KDB apublikavaŭ videa dopytaŭ palitviaźnia Šaŭrova, dzie toj nahavaryŭ łuchty. Pravaabaroncy: Heta ni na što nie ŭpłyvaje

Turemnaje źniavoleńnie, biassprečna, stresavaja situacyja. I hetamu stresu kožny daje rady pa-svojmu. Adny pryncypova nie supracoŭničajuć sa śledstvam i admaŭlajucca davać pakazańni. Inšyja robiać naadvarot — praz dyjałohi sa śledčymi sprabujuć pierajhrać sistemu.

Pavialičyć

24 krasavika KDB apublikavaŭ videa hutarak z palitviaźniem Pilipam Šaŭrovym, jaki ad studzienia znachodzicca ŭ izalatary za toje, što razmalavaŭ ruki pomniku Alaksandru Puškinu ŭ čyrvony koler. Pravabaroncy ličać Pilipa Šaŭrova palitviaźniem. Jany miarkujuć, što ŭ jahonych dziejańniach niama składu złačynstva pa č. 1 i č. 2 art. 339 KK («Chulihanstva»), a pazbaŭleńnie voli chłopca źjaŭlajecca palityčna matyvavanym.

«NN» z etyčnych pryčyn nie publikuje videa dopytaŭ. Niezrazumieła, ci była atrymanaja zhoda ad samoha Šaŭrova na zdymki, a tym bolš źmiaščeńnie hetych zapisaŭ u internet.

Kali koratka, to na hetych videa Šaŭroŭ daje nie samyja pazityŭnyja acenki svaim paplečnikam — Paŭłu Sieviaryncu, Dzianisu Urbanoviču, a taksama Vitalu Rymašeŭskamu, Mikołu Statkieviču i inšym apazicyjanieram. Taksama jon sarkastyčna vykazvajecca pra toje, što pravaabaroncy pryznali jaho palitviaźniem. Nu i hałoŭny pasył hetaj publikacyi nastupny: jaki jon palitviazień, kali sam siabie takim nie ličyć.

Kiraŭnik Biełaruskaj chryścijanskaj demakratyi Pavieł Sieviaryniec, jaki niekalki razoŭ zhadvajecca ŭ hetych videa, tak prakamientavaŭ dla «NN» źjaŭleńnie hetaha materyjała:

«Heta niaŭdałaja sproba KDB pieraklučyć uvahu z karanavirusa i katastrofy, da jakoj Łukašenka pryvioŭ Biełaruś. Typovaja pravakacyja. Mahčyma, mantaž. My ŭ lubym razie budziem patrabavać vyzvaleńnia Pilipa Šaŭrova. Pahavorym ź im paśla vyzvaleńnia, što tam było nasamreč».

Pravaabaroncy nie mianiajuć svajoj pazicyi pa spravie Šaŭrova. Adzin z kiraŭnikoŭ «Viasny» Valancin Stefanovič skazaŭ nastupnaje:

«Kali my pryznajom kahości palitviaźniem, to nie aceńvajem čałavieka ź jahonych asabistych ci dziełavych jakaściaŭ. Palitviazień — heta nie hanarovaje zvańnie i nie pierachodziačy vympieł. My aceńvajem dziejańni ŭładaŭ, kvalifikacyju taho, što zrabiŭ Šaŭroŭ.

Za šmathadovuju pravaabarončuju dziejnaść davodziłasia šmat što bačyć. Šaŭroŭ šmat čaho nahavaryŭ, ale ničoha nakont svajoj spravy. Jon daje acenki kankretnym asobam, ale heta prosta dumki ŭsłych, jakija nie majuć dačynieńnia da spravy. Nu nahavaryŭ — i nahavaryŭ. My nie sychodzim z taho, chto choča być palitviaźniem, a chto nie choča — Eduard Palčys taksama ŭ svoj čas nie chacieŭ być palitviaźniem.

My sychodzim nie z žadańniaŭ ludziej, a ź dziejańniaŭ ułady. Videa ni na što nie ŭpłyvaje ŭ dadzienaj spravie», — adznačaje Stefanovič.

Hladzi taksama: Pravaabaroncy: Pilip Šaŭroŭ — palitviazień

• 0
• 0
• 0
• 2
• 0
• 0
• 0
• 0