Vieteran vajny ŭ Afhanistanie vyjšaŭ na płošču ŭ Maładziečnie patrabavać biaspłatnaje žyllo
25 listapada nasuprać Maładziečanskaha rajvykankama vieteran vajny ŭ Afhanistanie Anton Vałujevič abviaściŭ, što pačynaje haładoŭku, i staŭ z šyldaj. Praz šyldu mužčyna źviarnuŭsia da kiraŭnictva rajona z patrabavańniem «viarnuć daŭhi za vajnu». Pa mierkavańni Vałujeviča, dziaržava pavinna vydzielić jamu kvateru, piša Rehijanalnaja hazieta.
Načalnik adździeła ideałahičnaj raboty, kultury i pa spravach moładzi Raisa Kazanovič zaprasiła vieterana da namieśnika staršyni Śviatłany Valko, jakaja kuryruje pytańni žyllova-kamunalnaj haspadarki. Razam ź imi ŭ hutarcy ŭdzielničaŭ načalnik adździeła žyllova-kamunalnaj haspadarki rajvykankama Siarhiej Bochan.
U prysutnaści karespandentaŭ jany sprabavali patłumačyć situacyju. Vałujevič pačaŭ z krykaŭ: «Ja tut tak i zdochnu pad vykankamam, słova aficera!», u adkaz na što jamu skazali: «Vy nie aficer».
Paśla supracoŭniki vykankama raspaviali, što ciapier Vałujevič žyvie ŭ internacie, ale choča lepšyja žyllovyja ŭmovy, kab pieravieźci da siabie maci.
— Žyllo jamu prapanoŭvali nie adzin raz, jon ad usiaho admaŭlaŭsia, — raspaviała Śviatłana Valko. — Prapanoŭvali dom, u jakim žyvuć vieterany Afhanistana, cana dla ŭsich adna. Dom zasieleny, chto kredyt uziaŭ, chto pryvatyzavaŭ, jon admoviŭsia. Patrabuje biaspłatnaje žyllo, tolki lhot hetych niama. Kali była mahčymaść budavacca ź dziaržaŭnaj padtrymkaj, jon nie skarystaŭsia. Ustupiŭ u žyllova-budaŭničy kaapieratyŭ, ale nie spłaciŭ nivodnaha ŭniosku.
Čaho choča vieteran
Vałujevič ličyć, što dziaržava pavinna zabiaśpiečyć jamu žyllo jak čałavieku, jaki addaŭ svoj voinski doŭh.
Ciapier mužčyna žyvie ŭ internacie.
«Mnie soramna»
My paprasili patłumačyć situacyju staršyniu maładziečanskaj rajonnaj arhanizacyi Biełaruskaha sajuza vieteranaŭ vajny ŭ Afhanistanie Ihara Arabieja.
Jon raskazaŭ, što ŭ rajonie kala 249 voinaŭ-internacyjanalistaŭ, 49 ź ich uvachodziać u sajuz. Vałujevič pryjechaŭ na Maładziečanščynu sa Smarhonskaha rajona. Mieŭ zvańnie staršaha siaržanta, byŭ dalnamierščykam Vajskovaj palavoj pošty 696 u 201 dyvizii artyleryjskaha pałka.
Słužyŭ ad 3 maja da 10 listapada 1980 hoda. Maje treciuju hrupu invalidnaści, nie źviazanuju z bajavymi dziejańniami.
Staršynia arhanizacyi patłumačyŭ, što ŭ 2007 hodzie ŭnieśli źmieny ŭ «Zakon RB ab vieteranach». Źmianieńni skasavali šerah ilhot dla voinaŭ-internacyjanalistaŭ.
— Prajšoŭ čas, kali kvatery vydavali biaspłatna, — raskazvaje Arabiej. — Usie afhancy rajona, akramia jaho, u toj ci inšaj stupieni skarystalisia sacyjalnaj harantyjaj na žyllo — chto subsidyjaj, chto lhotnym kredytam. Ja sam stanaviŭsia ŭ čarhu, było ciažka vypłacić usiu sumu, ale źbiraŭ. A za takuju situacyju mnie soramna.
Ihar Arabiej dadaŭ, što bačyć dla Vałujeviča dva šlachi. Možna stajać u čarzie rajvykankama i čakać žyllo. Inšy varyjant — atrymać žyllo ad arhanizacyi pa rašeńni kiraŭnika.
Kamientary