Z dastatkova siensacyjnaj zajavaj vystupiŭ staršynia hramadskaha abjadnańnia «Ruś», pradstaŭnik Instytuta SND u Biełarusi Mikałaj Siarhiejeŭ.
Nie tak daŭno Siarhiejeŭ atrymaŭ z ruk prezidenta Rasii Uładzimira Pucina miedal Puškina. Jaho ŭručajuć «za vialiki ŭniosak u aśvietu i vyvučeńnie kulturnaj spadčyny, spryjańnie zbližeńniu i ŭzajemaŭzbahačeńniu kultur biełaruskaha, ukrainskaha i ruskaha narodaŭ».
Dyk voś, Siarhiejeŭ zajaviŭ, što ŭ budučaj sajuznaj dziaržavie Biełarusi i Rasii ŭ skład «Biełaruskaj akruhi» było b dobra ŭklučyć Kalininhradskuju, Smalenskuju i Pskoŭskuju vobłaści. Heta vyklikała abureńnie niekatorych inšych prarasijskich siłaŭ. Naprykład, telehram-kanał «Bulba prastołaŭ», jaki źviazvajuć ź imieniem publicysta-biełarusafoba Juryja Barančyka, napisała, što Sierhiejeŭ nijaki nie ideołah «ruskaha śvietu», a «saviecki idyjot, jaki nie moža navat zrabić vysnovu z histaryčnych padziej, jakija prajšli pry jaho žyćci».
«Bolš škodnuju dla Rasii ideju ciažka ŭjavić. Kali b u biełaruskich nacyjanalistaŭ była chacia b kropla mazhoŭ, jany b abiedźviuma rukami jaje padtrymali», — napisała «Bulba prastołaŭ».
«NN» patelefanavała Mikałaju Siarhiejevu, kab jon patłumačyŭ nam svaju pazicyju.
«Heta adzin z varyjantaŭ farmavańnia sajuznaj dziaržavy, jaki vynosiŭsia na abmierkavańnie. Isnuje varyjant, što ŭ budučyni sajuznaja dziaržava budzie dzialicca na sajuznyja akruhi. I adna z takich akruhaŭ budzie nazyvacca «Biełaruskaj». Farmavacca akruhi buduć pa ekanamičnaj prykmiecie, tamu niekatoryja vobłaści Rasijskaj Fiederacyi zmohuć uvajści ŭ hetuju akruhu.
Pry hetym zaŭvažu, što dziaržaŭnaść Biełarusi budzie zachavana. Nijak nie budzie zakranutaja i terytaryjalnaja cełasnaść Rasijskaj Fiederacyi. Hladzicie, u Rasii jość fiederalnyja akruhi, u jakija ŭvachodzić, skažam, Tatarstan, ale heta nijak nie buryć ich respublikanskuju samastojnaść.
Heta prosta adzin z varyjantaŭ dla abmierkavańnia, nie bolš za toje. Heta nie značyć, što kahości siłaj buduć dałučać. Sajuznaja dziaržava pavinna raźvivacca, tamu treba inicyjavać takija dyskusii», — raskazaŭ Siarhiejeŭ.
Pradstaŭnik abjadnańnia «Ruś» aburany tym, jak jaho słovy padaŭ telehram-kanał «Bulba prastołaŭ». «Kali im nie padabajecca, to mahli b patłumačyć, čamu ja nie maju racyju. A kali pierachodziać na asobu, to značyć, što ŭ ich niama dovadaŭ. Hety čałaviek nizkaj kvalifikacyi, kali abražaje prosta tak i vydziorhvaje frazy z kantekstu».
Jak vyhladaje znutry rezidencyja Łukašenki «Krasnasielskaje»13
Kamientary