Pałata pradstaŭnikoŭ Kanhresu ZŠA padčas hałasavańnia ŭ sieradu zaćvierdziła abodva artykuły abvinavačvańnia suprać prezidenta krainy Donalda Trampa ŭ ramkach pracedury impičmientu, piša tass.ru. Donaldu Trampu inkryminujecca złoŭžyvańnie ŭładaj i stvareńnie pieraškod rasśledavańniu Kanhresu.
U padtrymku pieršaha punkta abvinavačvańni prahałasavali 230 zakanadaŭcaŭ, suprać vykazalisia 197, adzin ustrymaŭsia. Za druhi artykuł było addadziena 229 hałasoŭ, suprać prahałasavali 198 kanhresmienaŭ, adzin taksama ŭstrymaŭsia.
Ustrymałasia ŭ abodvuch vypadkach Tułsi Habard (ad štata Havai), jakaja ŭvachodzić u lik pretendentaŭ na vyłučeńnie kandydatam na post prezidenta ZŠA ad Demakratyčnaj partyi na vybarach 2020 hoda. «Ja nie mahła z čystym sumleńniem hałasavać suprać impičmientu, tamu što liču prezidenta Trampa vinavatym u pravaparušeńniach. Ja taksama nie mahła <…> hałasavać za impičmient, tamu što źniaćcie dziejnaha prezidenta z pasady nie pavinna być kulminacyjaj anhažavanaha pracesu, što padsiłkoŭvajecca mižpartyjnaj varožaściu, jakaja tak mocna padzialiła našu krainu», — patłumačyła svajo rašeńnie Habard.
Tramp u adkaz nazvaŭ demakrataŭ «łajdakami», a impičmient — «palityčnym samahubstvam» Demakratyčnaj partyi.
Ciapier abvinavaŭčaje zaklučeńnie pieradajecca ŭ Sienat, dzie pracedura pieratvorycca ŭ sudovy praces. Kiravać im budzie staršynia Viarchoŭnaha sudu ZŠA. Pałata pradstaŭnikoŭ na takim pracesie faktyčna vystupaje bokam abvinavačvańnia, a sienatary vykonvajuć funkcyi prysiažnych.
Kab impičmient byŭ abvieščany, nieabchodna nie mienš jak dźvie treci hałasoŭ sienataraŭ (nie mienš za 67). Pry biahučym składzie Sienatu vierahodnaść hałasavańnia na karyść impičmientu faktyčna zvodzicca da nula. Z pačatku biahučaha hoda respublikancy zajmajuć u vierchniaj pałacie Kanhresu 53 miescy z 100.
Tolki žminda i lanivy nie padtrymlivaje «Nivy»! Vy možacie za chvilinu padtrymać «NN» padachodnym, nie patraciŭšy ni kapiejki svaich5
Kamientary