U miežach prajektu «Tuzin. Pierazahruzka» internet‑partału «Tuzin Hitoŭ» i hramadzkaj kampanii «Budźma biełarusami» biare ŭdzieł hurt «Stoks».
Jany pieraśpiavajuć pa‑biełarusku adzin z svaich hałoŭnych hitoŭ «Pod kupołom niebies».
 |
Muzyki, jakija ciapier žyvuć u Maskvie, kažuć: «Kali naša pieśnia budzie cikavaj peŭnaj prasłojcy hramadztva ŭ takim varyjancie, to čamu i nie. Biełaruskaja mova isnuje i my adčuvajem siabie biełarusami».
Hurt «Stoks» isnuje ŭžo 13 hadoŭ i ŭvieś čas pierajazdžaje z horadu ŭ horad. Utvaryłasia kamanda ŭ Navapołacku, potym pierajechała ŭ Miensk, debiutny albom vydała ŭ Niamieččynie, ciapieraka poŭnym składam žyvie i pracuje ŭ Rasiei.
U pieršy hod svajho isnavańnia tady jašče anhielskamoŭnyja «stoksy» atrymali dobry avans — pryz za «Najlepšy debiut hodu» na «Rok‑Karanacyi‑96». Ich debiutny albom No Escape (1999) padmacavaŭ pośpiech. Dysk byŭ spradusavany hitarystam Viktaram Smolskim z hurta Rage i vyjšaŭ u Niamieččynie.
Potym hurt vyrašyŭ zaśpiavać pa‑rasiejsku i zapisaŭ pieśniu, jakaja napraŭdu hučała peŭny čas z kožnaha prasa — «Mieždu Minskom i Rimom».
U 2006 hodzie jany ŭziali hran‑pry na rasiejskim konkursie «Rok‑dom» i padpisali kantrakt z Alaksandram Kucikavym, muzykam hurta «Mašina vriemieni», kiraŭnikom łejbłu Sintez Records, jaki staŭ pradusaram biełaruskaj kamandy. Muzyki aktyŭna ŭvajšli ŭ rasiejskuju muzyčnuju prastoru, hrali na «Musicfest 2006» u Łužnikach, feście «Dvižienije» ŭ Samary dy inšych bujnych oŭpen‑ejrach. Razam ź «Lapisam Trubiackim» i «Bi‑2» byli chedłajnerami biełaruskaha festu «Rok za Babroŭ».
Letaś «Stoks» zapisali svoj druhi numarny albom «Nie zamierzaj», jaki trapiŭ u top‑10 relizaŭ hodu pa versii Experty.by, a ciapier pracujuć nad novaj prahramaj. U miežach prajektu «Pierazahruzka» muzyki pieraśpiavajuć adzin sa svaich hałoŭnych hitoŭ «Pod kupołom niebies».
Muzyki pryznajucca, što zaŭždy stanoŭča stavilisia da biełaruskaj movy, klavišnik kamandy Kirył Parfionaŭ koliś uvachodziŭ u skład lehiendy biełaruskaha roku — hurta «Miascovy čas», ale ŭłasna «Stoks» tolki adnojčy śpiavali pa‑biełarusku — u prajekcie «Pieśniarok» (1997) jany vykonvali pieśniu «Ružy ćviet».
«Kali našaja pieśnia budzie cikavaja peŭnaj prasłojcy hramadztva ŭ takim varyjancie, to čamu i nie. Biełaruskaja mova isnuje i my adčuvajem siabie biełarusami», — kaža Alaksiej Stoks, jaki ciapier žyvie pamiž Maskvoj i Navapołackam, dzie dahetul znachodzicca jaho siamja. Za pieraasensavańnie pieśni «Pod kupołom niebies» uziaŭsia paet Hleb Łabadzienka.
Nastupny ŭdzielnik prajektu «Pierazahruzka» budzie pradstaŭleny 7 traŭnia.
