Jak pravilna kamentavać Čempijanat śvietu pa futbole

Temnik-feljeton Lolika Pralask…Uškina.

Dobry dzień, u etery spartova-palityčny kamentatar Siarhiej Novikaŭ z prahramaj «Pravy futbalista ŭ śviecie».

Pačynajem tranślacyju matču Ŭkraina–Iran.

Ujaviecie tolki – usiaho 10 hod tamu ŭ takoje ciažka było pavieryć. Kraina lažała ŭ ruinach, ad hora-refarmataraŭ čulisia prapanovy prypynić tranślacyi z Čempijanatu śvietu. «Našto, – kazali jany, – nam futboł, kali kankuravać z Brazylijaj my niazdatnyja? Davajcie, – prapanoŭvali, – raźvivać rycarskija turniry i tranślavać konkursy ministrelaŭ. Losy prostych ludziej stali dla dziaržavy hałoŭnym arhumentam, kab zachavać futbolnyja tranślacyi».

Viartajemsia da matču. Ź miačom Andrej Šaŭčenka. Jon idzie napierad tempami rostu biełaruskaj ekanomiki – 12% u hod.

Adnak udzieł ukrainskich žaŭnieraŭ u akupacyi Iraku vyklikaje zakanamiernyja narakańni narodaŭ Uschodu: iranski chaŭbek Machmud Achmadynedžad robić forvardu brudny padkat.

Šaŭčenka padaje, tym samym nibyta demanstrujučy, jak ciažka davodzicca sezonnym rabotnikam z krainaŭ, dzie niama sacyjalna-rynkavaj stabilnaści, na paloch Zachodniaj Eŭropy.

Aperatar demanstruje nam trybuny, dzie my bačym scenu abureńnia tarsydy ŭkraincaŭ. Niaciažka zrazumieć pryčynu ich emocyjaŭ: sarvali ataku, a tut jašče zachod u akvatoryju portu Feadosii nataŭskaha karabla. Darečy, režyser tranślacyi mnie padkazvaje, što fanaty ŭžo abviaścili druhi i treci sektary, a tasama prachod pamiž trybunami «zonaj biaz NATO».

Da miesca incydentu biažyć sudździa i, acaniŭšy sytuacyju, pakazvaje irancu žoŭtuju kartku. Voś jon – prykład vysokaha ŭzroŭniu spraviadlivaha mižnarodnaha aŭdytu! Kali b refery aceńvaŭ ahulny kapitalny košt «Biełtranshazu», jon by naličyŭ majomaści na 5 miljardaŭ baksaŭ, a nia niejki tam miljard, jak padrachavali ŭ tym «Hazpromie».

Žoŭta-błakitnyja atrymali prava na štrafny. Jany doŭha radziacca, chto budzie bić. Ci nie nahadvaje heta vam, šanoŭnyja hledačy, bieskancovuju humku pa stvareńni aranžavaj kaalicyi? Hetak i chočacca skazać – aranžavaja burbałka łopnuła!

Rabroŭ raźbiahajecca, bje. Hoł!

Što dziejecca na trybunach! Petardy! Benhalskija ahieńčyki. Chaos!!! Voś vam palityka padvojnych standartaŭ: eŭrapiejcy nia zdolnyja navieści paradak u siabie doma, adnak lezuć na Biełaruś sa svaimi paradami jak žaba na kupinu.

A my na hetym zakančvajem naš repartaž. Z vami byŭ Siarhiej Novikaŭ. Zastavajciesia ŭ stabilnaści! A amataram futbołu raim nie adychodzić ad błakitnych ekranaŭ i pieraklučycca na kanał «Ład», dzie zaraz maje pačacca nastupny repartaž z suśvietki – u prahramie «Duchoŭny penalci».

• 0
• 0
• 0
• 0
• 0
• 0
• 0
• 0