Sud nad «terarystami» adbudziecca ŭ červieni

Cimafiej Drančuk, Emira Branickaja, Alaksiej Šałajka i Mikoła Astrejka trapili ŭ izalatar KDB jašče napiaredadni prezydenckich vybaraŭ. Pieratrusy ŭ ich kvaterach pravodzilisia na padstavie pastanovy, vyniesienaj pa fakcie paklopu na prezydenta. Ale potym maładych ludziej, jakim niama i 30 hadoŭ, abvinavacili ŭ žadańni zachapić uładu. Hetyja čaćviora i jość tyja samyja «terarysty», jakich napiaredadni vybaraŭ demanstravaŭ na pres-kanferencyi žurnalistam asabista kiraŭnik KDB Ściapan Sucharenka.

I voś 9 červienia prakuratura Miensku zajaviła, što raśśledavańnie skončanaje i kryminalnaja sprava nakiravanaja ŭ sud Centralnaha rajonu stalicy. Data sudu maje być pryznačanaja da 16 červienia.

Abvinavačvańni niekalki źmianilisia, i ciapier siabraŭ HA «Hramadzkaja inicyjatyva «Partnerstva» buduć sudzić za toje, što «ŭ ramkach arhanizacyi, jakaja nie prajšła rehistracyju, jany padrychtavali dla publikacyi vydumanyja źviestki, jakija adnosiacca da chady i vynikaŭ vybaraŭ prezydenta Biełarusi, čym zrabili zamach na pravy i zakonnyja intaresy hramadzianaŭ u atrymańni abjektyŭnaj infarmacyi».

– Ja asabista nia baču ŭ dziejańniach abvinavačanych niejkich zamachaŭ. Datyčnaść da arhanizacyi majho padabaronnaha ŭvohule nie dakazanaja. Jašče da taho, jak hety artykuł ustupiŭ u dziejańnie (1 studzienia 2006 hodu. – Zaŭv. aŭt.), Cimafiej Drančuk spyniŭ svajo supracoŭnictva z «Partnertstvam», - raspavioŭ «KP» advakat Pavał Sapiełka.

Žonka Cimafieja Volha takasama vieryć, što ŭžo ŭ lipieni pabačyć muža na voli.

– My z svajakami žartujem, što heta niejki klub maładych baćkaŭ za kratami. U nas ź Cimafiejem raście syn Płaton. Jon naradziŭsia, kali Cima ŭžo byŭ za kratami. U Alaksieja Šałajki hadavały syn i ciažarnaja žonka. U Koli Astrejki žonka taksama maje chutka naradzić. Naš tata bačyŭ syna tolki na fatahrafijach. Zdymki možna pieradavać tolki razam ź pieradačami: 1 raz na dva tydni pa dźvie kartki. Za ŭvieś hety čas u nas było tolki adno spatkańnie. Spadziajusia, što ŭžo ŭ lipieni my z Płatonam ubačym Cimafieja. Chacia naściarožvaje, što sudzić ich budzie toj ža čałaviek, dziakujučy rašeńniu jakoha zaraz adbyvajuć terminy na «chimii» Pavał Sieviaryniec i Mikoła Statkievič.

Artykuł, pa jakim abvinavačvajucca maładyja ludzi (arhanizacyja albo kiravańnie hramadzkim abjadnańniem, jakoje zamachvajucca na asobu, pravy i abaviazki hramadzianaŭ i jakoje nie prajšło dziaržrehistracyju), praduhledžvaje aryšt da 6 miesiacaŭ albo pazbaŭleńnie voli da 3-ch hadoŭ.

«Komsomolskaja pravda» v Biełoruśsii»

• 0
• 0
• 0
• 0
• 0
• 0
• 0
• 0