Prosta puška! Jak vychavalnica dziciačaha sadka z-pad Kijeva stała hałoŭnaj zorkaj ukrainskaha repa

Videa chutka stała virusnym, nabraŭšy bolš za paŭtara miljona prahladaŭ i tysiačy ŭchvalnych kamientaroŭ. Z taho času u alyona alyona (tvorčy psieŭdanim 27-hadovaj Aleny Saŭranienka) źjaviłasia jašče piać klipaŭ z ahulnaj kolkaściu prahladaŭ bolš za siem miljonaŭ, a 8 krasavika byŭ prezientavany debiutny albom «Puška» z klipam na zahałoŭny trek. 

Raskazvajem historyju žyćcia i pośpiechu alyona alyona, a taksama prapanujem paznajomicca bližej z hałoŭnaj na siońnia rep-zorkaj Ukrainy.

Pačatak

Pavialičyć

U 12 hadoŭ Alona pačała pisać vieršy i składać pieśni. Šturškom da chip-chopa staŭ pryviezieny baćkam z zamiežnaj kamandziroŭki albom The Eminem Show. Heta pierakuliła śviet dziaŭčyny i, jak akazałasia, vyznačyła jaje los — rep dazvalaŭ raspavieści našmat bolš žyćciovych historyj, čym zvyčajnaja pop-muzyka.

Saŭranienka pačała słuchać chip-chop i stvarać bity na kampjutary. Ź dźviuma siabroŭkami ŭ jaje było niešta kštałtu hurtu, ale ŭ vyniku Alona zastałasia adna i jašče doŭha nie mahła znajści svoj styl.

Pieršy trek byŭ zapisany prykładna 10 hadoŭ tamu pa-ŭkrainsku i nie byŭ uspryniaty siabrami, jakija razmaŭlali pa-rasiejsku i słuchali rasijskuju muzyku. Niekatoryja navat prapanoŭvali kinuć durnoje i «varyć boršč». Jak pryznajecca Alona, joj vielmi chaciełasia padabacca i stvarać vobraz supierrepierki, tamu jana pačała čytać pa-rasiejsku i pa-anhlijsku pra toje, čaho nie było ŭ jaje žyćci: hrošy, traŭku i tusoŭki. Užo tady jana stała viadomaj u vuzkich kołach, ale da papularnaści było daloka.

Paśla Jeŭramajdanu va ŭkraincaŭ pamianiałasia staŭleńnie da rodnaj movy, i z toj pary Saŭranienka piša teksty i čytaje rep vyklučna pa-ŭkrainsku, bo nazapasiłasia šmat słovaŭ, jakija joj chaciełasia skazać. Źmianiŭsia i mesedž — ciapier heta rep pra žyćcio dziaŭčyny, jaje rodnych i siabroŭ, pra toje, što chvaluje maładych ukraincaŭ i što tyja znachodziać takim blizkim u jaje trekach.

Baryšaŭka i dziciačy sadok

Pavialičyć

Razynkaj na torcie łajf-story alyona alyona źjaŭlajecca jaje žyćcio ŭ miastečku Baryšoŭka pad Kijevam, dźvie vyšejšyja adukacyi i praca ŭ dziciačym sadku.

Naohuł, pracavać dziaŭčyna pačała ŭ 15 hadoŭ — handlavała abutkam i torbami na rynku ŭ namiocie kitajca, jakomu jana chłusiła pra svoj uzrost. Taksama prychodziłasia zarablać hrošy kasirkaj, pradavačkaj i navat prybiralščycaj u handlovym centry.

Atrymaŭšy adukacyju psichołaha, Saŭranienka stała sacyjalnym rabotnikam — akazvała psichałahičnuju kansultacyju maładym mamam, ałkaholikam, narkamanam, zekam i inšym. Paśla ŭładkavałasia ŭ dziciačy sadok pracavać pa śpiecyjalnaści, ale ŭ sadku nie było vakansii, tamu dziaŭčyna stała vychavacielkaj.

Miesca psichołaha tak i nie źjaviłasia praź niedachop hrošaj, ale Alona tak palubiła pracu ź dzietkami, što advučyłasia na piedahoha i ŭ vyniku zabaviłasia ŭ sadku ažno na piać hadoŭ. Kinuła svaju pracu vychavalnica ŭžo paśla taho, jak stała viadomaj i praz muzyčnuju karjeru stała brakavać času. 

Raźvitańniu z rodnym horadam i pierajezdu ŭ Kijeŭ alyona alyona pryśviaciła ceły klip:

Vobraz

Na ŭschodzie nie tak šmat žančyn, što čytajuć rep. I, u adroźnieńnie ad zachodnich repierak, siarod jakich raspaŭsiudžany trend na maskulinnaść, siarod našych dahetul panuje zapyt na zvyšseksualnaść.

Pavialičyć

Saŭranienka składana adnieści da vyšej zhadanych typažoŭ — u jaje svoj styl: krasoŭki, lehinsy i spartovaje adzieńnie, jakoje zbolšaha nabyvajecca ŭ sekand-chendach. Dla dziaŭčyny važna, kab joj było kamfortna, tamu anijakich abcasaŭ.

Z klipaŭ možna zrabić vysnovu, što alyona alyona prapahanduje bodzipazityŭ, ale jana kateharyčna abviarhaje heta.

«Ja prosta takaja, jakaja jość. Ja kažu, što ja siabie pryniała, ale ja nie prapahanduju: idzi, zmahajsia, bi ŭ tvar tych, chto nazavie ciabie tłustaj. Ludzi, davajcie hladzieć praŭdzie ŭ vočy», — tak vykazałasia Alona ŭ adnym ź intervju.

Taksama Saŭranienka choča maksimalna abstrahavacca ad ukrainskaha palityčnaha ciemrašalstva. U studzieni jana była zaŭvažanaja na forumie Błoka Piatra Parašenki, paśla jakoha patłumačyła, što apynułasia na im vypadkova i pieršapačatkova zaprašałasia na kanfierencyju, dzie musiła abmiarkoŭvacca dabračynnaja dapamoha dziciačamu sadku, dzie jana pracavała.

Repierka dadaje, što vielmi važnym jość toje, jak ty stavišsia da siabie, i zaklikaje praściej stavicca da žyćcia — tady ŭsio navokał robicca pryhažejšym i kłaśniejšym.

• 0
• 0
• 0
• 0
• 0
• 0
• 0
• 0