Źniavolenaha anarchista Palijenku zapadozryli jašče i ŭ abrazie pradstaŭnika ŭłady
Kryminalnuju spravu aktyvista anarchisckaha ruchu Źmitra Palijenki na pačatku lipienia pieradali ŭ prakuraturu dla nakiravańnia ŭ sud. Ale abvinavačańnie mohuć dapoŭnić, piša «Radyjo Svaboda».
Jak skazała Svabodzie pradstaŭnica pres-słužby Śledčaha kamitetu pa Miensku Kaciaryna Harlinskaja, spravu Palijenki viarnuli dla dadatkovaha papiaredniaha raśśledavańnia ŭ Zavodzki rajonny adździeł mienskaha SK «z paznakaj ab dačy pravavoj acenki dziejańniam Palijenki».
Aceńvać buduć dziejańni, «źviazanyja z abrazaj pradstaŭnika ŭłady», pa vynikach abvinavačańnie mohuć dapoŭnić. Kaho i kali moh abrazić Palijenka, nie paviedamlajecca.
Palijenku zatrymali 20 sakavika, jaho trymali pad vartaj biez vystaŭleńnia abvinavačańnia da 5 krasavika (choć možna tolki 10 dzion). Roznyja abvinavačańni abjadnali ŭ adnu spravu:
- uviečary 13 sakavika, jak śćviardžaje SK, Palijenka raspyliŭ piarcovy haz z balončyka ŭ tvar čałavieku, jaki nibyta zrabiŭ jamu zaŭvahu za kureńnie ŭ padjeździe (pavodle siabroŭki Palijenki, heta była samaabarona — da Źmitra čaplaŭsia «pjany ahresiŭny mužčyna»);
- 23 studzienia raspačali taksama kryminalnuju spravu za hrafici «Milicyjanty zabivajuć ludziej» na budynku ŭ Zavodzkim rajonie Miensku. Razam z Palijenkam u spravie fihurujuć Jaŭhien Čulicki i Nastaśsia Husieva.
Palijenku pahražaje ad 3 da 10 hadoŭ pazbaŭleńnia voli. Sioleta jaho ŭžo štrafavali za «ekstremisckuju šapku».
U 2016 hodzie Palijenku asudzili za «hvałt abo pahrozu ŭžyvańnia hvałtu ŭ dačynieńni da supracoŭnika orhanaŭ unutranych spraŭ» i «vyrab i raspaŭsiud parnahrafičnych materyjałaŭ abo pradmietaŭ parnahrafičnaha charaktaru». Jon vyjšaŭ na volu ŭ kastryčniku 2018 hodu, praz dva z pałovaj hady źniavoleńnia.
Inžyniera-kanstruktara z upraŭleńnia «Pielenha», jakoje robić techniku dla rasijskaha vojska, asudzili pa palityčnych artykułach3
Kamientary