Na miažy z Polščaj pavialičacca čerhi: u Kuźnicy chutka pačniecca ramont

Abmiežavańni na ŭjezd i na vyjezd z Polščy časova ŭvodziacca ŭ punkcie propusku Kuźnica Biełastockaja z 22 lipienia. Ramontnyja darožnyja raboty praciahnucca kala čatyroch miesiacaŭ, paviedamlaje pres-słužba Padlašskaha adździełu Polskaj pamiežnaj słužby.
Spačatku, kala dvuch miesiacaŭ, budzie časova zakryty ŭčastak darohi na vyjezd z Polščy ŭ Biełaruś. Paźniej na taki ž čas budzie časova zakryty ŭčastak na ŭjezd u Polšču ź Biełarusi. Heta moža ŭskładnić pierachod miažy na lubym vidzie transpartu i spryčynicca da pavialičeńnia času čakańnia. Na čas ramontu varta pamiatać pra hetyja ŭskładnieńni pry płanavańni pajezdak.
Madernizacyja punktu propusku ŭ Kuźnicy kaštuje kala 18,5 młn złotych (4,3 młn jeŭra), pracy majuć skončycca da viasny 2020 hoda. Siońniašniaj infrastruktury z polskaha boku ŭžo 18 hadoŭ i jana nie nadta dobra prystasavana da intensiŭnaha ruchu padarožnych. U 2018 hodzie praź miažu ŭ Kuźnicy, pavodle padlikaŭ polskich pamiežnikaŭ, prapuścili 2,6 młn čałaviek. Paśla zakančeńnia madernizacyi Kuźnica budzie ŭ stanie prapuskać ruch navat na 70% bolšy.
Kamientary