Biełaruska narakaje, što siem hadoŭ nie moža znajści pastajannuju pracu. A ŭ emihracyi stała jašče składaniej
Volzie Sufranovič 28 hadoŭ. U Minsku dziaŭčyna sprabavała pracavać kasirkaj, administratarkaj i niańkaj, ale zatrymlivałasia tolki na niekalki miesiacaŭ. U emihracyi z pracaj stała jašče składaniej. Volha raskazała, dzie sprabavała siabie, na što žyvie i jak asiarodździe stavicca da jaje prablemy.
«Biesić chadzić na sumoŭi, kamuści niešta dakazvać»
Dziaŭčyna skončyła ŭ 2018-m fakultet fiłasofii i sacyjalnych navuk BDU, vučyłasia na śpiecyjalnaści «sacyjalnaja kamunikacyja». Z taho času jana nie moža znajści dla siabie pastajannuju pracu. Tłumačyć heta prablemami ź mientalnym zdaroŭjem — Volha zmahajecca z depresijaj i tryvožnaściu.
«Miarkuju, što na depresiju pakutuju jašče z kanca škoły, i jana ŭpłyvała na ŭsio majo žyćcio. Navat nie stolki niama žadańnia ahułam pracavać, kolki biesić chadzić na sumoŭi, kamuści niešta dakazvać», — raskazvaje jana.
U Minsku dziaŭčyna praz paŭhoda paśla vypusku z univiersiteta ŭładkavałasia kasirkaj u kramie, zmahła pratrymacca tam paru miesiacaŭ. Potym pajšła administratarkaj u muzyčnuju škołu.
«Zvalnieńnie niaprosta było pieražyvać, adrazu byli dumki, što ja niejkaja nie takaja, što ŭsio drenna. Hladziš na inšych ludziej u sacsietkach, jany niedzie pracujuć, a ja jak upała ŭ niejkuju jamu, u zasmučeńnie, tak adtul nie mahła vybracca. Paśla hetaha ja niedzie hod nidzie nie pracavała».
Uvieś hety čas zarablaŭ muž Volhi (jany razam z 2018-ha), jon pracavaŭ trenieram pa navučańni piersanału. Hrošaj na žyćcio im chapała, bo žyli va ŭłasnaj kvatery, jakaja dastałasia dziaŭčynie ad baćkoŭ.
«Potym, jašče da 2020-ha, ja troški padzarablała niańkaj u znajomaj, dva-try razy na tydzień, — kaža jana. — Užo pracavała ź psichołaham, pryjšła da taho, što treba šukać pracu pa śpiecyjalnaści, ale zdaryŭsia kavid, było nie da pošuku. Muž praciahvaŭ pracavać, jaho tady jašče pieraviali na dystancyjonku. Hrošaj nam chapała, usio było akiej, ja navat chadziła na zaniatki vakałam i fartepijana».
Za pracu ŭ «Biedroncy» — kala 1000 dalaraŭ
Paśla vybaraŭ-2020 Volha pajšła vałancioryć u pravaabarončy siektar. Uletku 2021 hoda dziaŭčynie pryjšłosia źjechać z krainy z-za palityčnaha pieraśledu. Jana pajechała ŭ Kijeŭ, praź niekatory čas da jaje pierabraŭsia i muž (jon jašče da pierajezdu znajšoŭ sabie pracu va Ukrainie).
«U Kijevie ja zapisałasia na pravaabarončy kurs, ale jon nie adbyŭsia z-za pačatku vajny. My pierajechali ŭ Varšavu.
Muž zhubiŭ pracu, a na novym miescy doŭha nie mahli pracavać, bo nie było dakumientaŭ. Ale pakolki ja była vałanciorkaj, to atrymała finansavuju padtrymku na hety pieryjad. Taksama, kali muž jechaŭ u Kijeŭ da mianie, ja paprasiła ŭ adnaho našaha siabra pazyčyć 2 tysiačy dalaraŭ, prosta na ŭsialaki vypadak. Bo ja pryjechała tady z 700 dalarami na rukach, nie było paduški biaśpieki. Hetyja hrošy nam spatrebilisia ŭ Polščy, kab źniać kvateru i dać zadatak», — raskazvaje dziaŭčyna.
Praz čatyry miesiacy žyćcia ŭ Polščy para atrymała mižnarodnuju abaronu. Muž Volhi ŭładkavaŭsia ŭ polskuju sietku praduktovych kram «Biadronka». Jon pratrymaŭsia tam paŭtara hoda. Tudy pajšła i Volha ŭ pačatku 2023-ha, ale adpracavała ŭsiaho 2 miesiacy.
«Heta była nievynosnaja praca, — kaža Volha. — Kali va Ukrainie nie było asablivaha moŭnaha barjera, to ŭ Polščy jon macniejšy. U mianie pryjšło razumieńnie, što ja nie adpaviadaju ŭvohule hetaj pracy ni pa jakich standartach. Pracavała pavolniej, čym astatnija, mianie ŭvieś čas padhaniali, i naohuł u niejki momant heta ŭsio zaviaršyłasia isterykaj, paśla jakoj mianie pasadzili tolki za kasu. Choć u «Biadroncy» niama padziełu na kasiraŭ i inšych pracaŭnikoŭ.
Taksama tam byŭ vielmi maleńki pierapynak na abied: 15 chvilin za 8-hadzinny pracoŭny dzień. Zarobak krychu vyšejšy za minimalny pa Polščy — 4 tysiačy złotych (kala 1000 dalaraŭ — NN). Kali ŭdvaich pracavać, to 2000 dalaraŭ całkam dastatkova na žyćcio».
Paśla zvalnieńnia z «Biadronki» Volzie padviarnułasia praca ŭ pravaabarončym siektary. Jana chacieła raźvivacca ŭ hetaj śfiery.
«Hetaja praca była ŭžo našmat spakajniejšaja, z domu, nie treba było nikudy chadzić. Ale i jana doŭha nie praciahnułasia, u arhanizacyi pačalisia skaračeńni. Adpracavała tam try miesiacy — z sakavika pa kaniec maja 2023-ha.
Uvosień trapiła na stažyroŭku ŭ adnu z NDA, tam stała zajmacca SMM. Paśla stažyroŭki pakinuli tam pracavać jašče na dva miesiacy, a potym znoŭ nie skłałasia, zvolnili.
Paśla SMM u mianie było jašče niekalki roznych prajektaŭ u hramadzianskim siektary, i adzin ź ich usio jašče praciahvajecca», — raskazvaje jana.
«Sama siabie vielmi mocna vinavaciła za toje, što nie mahu čamuści pajści na pracu»
Volha adznačaje, što ažyvicca joj dapamahła terapija ź psichołaham, jakuju jana pačała ź viasny 2023-ha. Jana stała adčuvać siabie bolš upeŭnienaj i pierastała bajacca mnohich rečaŭ, źviazanych z emihracyjaj.
Pacikavalisia ŭ Volhi, jak asiarodździe stavicca da taho, što jana nie pracuje, ci sutykałasia dziaŭčyna z chejtam.
Jana kaža, što ad baćkoŭ asudžeńnia nie čuła, inšyja, jak praviła, taksama nie havorać takoha ŭ tvar.
«Niejak byŭ adzin momant. My siadzieli ŭ kampanii našych siabroŭ, i mnie prylacieła ŭ paryvie niejkaj sprečki, što mahła b znajści pracu i dapamahać mužu. Heta mianie, viadoma, vielmi začapiła, tamu što nijaki čałaviek nie moža viedać, z čym ty sutykaješsia, jak žyvieš.
Muž da hetaha stavicca narmalna, bo jon u kursie ŭsiaho, što sa mnoj adbyvajecca. Jon heta niejak prymaje. Moža być, nie zusim na sto adsotkaŭ.
Byli časy, kali było zusim składana z hrašyma, a ja nie pracuju, i pry hetym u mianie vielmi kiepski stan. Mnie taksama było ad hetaha drenna, sama siabie vielmi mocna vinavaciła za toje, što nie mahu čamuści pajści na pracu. Zaŭsiody razumieła, što mnie treba niešta zrabić spačatku sa svaim stanam, a potym užo šukać pracu, dumać, čym chaču zajmacca», — tłumačyć Volha.
Ciapier dziaŭčyna spadziajecca znajści pracu ŭ hramadskim siektary.
Kamientary