Našaj Nivy», havorka idzie pra śpiecyjalistaŭ Kamiteta sudovych ekśpiertyz i antrapołahaŭ.
Čytajcie taksama:
Jak rasijskija sałdaty pachavali Kastusia Kalinoŭskaha: ruki źviazanyja za śpinaj, cieła zasypanaje vapnaj FOTY
«Intares prajaŭlajem». Instytut historyi prakamientavaŭ situacyju vakoł pareštkaŭ paŭstancaŭ Kalinoŭskaha
-
Vyjšaŭ na volu hrodzienski biznesmien, jaki ŭ 2020-m paskardziŭsia na siłavikoŭ
-
Dziaŭčynu ŭ Homieli ledź nie źbili na piešachodnym pierachodzie, ale jana niby i nie zaŭvažyła VIDEA
-
«Hibryd zazdraŭnaha malebnu i zaŭpakojnaj licii». Da 3 lipienia BPC skłała słužbu, supiarečnuju kanonam i zdarovamu sensu
Kamientary