Padarunak na Dzień Voli

Hlen Chenłan, jaki ŭznačalvaje nacyjanalnuju zbornuju Biełarusi pa chakiei, padpisaŭ kantrakt ź minskim «Dynama», što vystupaje ŭ Kantynientalnaj chakiejnaj lizie.

Z novaha siezona kanadski śpiecyjalist budzie sumiaščać pracu ŭ kłubie i zbornaj. Na pasadzie hałoŭnaha treniera «Dynama» jon źmianiŭ rasijskaha śpiecyjalista Vasila Śpirydonava.

«Kantrakt pačnie dziejničać u lipieni», — paviedamiŭ H.Chenłan na pres‑kanfierencyi ŭ Minsku 25 sakavika. Nazvać termin dziejańnia dahavora jon admoviŭsia. Trenier prybyŭ u Minsk adrazu paśla taho, jak jaho raniejšy kłub «Jokieryt» vybyŭ z płej‑of čempijanatu Finlandyi.

«Ja ŭdziačny ŭsim, što atrymaŭ mahčymaść viarnucca damoŭ. Dla mianie heta unikalny šans i vialikaja radaść. Ja pryjechaŭ nie jak paŭnočnaamierykanski śpiecyjalist, a jak biełaruski trenier. Za svaju karjeru ja stolki pracavaŭ ź biełaruskaj zbornaj, što liču hetuju krainu svajoj druhoj radzimaj», — zaznačyŭ H.Chenłan.

Pavodle jaho słoŭ, u dynamaŭcaŭ budzie vielmi važny siezon u KCHŁ, pakolki napieradzie zimovyja Alimpijskija hulni 2010 hoda. «Asnoŭnaja zadača — pryciahvać jak maha bolš biełaruskich chakieistaŭ, raźvivać nie tolki «Dynama», ale i ŭvieś biełaruski chakiej», — padkreśliŭ trenier.

U toj ža čas, pavodle jaho słoŭ, kamanda nie zmoža abyścisia biez vopytnych lehijanieraŭ, kali choča zmahacca za miesca ŭ płej‑of. «My nie budziem raźmiažoŭvać hulcoŭ pa nacyjanalnaj prykmiecie. Heta adna vialikaja siamja», — zajaviŭ trenier. H.Chenłan ličyć, što lehijaniery pavinny žyć ź siemjami na kvaterach. «Ja i namieśnik hienieralnaha dyrektara kłuba Šon Simpsan ličym Minsk lepšym horadam u KCHŁ», — skazaŭ H.Chenłan.

Jak paviedamiŭ staršynia Fiederacyi chakieja Biełarusi Uładzimir Navumaŭ, u novym siezonie pierad kamandaj staić zadača zaniać miesca nie nižej za dziesiataje

Pavodle jaho słoŭ, kandydatura H.Chenłana była adzinaj, jakuju razhladała fiederacyja. «Byli prapanovy ad inšych trenieraŭ. Jany prymalisia, ale nie razhladalisia», — skazaŭ U.Navumaŭ.

Skład «Dynama» pavinien być ukamplektavany da 1 lipienia. U.Navumaŭ raźličvaje, što kapitanam kamandy ŭ novym siezonie budzie Kanstancin Kalcoŭ. «U jaho dziejny kantrakt z kłubam «Sałavat Jułajeŭ», ale heta ŭžo naša prablema, jak zrabić jaho hulcom «Dynama», — skazaŭ staršynia FCHRB.

U.Navumaŭ paviedamiŭ, što H.Chenłan pieraviazie ŭ Minsk žonku i syna. Žonka budzie pracavać nastaŭnicaj.

***

Darečy, pierad zbornaj Biełarusi pastaŭlena zadača na čempijanacie śvietu pa chakiei, što projdzie ŭ Šviejcaryi z 24 krasavika na 10 traŭnia, nie nižej za siomaje.

Try lepšyja kamandy hrupy «A» vychodziać u nastupny raŭnd, dzie ich supiernikami buduć try lepšyja kamandy hrupy «D» (Finlandyja, Čechija, Narviehija, Danija).

Dźmitry Ułasaŭ, BiełaPAN

• 0
• 0
• 0
• 0
• 0
• 0
• 0
• 0