Biełarusa abvinavacili ŭ pierasyłcy atruty ŭ amierykanskuju turmu
34-hadovamu hramadzianinu Biełarusi Ŭładzisłavu Cimaščuku vystaŭlenyja abvinavačańni ŭ pahrozach turemščykam u Złučanych Štatach i pierasyłcy ŭ kalifarnijskuju turmu «taksyčnych rečyvaŭ u jakaści zbroi», paviedamlaje «Radyjo Svaboda» sa spasyłkaj na prakuraturu Paŭnočnaj akruhi Kalifornii.
Pavodle prakuratury, Uładzisłaŭ Cimaščuk pierasłaŭ ź Biełarusi dva listy (adzin u 2016 hodzie, adzin u 2018-m) z atrutaj rycynam u turmu Pelican Bay u Kalifornii, adrasavaŭšy ich načalniku turmy i źniavolenym (adzin ź jakich paznačany jak A.C.). Jamu pahražaje da 5 hadoŭ turmy za pahrozy i da hodu za pierasyłku niebiaśpiečnych pradmietaŭ, mahčymy taksama bujny štraf.
Sam Cimaščuk raniej byŭ źniavoleny ŭ Kalifornii — pavodle The New York Times, u 2006 hodzie jaho pasadzili za rabavańnie, zhon mašyny i hvałt adnosna słužbovaj asoby. Ale paśla daterminovaha vyzvaleńnia ŭ 2011 hodzie jaho departavali ŭ Biełaruś. U Pelican Bay jon nie siadzieŭ.
Adznačajecca, što ŭ 2017 hodzie nieviadomy pahražaŭ štodzień zabivać školnikaŭ u horadzie Anahajm, kali z turmy nia vyzvalać zhadanaha A.S. U 2019 hodzie amerykanskija turemščyki pierachapili list, jaki Cimaščuk pisaŭ viaźniu Teadoru Kačynskamu (eka-terarystu, viadomamu jak «Unabomber», jaki zabiŭ troch i paraniŭ dva dziasiatki čałaviek). U tym liście Cimaščuk uziaŭ na siabie adkaznaść za pahrozy ŭ Anahajmie i raskazvaŭ pra plan z rycynam.
Biełaruś nia maje damovy pra ekstradycyju z ZŠA. Prakuratura nie paviedamlaje, ci čakaje, što Cimaščuka dastaviać u Štaty.
Kamientary