Łukašenka: Roznahałośsi z Rasijaj ciahnucca ŭžo rehularna 13 hadoŭ

Alaksandr Łukašenka sabraŭ siońnia, pierad vizitam u Sočy, naradu pa zabieśpiačeńni efiektyŭnaj raboty paliŭna-enierhietyčnaha kompleksu krainy, piša BiełTA.

«My sabralisia dla taho, kab abmierkavać šerah mier pa vykanańni prahnoznych pakazčykaŭ i, niama čaho chavać, pieraadoleńni tych niehatyŭnych tendencyj, jakija namiecilisia ŭ našaj ekanomicy ŭ suviazi z apošnimi padziejami ŭ śviecie i pierš za ŭsio va ŭzajemaadnosinach z Rasijaj, — skazaŭ Alaksandr Łukašenka. — Heta nie tolki vuzkija pytańni. Jany va ŭsich na słychu — nakštałt pastavak nafty, hazu, praduktovyja vojny, jakija, na žal, stali zvykłymi ŭ apošni čas».

Kiraŭnik dziaržavy pacikaviŭsia, što jość u arsienale ŭrada dla vyrašeńnia prablemnych pytańniaŭ, jak buduć zabiaśpiečanyja rost vałavoha ŭnutranaha praduktu, vykanańnie paramietraŭ biudžetu, cenavaja stabilnaść i samaje hałoŭnaje — pastupalny rost dachodaŭ usich słajoŭ nasielnictva. «Ad nivodnaj prahramy my admovicca nie možam. I nie tolki tamu, što hety hod — hod ispytaŭ», — dadaŭ jon.

Alaksandr Łukašenka nahadaŭ, što čarhovy raz paŭstali roznahałośsi pa enierhietyčnych pytańniach z najbližejšym partnioram — Rasijaj. Heta adbyvajecca rehularna ŭžo na praciahu 13 hadoŭ, niahledziačy na ​​ŭzajemnyja abaviazacielstvy, zaŭvažyŭ jon.

«Choć pry ich padpisańni nam byli dadzienyja ćviordyja harantyi. Da prykładu, u hetym hodzie Rasija abaviazałasia na mižuradavym uzroŭni pastavić u Biełaruś 24 młn t nafty — pa 2 młn kožny miesiac. U studzieni było pastaŭlena 500 tys. — adna čverć. Vy mnie paviedamicie, što zroblena dla taho, kab Rasija vykonvała abaviazacielstvy», — skazaŭ kiraŭnik dziaržavy.

Jon adznačyŭ, što Biełaruś zanadta časta vymušana karektavać płany raźvićcia svajoj ekanomiki. «Tamu chaciełasia b pačuć pra miechanizmy kampiensacyi strat, jakija naša kraina niepaźbiežna niasie ŭ hety pieryjad nie pa svajoj vinie. Patrabavańni viadomyja — nivodny žychar Biełarusi, nivodnaje pradpryjemstva nie pavinny adčuć na sabie nastupstvy ad usiakaha rodu manieŭraŭ našych partnioraŭ», — źviarnuŭ uvahu biełaruski kiraŭnik.

Łukašenka taksama pacikaviŭsia prapanovami ŭrada pa pošuku alternatyŭnych pastaŭščykoŭ enierharesursaŭ i nadziejnych kanałaŭ ich pastaŭki.

«Jašče raz, užo publična, paŭtaraju: usie naftapierapracoŭčyja zavody pavinny pracavać. My pavinny zabiaśpiečvać naftapraduktami nie tolki ŭnutrany rynak, jak heta adbyvajecca ciapier, ale i našy abaviazacielstvy pa kantraktach na źniešnich rynkach, heta značyć prodaž naftapraduktaŭ Jeŭropie, Ukrainie, inšym krainam», — padkreśliŭ kiraŭnik dziaržavy.

• 0
• 0
• 0
• 0
• 0
• 0
• 0
• 0