«Zvanki z hary». Eks-ministr suviazi raspavioŭ pra «dziŭnyja» razmovy z Uciurynym

U Viarchoŭnym sudzie praciahvajecca razhlad pa spravie, u jakoj fihurujuć były namieśnik dziaržsakratara Rady biaśpieki Andrej Uciuryn, eks-kiraŭnik «Biełtelekama» Siarhiej Sivadziedaŭ, kiraŭniki z bankaŭskaj śfiery i hrupa biznesmienaŭ. Ich abvinavačvajuć u davańni i atrymańni chabaraŭ u bujnych pamierach pry pastaŭkach abstalavańnia dla «Biełtelekama» i bankaŭ. U sieradu, 20 maja, dapytali ŭ jakaści śviedki Siarhieja Papkova, jaki ŭ 2014—2018 hadach byŭ ministram suviazi i infarmatyzacyi, a da hetaha ŭznačalvaŭ dziaržmanapoliju «Biełtelekam», piša tut.by.

Sudździu i prakurora cikavili ŭzajemaadnosiny Papkova z Uciurynym i Sivadziedavym, jakija byli ŭ 2014—2015 hadach. Havorka išła pra padziei, što papiaredničali konkursu na zakupku abstalavańnia Smart-Zala i pastaŭku abanienckich prystavak dla «Biełtelekama», jakija cikaviać sud.

Pa słovach eks-ministra, jaki ciapier źjaŭlajecca piensijanieram, Uciuryn telefanavaŭ jamu pa ŭradavaj suviazi dva razy. Sivadziedaŭ dapuskaje, što zvankoŭ mahło być bolš.

Zvanki Uciuryna pačalisia jašče tady, kali toj byŭ na papiaredniaj pasadzie — uznačalvaŭ Słužbu biaśpieki prezidenta Biełarusi.

Spačatku siłavik paviedamiŭ, što adna rasijskaja kampanija sumniavajecca ŭ abjektyŭnaści praviadzieńnia «Biełtelekamam» konkursu na zakupku abstalavańnia. Uciuryn prapanavaŭ Papkovu źviarnuć na heta ŭvahu. Toj, pa jaho słovach, adkazaŭ, što ministerstva nie moža ŭmiešvacca ŭ praviadzieńnie konkursu.

Ministr suviazi paśla «palemiki» z vysokapastaŭlenym siłavikom zaprasiŭ da siabie Sivadziedava i načalnika słužby biaśpieki «Biełtelekama» Andreja Naścina, raspavioŭ pra zvanok Uciuryna i «paprasiŭ padčas praviadzieńnia konkursu stroha vykonvać patrabavańni zakanadaŭstva».

Praz «2—3 miesiacy» Uciuryn znoŭ nabraŭ numar telefona tahačasnaha ministra. Sa słoŭ Papkova, toj, chto telefanavaŭ, kazaŭ ab zaciahvańni «Biełtelekamam» apłaty za pastaŭku abstalavańnia. Ministr suviazi spytaŭ pra heta Sivadziedava. Toj adkazaŭ, što ŭsio idzie zhodna z zaćvierdžanym hrafikam. Pra što Papkoŭ i prainfarmavaŭ Uciuryna. Pa słovach Sivadziedava, ministr da jaho źviarnuŭsia, tamu što nie chacieŭ, kab «jamu telefanavali z hary jašče raz».

Siarhiej Papkoŭ nie pamiataje, ci hučała nazva kampanii «Smartłabs» u razmovach z Uciurynym. Havorka išła «ab rasijskaj kampanii». Sivadziedaŭ śćviardžaje, što było zrazumieła, što heta kampanija «Smartłabs».

Padčas hetych zvankoŭ Andrej Uciuryn nie zahadvaŭ naŭprost prałabiravać intaresy «Smartłabsa» na konkursie, paćvierdziŭ u sudzie Siarhiej Papkoŭ.

Śviedka skazaŭ, što bolš jon da hetaj temy nie viartaŭsia.

— Nie pastupiła nivodnaj skarhi. Ni z boku ŭdzielnikaŭ [konkursu]. Ni z boku kantralujučych orhanaŭ — KDB, MARH. Heta značyć tendar adbyŭsia i adbyŭsia. [Niechta] pieramoh i pieramoh. «Biełtelekam» pravodzić sotni konkursaŭ. Kali zajmacca kožnym kantraktam, to tady nie treba bolš ničym inšym zajmacca — skazaŭ były ministr.

Prakuror pacikaviŭsia ŭ Siarhieja Papkova, ci nie ździviŭ jaho zvanok Uciuryna. Maŭlaŭ, z čaho heta raptam načalnik Słužby biaśpieki prezidenta cikavicca losam kamiercyjnaj struktury na tendary. «Ździviŭ», - adkazaŭ Papkoŭ. Jon pryznaŭ, što niepasredna padparadkoŭvaŭsia premjer-ministru, ale «ŭ toj situacyi nie mieŭ prava nie adreahavać na zvanok» kiraŭnika takoha vysokaha ŭzroŭniu, tamu paabiacaŭ razabracca. Papkoŭ u bytnaść hiendyrektaram «Biełtelekama» viedaŭ pra kuratarstva z boku Rady Biaśpieki i Słužby biaśpieki prezidenta, « atrymlivaŭ za podpisam Uciuryna dakumienty, źviazanyja z pytańniami biaśpieki achoŭnych abjektaŭ».

Padčas dopytu ŭ KDB Siarhiej Papkoŭ paviedamiŭ, što Uciuryn «spakojna, biez krykaŭ i maciukoŭ, psichałahična nacisnuŭ» na jaho. Jon skazaŭ, što ŭ vypadku «kali z konkursam budzie niešta nie tak, to dałožyć kiraŭniku dziaržavy».

Ministru suviazi było z-za čaho turbavacca. Andrej Uciuryn pieryjadyčna staviŭ pierad im dalikatnyja pytańni.

Adnojčy jon skinuŭ spasyłku na materyjał u «žoŭtaj presie», u jakim išła havorka pra katedž Papkova ŭ Ždanovičach, nibyta pabudavany «na niepracoŭnyja dachody». Ab tym, što Uciuryn zadavaŭ pytańni pra dom ministra, čuŭ i Sivadziedaŭ. Papkoŭ padčas dopytu ŭ sudzie nie vielmi achvotna kazaŭ na hetuju temu. Sa słoŭ eks-ministra vynikaje, što jon nie čytaje presu, katedža ŭ jaho niama, a «chto choča, chaj pažyvie ŭ katedžy».

Padčas inaŭhuracyi prezidenta ŭ 2015 hodzie Uciuryn padychodziŭ da Papkova i kazaŭ, što «znajomyja z Rasii narakajuć, što nibyta adzin z namieśnikaŭ ministra suviazi jeździŭ za košt «Bieł Chuavej Technoładžys» u adpačynak i atrymlivaŭ padarunki». Tamu składana kankuravać z hetaj kampanijaj na konkursach. U toj čas biełaruskaja «dačka» kitajskaj karparacyi časta pieramahała ŭ tendarach «Biełtelekama». Były siłavik śćviardžaje, što Papkoŭ stajaŭ u atačeńni troch svaich namieśnikaŭ i ŭsie heta vydatna čuli. Adnak jon nie moh uspomnić proźvišča čynoŭnika, ab jakim išła havorka. Siarhiej Papkoŭ praz 5 hadoŭ dapuskaje, što takaja «30-siekundnaja razmova» mahła być. Ale jon tady «nie źviarnuŭ uvahi» na heta, tamu što byŭ zasiarodžany «na vykanańni zadač pa supravadžeńni mierapryjemstva».

Nahadajem, 10 sakavika Viarchoŭny sud pačaŭ razhladać «spravu Uciuryna». Pasiadžeńnia prachodziać u pamiaškańni suda Maskoŭskaha rajona Minska. Tut raźmieščany adzin z samych vialikich załaŭ, jaki moža źmiaścić bolš za sotniu čałaviek. Padsudnych vinavaciać pa dvuch artykułach Kryminalnaha kodeksu: art. 430 (Atrymańnie chabaru) i art. 431 (Davańnie chabaru). Pavodle kryminalnaj spravy ŭ chabarnikaŭ kanfiskavana bolš za 1,65 młn dalaraŭ, 62 tysiačy jeŭra, bolš za 1 kiłahram zołata.

Kančatkovaja suma chabaru Andreja Uciuryna składaje 192 tysiačy dalaraŭ. A staršynia praŭleńnia AAT «Biełaruski mižbankavy raźlikovy centr» Fieliks Kaśpiarovič i namieśnik načalnika Hałoŭnaha ŭpraŭleńnia infarmacyjnych technałohij Nacyjanalnaha banka Andrej Padhorny abvinavačvajucca ŭ atrymańni chabaraŭ u ahulnaj sumie nie mienš za 868 750 dalaraŭ.

• 0
• 0
• 0
• 0
• 0
• 0
• 0
• 0