Siłaviki sprabujuć viarnuć z Ukrainy biełarusaŭ, jakija pazbavili «Naftan» 200 tysiač jeŭra
Śledčy kamitet Biełarusi sprabuje viarnuć z Ukrainy biełaruskich biznesmienaŭ i top-mieniedžaraŭ, jakija padazrajucca ŭ kradziažy z navapołackaha naftapierapracoŭčaha zavoda «Naftan» bolš za 200 tysiač jeŭra. Dadzienuju infarmacyju tut.by paćvierdzili ŭ SK.
Hałoŭnaje śledčyja ŭpraŭleńnie SK rasśleduje kryminalnuju spravu ŭ dačynieńni da pradstaŭnikoŭ kamiercyjnych struktur i byłych słužbovych asobaŭ «Naftana», jakija skrali na NPZ 207 tysiač jeŭra, paviedamili ŭ viedamstvie.
Pa hetaj spravie va Ukrainie zatrymali traich. Ciapier vyrašajecca pytańnie ab ich ekstradycyi. Jašče dvoje fihurantaŭ spravy znachodziacca ŭ statusie padazravanych, rastłumačyli ŭ SK Biełarusi.
Havorka idzie pra padziei 2016 hoda, kali była padpisanaja damova z zamiežnaj kampanijaj ITP Benelli ab pastaŭkach śpiecyjalnaha abstalavańnia na «Naftan» vytvorčaści Brownswerk Heat Transfer i GEA Process Engineering.
U čas pieramovaŭ baki nibyta pahadzilisia źnizić canu abstalavańnia, ale hetaja damoŭlenaść nie była adlustravanaja ŭ kantrakcie, i zavod apłaciŭ poŭny košt. Roźnica była nibyta pieraličanaja na rachunki kampanij Mendeleev Group i Petroleum Service i prysvojenaja arhanizatarami ździełki.
Biełaruskija siłaviki ŭ vieraśni 2018 hoda vystavili abvinavačvańni suprać pradprymalnikaŭ, ale ich śled u Biełarusi prastyŭ. Biźniesmienaŭ abviaścili ŭ mižnarodny vyšuk.
Pavodle źviestak radyjo «Svaboda», biełarusaŭ zatrymali ŭ Adesie 21 listapada pa linii Interpału. Dvoje ź ich znachodziacca pad «chatnim» aryštam, treci — u śledčym izalatary.
Niahledziačy na patrabavańnie prakuratury aryštavać i ŭtrymlivać biełaruskich biźniesmienaŭ u śledčym izalatary na čas ekstradycyjnaj pravierki, sud pastanaviŭ ab «načnym chatnim aryšcie» — jany pavinny nasić elektronny branzalet i nie pakidać miesca faktyčnaha pražyvańnia biez dazvołu śledčaha z 22:00 da 7 hadzin ranicy.
Takoje rašeńnie sud patłumačyŭ tym, što biełarusy nie viedali pra kryminalny pieraśled ich na radzimie i na momant vystaŭleńnia im abvinavačvańniaŭ Śledčym kamitetam Biełarusi ŭžo žyli va Ukrainie.
Elektronny branzalet va Ukrainie čaściej za ŭsio vykarystoŭvajuć jak alternatyŭnuju mieru strymańnia dla padazravanych u ekanamičnych złačynstvach. Elektronny branzalet dapamahaje dystancyjna adsočvać usie pierasoŭvańni asoby, u dačynieńni jakoj viadziecca śledstva.
Proźviščy fihurantaŭ spravy nie paviedamlajucca. Ale jak udałosia vyśvietlić, u pryvatnaści, havorka idzie pra troch biełarusaŭ z proźviščam Ščarbinin, jakija ad 2018-ha znachodziacca ŭ bazie vyšuku ŭpraŭleńnia ŭnutranych spraŭ Viciebskaha abłvykankama.
35 hadovaha Kiryła Jurjeviča Ščarbinina i 27-hadovy Illu Hienadzieviča Ščarbinina šukajuć jak padazravanych. 57-hadovy Hienadź Viktaravič Ščarbinin uchilajecca ad adbyćcia pakarańnia, vynikaje z bazy dadzienych.
Biźniesmieny źjaŭlajucca kiraŭnikami i zasnavalnikami kampanij «Ojł end Kiemikałs» i «Ukrnaftachimtrejd», jakija handlujuć va Ukrainie palivam i chimičnaj pradukcyjaj.
Kamientary