Sakrušalnaja paraza Ŭkrainy ad Hišpanii — 4:0

Zbornaja Ŭkrainy prajhrała svoj pieršy matč na ČS-2006 kamandzie Hišpanii ź likam 4:0. Miarkujučy pa hulni ŭkrainskaj kamandy možna zrabić vysnovu – u Niamieččynie sinie-žoŭtyja nie źbirajucca zatrymlivacca.

Takoj biazvolnaj hulni ad kamandy Błachina nie čakaŭ nichto. Što kazać, kali Šaŭčenka, kapitan kamandy, chodzić pa poli pieški bieź miača i nie namahajecca navat pazmahacca za jaho.

Zrazumieła, što j paŭabarona musiła b «zahružać» kapitana ŭkrainskaj kamandy, ale hetaha nie było.

U «Miłanie» Šaŭčenka davaŭ rady i ŭ abaronie, i ŭ paŭabaronie, i ŭ napadzie. Dyk čamu Šaŭčenka padyšoŭ u takoj formie da matčaŭ zbornaj? Pytańni da samoha hulca dy trenera. Mažliva, na Šaŭčenku padziejničaŭ punkt jahonaha kantraktu z «Čełsi», pavodle jakoha jon u vypadku atrymańnia traŭmy na ČS-2006 budzie vinien spłacić londanskamu klubu kampensacyju.

Zrešty, havorka nie pra heta, a pra haniebnuju parazu.

Hišpancy ź pieršych chvilin pajšli ŭ nastup i praciahvali naroščvać temp. Na 4-j chvilinie prabiŭ Chavi (paśla pamyłki Niasmačnaha), ale pobač z štanhaju.

A ŭžo da 15-j chviliny hulnia išła ŭ adnyja varoty – Šaŭkoŭskaha. Hišpancy prachodziać pa flanhach, u centry ŭkrainskaj abarony i bjuć pa varotach, kali im zamaniecca.

Na 12-j chvilinie Cimaščuk adpasavaŭ na Šaŭčenku, jaki moh vyjści sam na sam, ale ŭ afsajdzie apynuŭsia Varonin.

Na 13-j chvilinie našeście na ŭkrainskija varoty pryviało da hołu. Spačatku Šaŭkoŭski vyciahnuŭ ź dziaviatki ŭdar Seni. Paśla padačy kutavoha Chabi Ałonsa vyjhraje baraćbu ŭ Jazierskaha i ŭdaram hałavoju ŭ bližni kut varotaŭ Šaŭkoŭskaha robić lik 1:0.

Na 17-j chvilinie padvojny «podźvih» ździejśniŭ Rusoł. Spačatku jon źbiŭ u metrach 19-ci ad varotaŭ Ramasa, a paśla prabićcia štrafnoha ŭ vykanańni Villi miač rykašecić ad hałavy Rusoła i ŭlataje pa centry varot Šaŭkoŭskaha…

Heta ŭžo 2:0. Zrešty, ukraincy nie paskorylisia, a praciahvali vytrymlivać ździeki hišpancaŭ.

Na 23-j chvilinie tolki svoječasovy vychad z varotaŭ Šaŭkoŭskaha vyratavaŭ ukraincaŭ ad treciaha hołu ŭ pieršaj 45-chvilincy.

Dzieś na 25-j chvilinie Šaŭčenku ŭdałosia pahulacca ź miačykam, ale jahonyja namahańni prajści ŭ štrafnuju skončylisia padzieńniem z ułasnaje inicyjatyvy.

Na 32-j chvilinie Husin nanios pieršy ŭdar u bok varotaŭ zbornaj Italii.

U druhim tajmie ŭsie spadzievy na toje, što ŭkraincy ŭrešcie pačnuć hulać, byli raźbityja.

Na 46-j chvilinie Tores praryvajecca ŭ štrafnuju, za im biažyć Vaščuk i trymaje jaho za futbołku, hišpaniec padaje i bje – Šaŭkoŭski jahony ŭdar adbivaje. Ale sudździa pakazvaje na 11-metrovuju paznaku i vydalaje Vaščuka z pola.

Fakt parušeńnia byŭ, a dalej, jak kažuć, paśla boju kułakami nie razmachvajuć. Penalci trapna realizuje Villa, a lik stanovicca 3:0.

Z 47-j chviliny Ŭkraina pačała hulać u mienšaści. Šaŭkoŭskamu nia raz davodziłasia ratavać svaju kamandu. Sinie-žoŭtyja tolki niekalki razoŭ byli blizkimi da pośpiechu, kali paśla ŭdaru Varonina z 23-ch metraŭ miač pralacieŭ pobač z štanhaju, a Rabroŭ ź dziesiaci metraŭ umudryŭsia prabić vyšej varotaŭ.

Hišpancy ž praciahvali atakavać i zabili čaćvierty hoł. Paśla pasu Raula ŭ adzin dotyk Tores z chodu prabiŭ u kut varotaŭ – 4:0.

Na 86-j chvilinie moh zabić Raul, ale nia zmoh abyhrać Šaŭkoŭskaha sam na sam.

Va ŭkraincaŭ moh adznačycca Varonin, jaki pierajhraŭ Kasiljasa, ale ŭ jaho z-pad noh vybiŭ miač Pernija. Šaŭčenkavy ž udar na 90-j chvilinie ŭziaŭ Kasiljas.

Možna prajhravać tak, jak Charvatyja Brazylii, i tady zaŭziatary bałkanskaj kamandy jaje padtrymlivajuć i kažuć, što im nie pašancavała, a možna prosta nie hulać u futboł…

Champion.com.ua

❏

Hladzi jašče:

Uzmocnienaja achova pasolstva Hišpanii va Ŭkrainie

• 0
• 0
• 0
• 0
• 0
• 0
• 0
• 0