Adamoviča pasadzili, jon vyjšaŭ z turmy, jon rot sam sabie zašyvaŭ, jon uciok u Narviehiju, jon sa śmietnikaŭ charčujecca, jaho razfrendžvajuć z-za nadakučlivaha biezpadstaŭnaha pantavańnie… Adamovič Słavamir… Čamu pra jaho dumajuć i havorać? Čamu nie pra Michasia Skobłu, jaki zrabiŭ hruntoŭnuju antałohiju biełaruskaj paezii dvadcataha stahodździa?
Dubaviec pje, pjany za rul sadzicca, jon honić chałturu na radyjo i na infarmacyjnych sajtach, jon zadaje samomu sabie pytańni, na jakija nie viedaje adkazaŭ, jon fłudzić u necie pad roznymi mianuškami, u jahonaj tvorčaści šmat chto razčaravaŭsia… Siarhiej Dubaviec… Čamu stolki razmoŭ pra jaho, a nie pra Michasia Skobłu, jaki robić spraŭnyja pieradačy na radyjo “Svaboda”?
Sys zhulaŭsia, jon nievierahodna chutka sastareŭ i pamior… Ale ŭsie pamiatajuć i čytajuć, i pieračytvajuć Anatola Sysa… Anatol Sys… Čamu nichto nie pamiataje pra Michasia Skobłu, jaki vydaŭ paśmiarotny zbor tvoraŭ Anatola?
Ściapan zajmajecca ŭsim, čym tolki moža zajmacca tvorčy čałaviek, jon majstračyć scenary dla novych ruskich sieryjałaŭ, jon maluje zavakonnyja krajavidy, jon raźmieńvajecca na internetnuju drabiazu… Uładzimir Ściapan… Čamu ŭ Ściapana tysiača frendoŭ z usiaho śvietu, a ŭ Michasia Skobły, jaki vydaje paetyčnyja zborniki, frendoŭ niama?
Fiedarenka piermanientna kidaje i znoŭku pačynaje pić, piša ŭtraja mieniej, čym moh by, zajmajecca niejkimi filmikami, siadzić sumny za redakcyjnym stałom, jaki jamu abryd, siadzić i złujecca na ŭvieś čałaviečy śviet, praz złość i chvareje… Andrej Fiedarenka… Čamu ŭsie lubiać Andreja Fiedarenku z daŭžeznaj historyjaj jahonaj chvaroby? Čamu tak nie lubiać Michasia Skobłu, jaki apiakujecca tvorčaj spadčynaj paetki Łarysy Hienijuš?
Niespraviadliva atrymlivajecca. Za los Adamoviča i Dubaŭca, za los Ściapana i Fiedarenki ludzi pieražyvajuć, jany pieražyvajuć navat za Sysa, jakoha daŭno niama siarod žyvych, a za Skobłu nichto nie pieražyvaje. Moža ja nie viedaju tych, chto pieražyvaje za Michasia Skobłu? Tady čamu ja viedaju tak šmat ludziej, chto cikavicca losam usich astatnich nazvanych litarataraŭ? Zahadka, jakuju ja tak i nie razhadaŭ, navat napisaŭšy hety dopis, bo heta zahadka lubovi, i jana nie razhadvajecca.
Ciapier čytajuć
Chto taja Alina, ź jakoj Łukašenka tancavaŭ hetym razam na navahodnim bali18
Kamientary