Аляксандр Лукашэнка сабраў сёння, перад візітам у Сочы, нараду па забеспячэнні эфектыўнай работы паліўна-энергетычнага комплексу краіны, піша БелТА.
«Мы сабраліся для таго, каб абмеркаваць шэраг мер па выкананні прагнозных паказчыкаў і, няма чаго хаваць, пераадоленні тых негатыўных тэндэнцый, якія намеціліся ў нашай эканоміцы ў сувязі з апошнімі падзеямі ў свеце і перш за ўсё ва ўзаемаадносінах з Расіяй, — сказаў Аляксандр Лукашэнка. — Гэта не толькі вузкія пытанні. Яны ва ўсіх на слыху — накшталт паставак нафты, газу, прадуктовыя войны, якія, на жаль, сталі звыклымі ў апошні час».
Кіраўнік дзяржавы пацікавіўся, што ёсць у арсенале ўрада для вырашэння праблемных пытанняў, як будуць забяспечаныя рост валавога ўнутранага прадукту, выкананне параметраў бюджэту, цэнавая стабільнасць і самае галоўнае — паступальны рост даходаў усіх слаёў насельніцтва. «Ад ніводнай праграмы мы адмовіцца не можам. І не толькі таму, што гэты год — год іспытаў», — дадаў ён.
Аляксандр Лукашэнка нагадаў, што чарговы раз паўсталі рознагалоссі па энергетычных пытаннях з найбліжэйшым партнёрам — Расіяй. Гэта адбываецца рэгулярна ўжо на працягу 13 гадоў, нягледзячы на ўзаемныя абавязацельствы, заўважыў ён.
«Хоць пры іх падпісанні нам былі дадзеныя цвёрдыя гарантыі. Да прыкладу, у гэтым годзе Расія абавязалася на міжурадавым узроўні паставіць у Беларусь 24 млн т нафты — па 2 млн кожны месяц. У студзені было пастаўлена 500 тыс. — адна чвэрць. Вы мне паведаміце, што зроблена для таго, каб Расія выконвала абавязацельствы», — сказаў кіраўнік дзяржавы.
Ён адзначыў, што Беларусь занадта часта вымушана карэктаваць планы развіцця сваёй эканомікі. «Таму хацелася б пачуць пра механізмы кампенсацыі страт, якія наша краіна непазбежна нясе ў гэты перыяд не па сваёй віне. Патрабаванні вядомыя — ніводны жыхар Беларусі, ніводнае прадпрыемства не павінны адчуць на сабе наступствы ад усякага роду манеўраў нашых партнёраў», — звярнуў увагу беларускі кіраўнік.
Лукашэнка таксама пацікавіўся прапановамі ўрада па пошуку альтэрнатыўных пастаўшчыкоў энергарэсурсаў і надзейных каналаў іх пастаўкі.
«Яшчэ раз, ужо публічна, паўтараю: усе нафтаперапрацоўчыя заводы павінны працаваць. Мы павінны забяспечваць нафтапрадуктамі не толькі ўнутраны рынак, як гэта адбываецца цяпер, але і нашы абавязацельствы па кантрактах на знешніх рынках, гэта значыць продаж нафтапрадуктаў Еўропе, Украіне, іншым краінам», — падкрэсліў кіраўнік дзяржавы.
Каментары