U Minsku 2500 čałaviek pryjšli, kab padać pratest Jarmošynaj
Kolkaść ludziej u čarzie pratestu da CVK dasiahnuła 2500, paviedamlaje karespandentka «Našaj Nivy». Paśla 19:00 pačalisia zatrymańni.
Čarha achvotnych padać skarhi na nierehistracyju Viktara Babaryki, parušeńni vybarčaha zakanadaŭstva i nieŭklučeńnie niezaležnych kandydataŭ u vybarčyja kamisii vyciahnułasia ad Doma ŭrada da praśpiekta Niezaležnaści i hatela «Minsk», a paśla — kala muzieja kino i vulicy Biersana da vulicy Miaśnikova ŭ bok Niamihi.
Apytanka
Ludzi stajać spakojna i mirna, moŭčki demanstrujuć svaju pazicyju.
A 17-j hadzinie da čarhi majuć dałučycca jurysty štaba Viktara Babaryki.
Videa anłajn:
A voś jak usio raźvivałasia:
A 13-j pad Domam urada sabralisia 60 čałaviek. Kala 15.00 było ŭžo 200 čałaviek.
«My padyšli ŭ 10:30. U čarzie ŭžo stajała 20 čałaviek», — raskazvajuć mužčyny, jakija ciapier čakajuć kala samaha ŭvachoda.
U čarzie stajać maładyja mužčyny. Dźmitryj i Jaŭhien — ułaśniki biznesu. Padčas abiedziennaha pierapynku jany dałučylisia da achvotnych abskardzić admovu Babaryku. Tłumačać, što pryjšli siudy, bo kirujucca płanam, ahučanym štabam, i buduć sprabavać adstojvać svajho kandydata ŭ ramkach zakona.
Jana — inžynier kanstruktar studyi «Zrobim». Dziaŭčyna pakidała podpisy ŭ padtrymku Babaryki i Capkały, a ciapier aburana dziejańniami CVK. U zajavie jana prosić pierahledzieć rašeńnie kamisii i źmianić mieru strymańnia, abranuju dla Viktara Dźmitryjeviča.
«Padpisvałasia za hetych ludziej, bo liču, što ŭ ich dastatkovy kiraŭničy vopyt, kab uznačalić krainu. I kali Babaryku zatrymali, ja tolki bolš pierakanałasia, što mieła racyju, kali patrymlivała jaho».
Nie ŭsie, kaniečnie, vierać, što CVK usprymie ich zajavy ŭsurjoz.
«Abaviazkova prydziarucca, što niešta nie tak aformlena», — pierahavorvajucca dziaŭčaty.
Pakul čakajuć, abmiarkoŭvajuć vybary.
«Na maim učastku — usie ź Biełtelekama, — dzielicca mužčyna. — Tolki čatyry čałavieki vyłučalisia ad kalektyvu, astatnija — ad partyi, ad hramadzian».
Čarha pakrysie ruchajecca. Na čałavieka ŭ budynku CVK — 3-5 chvilin. Prachodziać dahlad, addajuć zajavu i rehistrujuć jaje numar.
Dźmitryj ź Minskaha rajona. Padavać skarhu pryjechaŭ usiej siamjoj — z žonkaj i tryma dziećmi. Jon byŭ u inicyjatyŭnaj hrupie Viktara Babaryki. Sabraŭ u jaho padtrymku 1200 podpisaŭ. Kaža, u ich kamandzie heta daloka nie rekord.
«Čamu siońnia tut? Ja vieru, što CVK skarhu nie razhledzić. Ale ja vieru i ŭ toje, što našy dziejańni zakonnyja — luby hramadzianin, nie bajučysia, moža pryjści siudy i zrabić choć štości. I heta maje značeńnie. Bo pytańnie ŭłady budzie vyrašacca na vulicy, i treba pryvykać da hetaha».
Dźmitryj — susied Babaryki. Tłumačyć, čamu za jaho:
«Jon prahmatyk, blizki da kultury. Heta žyvy čałaviek».
«A možna ja jašče dadam? — dałučajecca susied pa čarzie. — Narešcie my ŭbačyli intelihientnaha čałavieka, jaki ŭmieje razmaŭlać z narodam».
Milicyja nie daje čarzie vystrojvacca ŭzdoŭž praśpiekta. Jak tolki ludzi dajšli da haścinicy «Minsk», ich raźviarnuli ŭ dvary.
Łancuh ludziej pastupova akružaje płošču pa ŭsim pierymietry. Pa stanie na 16.00 kala 400 čałaviek sa skarhami čakaje aŭdyjencyi ŭ CVK.
La Čyrvonaha kaścioła pakazaŭsia Siarhiej Čeračań. Alo jen pryšoŭ nie abskardžvać rašeńnie pa Bybyryku, a padavać dakumienty na praviadzieńnie masavych mierapryjemstvaŭ.
«Ludzi nie siadziać doma, kanapnyja krytyki ŭstali i vyjšli na vulicu», — uściešany jon tym, što haradžanie vykazvajuć svaju pazicyju.
Čeračań zaklikaje ŭsich pryjści 9 žniŭnia na vybary i prahałasavać za kandydata, jaki padabajecca.
Štab Babaryki padaŭ skarhu. Na vychadzie z CVK Maryja Kaleśnikava paviedamiła, što ź imi razmaŭlali vielmi vietliva, čamu jany ŭdziačny.
Advakat Illa Salej dadaŭ, što advakat Maksim Znak pajechaŭ u Viarchoŭny sud abskardžvać rašeńnie. Natoŭp sustreŭ pradstaŭnikoŭ štaba apładysmientami.
«U nas jość heta prava, i my pavinny adstojvać svajo prava hetym pravam skarystacca», — kaža Maryja Kaleśnikava.
Aŭtamabili sihnalać u znak padtrymki. Mužčyna hadoŭ saraka prynios z kramy vadu i razdaje ludziam.
Čarha dasiahnuła Muzyčnaha teatra na płoščy Bahuševiča. Jana idzie pa płoščy Niezaležnaści praz hatel «Minsk», vulicy Biersana i Miaśnikova.
Reparcior NN naličyła kala tysiačy čałaviek.
U 17.30 ludźmi zaniata ŭžo ŭsia placoŭka pierad Akademičnym muzyčnym teatram.
Ludzi stajać i nie razychodziacca, niahledziačy na toje, što mnohija ź ich užo nie majuć siońnia šancaŭ padać skarhu.
Čarhoj kiruje milicyja. Zavaročvajuć jaje źmiejkaj u dvary, kab haradžanie nie vystrojvalisia ŭzdoŭž centralnych vulic.
Niekalki ludziej u čarzie pryjšli z noŭtbukami — kab padčas stajańnia nie adryvacca ad svajoj dystancyjnaj pracy.
Tym časam Lidzija Jarmošyna abvinavaciła štaby Babaryki i Capkały ŭ arhanizacyi masavych pratestaŭ.
Vulicu Miaśnikova pierakryli z boku płoščy Miaśnikova.
A 18-j milicyja stała prasić ludziej la muzyčnaha teatra razyścisia. «Pavažanyja hramadzianie, CVK u 19 hadzin zakančvaje svaju pracu. Svaje zajavy vy možacie padać u elektronnym vyhladzie», — viaščaŭ supracoŭnik u miehafon.
Na vulicu Miaśnikova padahnali aŭtazaki.
Padjechała taksama mašyna z supracoŭnikami ŭnutranych słužbaŭ.
Niahledziačy na toje, što CVK užo skončyła svaju pracu, ludzi praciahvajuć stajać u čarzie.
2 aŭtazaki i sałdaty ŭnutranych vojskaŭ stajać kala CVK, ludzi pastupova pačali razychodzicca.
Hałoŭpaštamt, da jakoha źbiralisia iści niekatoryja ludzi, kab adpravić skarhu ŭ CVK, pačali zakryvać.
Paśla 19:00 pačalisia pieršyja zatrymańni. Ludziej adciskajuć ź placoŭki pierad teatram pa vulicy Miaśnikova.
Začyniajuć i stancyi mietro «Płošča Pieramohi», «Kupałaŭskaja» i «Kastryčnickaja».
Vulica Miaśnikova pierakrytaja ŭnutranymi vojskami.
Praśpiekt Niezaležnaści pierakryvajuć ad skryžavańnia z vulicaj Surhanava.
Na płoščy Niezaležnaści pierad Čyrvonym kaściołam čarhu taksama razahnali.
Prysutničaje kiraŭnik minskaha AMAPa Dźmitryj Bałaba.
Pa racyi siłaviki pieradajuć: «Kali chtości nie razumieje, zatrymlivajem adrazu».
Na skryžavańni Lenina i Niezaležnaści 2 mašyny DAI zabłakavali Reno z BČB na dachu i lusterku.
Kiroŭca Siarhiej kaža: «Heta moj ściah, a dla supracoŭnikaŭ — heta «nieŭstanoŭleny pradmiet». Čakaju pratakoła».
Kruhłasutačnaje paštovaje adździaleńnie na čyhunačnym vakzale zakryłasia, tamu što «zaminiravana».
Zatrymali karespandenta «Radyjo Svaboda» Antona Trafimoviča.
Na płoščy Niezaležnaści typovaja dla ciapierašniaj Biełarusi karcina: zastalisia tolki žurnalisty, AMAP i aŭtazaki.
Pravaabaroncy paviedamlajuć pra 6 zatrymanych u Minsku.
Taksama paviedamlajuć pra 15 zatrymanych u Barysavie.
Kamientary