«Złačynny zahad, nie złačynny… My — ludzi vajennyja». Zakryty vystup ministra abarony pierad aficerami

19 žniŭnia ŭ Centralnym domie aficeraŭ adbyłasia sustreča ministra abarony Viktara Chrenina z kiraŭnikami strukturnych padraździaleńniaŭ Minabarony, Hienštaba i Uzbrojenych sił. 

Ministr vystupaŭ krychu bolš za hadzinu, sens i nahoda sustrečy — infarmavańnie kirujučych aficeraŭ pra situacyju ŭ krainie. Prysutnyja pieradali ŭ Redakcyju «Našaj Nivy» aŭdyjazapis z sustrečy.

Pavialičyć

Razmova składałasia ź dźviuch umoŭnych častak: u pieršaj Chrenin pierakazvaŭ tezisy vystupleńnia Łukašenki pierad parłamientam i na mitynhu ŭ svaju padtrymku, a ŭ druhoj častcy havaryŭ ad siabie. 

Pryvodzim vytrymki jahonych słovaŭ z «pieršaj» častki:

— Hramadzianie krainy bolšaściu hałasoŭ padtrymali Łukašenku na vybarach, ale ciaham troch načej, z 9 pa 12 žniŭnia, prymalisia siłavyja sproby zachopu ŭłady, jany kaardynavalisia z-za miažy. Arhanizavanyja hrupy, uzbrojenyja nažami, prutami, kaktejlami Mołatava i fiejervierkami ŭstupili ŭ siłavoje supraćstajańnie. Destruktyŭnyja ŚMI pradstaŭlali heta jak siłavy razhon mirnych pratestaŭ, demanizujučy pravaachoŭnikaŭ.

— Z 12 žniŭnia destruktyŭnyja siły pryjšli da novaj taktyki: tyražavańnie zajavaŭ ab niepryznańni vynikaŭ vybaraŭ, farmiravańnie hetak zvanych «łancuhoŭ salidarnaści» ŭzdoŭž daroh, u asnoŭnym ź dziaŭčat i žančyn, jakija nibyta vystupajuć suprać užyvańnia siły da ŭdzielnikaŭ pratestaŭ, arhanizacyju ahulnarespublikanskaj zabastoŭki na pradpryjemstvach, zaklikali da pierakryćcia vulic, pačali infarmacyjna-psichałahičny cisk na rabotnikaŭ siłavych struktur i členaŭ vybarčych kamisij. 

— Dla farmiravańnia mierkavańnia mižnarodnaj supolnaści ab falsifikacyi vybaraŭ destruktyŭnyja ŚMI aktyŭna tyražujuć asobnych, pieradusim zachodnich palitykaŭ, siarod jakich tradycyjna prysutničajuć pradstaŭniki ZŠA, Polščy, Litvy. Analiz pakazvaje, što vyniki vybaraŭ aśviatlajucca ŭ niehatyŭnym kantekście.

— Niahledziačy na pravakacyi vorahaŭ dziaržavy ŭnutry respubliki, a taksama mahutny źniešni ŭpłyŭ, značnyja słai nie tolki našaj krainy, a taksama nasielnictva Ukrainy, padtrymlivajuć dziejańni prezidenta Biełarusi: pa vynikach apytańnia ŭkrainskaha telekanała (nierazborliva) u jutubie, siarod 455 tysiač padpisantaŭ padtrymali Łukašenku 91% udzielnikaŭ. Heta kaža, što šarahovyja žychary, jakija sutyknulisia z vajnoj na Danbasie, razumiejuć, da čaho mohuć pryvieści pratesty.

— Adbyvajecca vidavočnaje skažeńnie rečaisnaści, apazicyjnyja ŚMI štučna zavyšajuć kolkaść udzielnikaŭ mitynhaŭ, ale ŭtojvajecca, što heta mizierny pracent elektaratu ŭ nasielenych punktach. U pryvatnaści, apazicyjnyja ŚMI zajaŭlajuć, što nibyta la Steły sabralisia kala 200 tysiač čałaviek, a ahułam pa krainie kala paŭmiljona. Davajcie raźbiaremsia. Analiz zdymkaŭ vajenna-kaśmičnych sił Rasii pakazvaje, što ŭ samy pik zboru ahulnaja kolkaść była nie bolš za 40 tysiač čałaviek. Heta nie bolš za 2% ad žycharoŭ stalicy. I takaja karcina pa ŭsich haradach. 

— Udzielniki šeściaŭ — heta aktyŭnaja absalutnaja mienšaść. Heta tyja samyja 10-12%, jakija prahałasavali za Cichanoŭskuju.

— Prahrama apazicyi: da kanca hoda vychad z SND, JEAES, sajuznaj dziaržavy. Zabarona viaščańnia rasijskaha TB, zamiaščeńnie viaščańniem Litvy, Łatvii, Ukrainy. Vychad z ADKB. Aŭtakiefalija biełaruskaj pravasłaŭnaj carkvy, pieravod sistemy adukacyi na ŭsich uzroŭniach na biełaruskuju movu.

Paśla pierakazvańnia tezisaŭ dziaržaŭnaj prapahandy Chrenin adyšoŭ ad zavučanych fraz i pačaŭ kazać ad svajho imia. Hetaja častka vyhladaje bolš cikavaj i nasyčanaj razvahami, pakazvaje, da čaho rychtujuć vajskoŭcaŭ.

— My, vajennyja ludzi, abaviazany pravilna aceńvać abstanoŭku. Prostaj movaj tłumačyć padnačalenym, što adbyvajecca ŭ respublicy, sapraŭdnyja mety kampanii, jakaja razharnułasia suprać krainy.

Siońnia važna nie dapuścić naradžeńnia sumnievaŭ. Vyniki hetaj raboty treba razhladać jak najvažniejšy kryteryj acenki prafiesijnaj kampietentnaści adkaznych asob pa realizacyi dziaržaŭnaj palityki.

— Vajna pryjšła da nas u dom. Usia kraina ŭ epicentry. Tyja, chto prydumaŭ kalarovyja revalucyi, zrabili vysnovy ź Pieršaj i z Druhoj suśvietnaj vojnaŭ, što takimi masavymi armijami nie vielmi paśpiachova atrymlivajecca dasiahać metaŭ. Tady metu chacieli dasiahnuć mahutnaj armijaj, moram kryvi — nie dasiahnuli. Naš narod vystajaŭ, my śviatkujem 75-hodździe pieramohi. Ale tyja palittechnołahi, čornyja hałovy, jany nie admovilisia ad metaŭ. Adrazu paśla zakančeńnia vajny jany ŭžo zadumalisia, jak źniščać nas, ale pakrysie, biez kryvi.

— Tyja sankcyi, jakimi pahražajuć… Dy my vyžyviem, vuń, pahladzicie, jaki ŭradžaj źbirajuć našy chlebaroby, heta dazvolić nam nie haładać. Chleb budzie, małako, miasa, nie treba nam zahraničnyja hetyja ŭsie prybambasy. Pradpryjemstvy pracujuć, techniku robim, usio, što nieabchodna dla narmalnaha žyćcia. 

— U nas u kožnaha jość pratestny patencyjał. Staić kanapa doma, praz dva hady — aj, treba pierastavić u inšy kut. Heta pratestny patencyjał, palittechnołahi heta razumiejuć.

— Rychtujucca bajeviki na terytoryi Ukrainy, idzie zbor hramadzian.

— Tyja ludzi, jakija sychodziać ad nas, ich niašmat. Pierafarbavalisia chutka, pačynajuć nas brudam palivać. Tyja palittechnołahi, što pišuć teksty Cichanoŭskaj, staviać pytańnie: armija, vy z narodam ci budziecie vy stralać suprać naroda? Nas zaklikajuć, u tym liku i Cichanoŭskaja, jakaja kaža: nie vykonvajcie złačynnyja zahady. Hetaja žančyna nas zaklikaje da zdrady, parušeńnia zakona — nie vykonvać zahady. Złačynny jon, nie złačynny… — my ludzi vajennyja. Dziaržaŭnaja sistema nie razvalenaja, pracuje, prezident vybrany. 

— Pakul vojska nie piarojdzie na bok pratestoŭcaŭ, dziaržavu razvalić niemahčyma. Usia nadzieja na nas z vami. My nie demaralizavanyja. 

Treba zmahacca, kali treba — i sa zbrojaj. Za krainu, za siabie, za našy siemji, za tych nastaŭnic, jakija napałochanyja i bajacca. 

— Pahrozy pajšli niekatorym aficeram. Adbyŭsia vypadak u vajenna-pavietranych siłach, zabyŭsia proźvišča, nu, niavažna. Na zborach pryjšoŭ: «Nie chaču słužyć, zvalniajcie mianie». Pačaŭsia hety verchał, jak jaho žoncy pryjšła SMS-ka na telefon (nierazboliva). Jon pryjšoŭ i zabraŭ rapart. Ja skazaŭ: takim aficeram vydać pistalet. Ja nikoli nie dumaŭ, što da takoha dojdzie, što budziem chadzić sa zbrojaj u rukach. I bolšaść ludziej napałochanaja, nadzieja tolki na nas — budziem abaraniać.

— Ja kazaŭ kamandziram, ja aceńvaju tak: jość statuty, napisanyja kryvioju. Jość tam abaviazki časavoha, siońnia armija — heta časavy. I voś tam napisany paradak prymianieńnia zbroi. Časavy pry źjaŭleńni parušalnika abaviazany padać kamandu: «Stoj, chto idzie?». My jaje padali, my bačym, chto idzie. U statucie dalej napisana, što kali parušalnik i dalej praciahvaje ruch, časavy abaviazany dać kamandu: «Stoj, stralać budu!». Praktyčna my ŭžo padajem hetuju kamandu, kab spynić dalejšy ruch parušalnika. Ale navat kali paśla hetaha parušalnik praciahvaje ruch, časavy abaviazany zrabić papiaredžvalny streł uvierch. Kab my nie zrabili streł na paražeńnie, ale kali budzie praciahvać dalej, to my jaho zrobim…

I ŭ vypadku vykańnia ŭsich kamand časavoha, abo kali jamu pahražaje niebiaśpieka, jon abaviazany vykarystać zbroju na paražeńnie.

Žudasna nie chočacca hetaha rabić, ale heta abaviazak časavoha, heta abaviazak nas z vami — armii. Moža, niekatoryja hetaha chočuć, kab potym nas, mianie, abvinavacić u hienacydzie suprać ułasnaha naroda, tamu što kali ŭžyvajecca zbroja, hinuć mirnyja ludzi. 

Tak, heta ŭsio zrazumieła, tak, my, mahčyma, uvojdziem u hramadzianskuju vajnu, cana čałaviečaha žyćcia hublaje canu z kožnym dniom. Heta žudasna. Nie vyklučana, što moža być i vajenny kanflikt, na siońnia heta ŭžo realnaść. 

Naša zadača — nie dapuścić, zadača nie dapuścić strełu ŭvierch.

[Tym, chto sumniajecca], lepš syści ciapier, na kamandzie «stoj, stralać budu». A sychodzić na fonie padačy nastupnych kamand — voś heta budzie zdrada, heta samy strašny čałaviečy parok. Kali ty hladziš u vočy, vieryš, a atrymlivaješ udar u śpinu.

• 3
• 0
• 0
• 0
• 0
• 0
• 1
• 0