30 vieraśnia sud Pieršamajskaha rajona Viciebska pryznaŭ Taćcianu i Kanstancina Sieviaryncaŭ vinavatymi ŭ parušeńni zakanadaŭstva ab masavych mierapryjemstvach (art. 23.34 KaAP), paviedamlaje «Radyjo Svaboda» sa spasyłkaj na «Viciebskuju viasnu».
Sudździa Michaił Jurčanka rascaniŭ machańnie bieł-čyrvona-biełym ściaham z łodžyi jak niesankcyjanavanaje pikietavańnie i pryniaŭ rašeńnie aštrafavać Taćcianu Sieviaryniec na 25 bazavych vieličyń (675 rubloŭ), a jaje mužu Kanstancinu vynies papiaredžańnie, bo dla jaho heta była pieršaja za hod administracyjnaja sprava.
30 žniŭnia Taćciana i Kanstancin Sieviaryncy razam z błohierkaj Alenaj Januškoŭskaj z łodžyi svajoj kvatery na 8-m paviersie vitali bieł-čyrvona-biełym ściaham kałonu ŭdzielnikaŭ akcyi salidarnaści, jakaja išła pa praśpiekcie Budaŭnikoŭ.
Zhodna z pratakołam, Taćciana Sieviaryniec «znachodziłasia ŭ hramadskim miescy — na łodžyi ŭ svajoj kvatery — i na vačach u inšych hramadzian brała aktyŭny ŭdzieł u pikietavańni: vykazvała hramadska-palityčnyja intaresy z vykarystańniem bieł-čyrvona-biełaha pałotnišča, źviartała na siabie ŭvahu minakoŭ, demanstravała žesty rukami».
Sudździa Michaił Jurčanka zapytaŭ, ci źviartałasia aktyvistka ŭ administracyju pa dazvoł na praviadzieńnie masavaha mierapryjemstva, čym vyklikaŭ śmiech u zale.
«Jak heta zrazumieć? Što hramadskaje miesca — heta maja kvatera? Ja musiła biehčy ŭ administracyju Pieršamajskaha rajona i prasić dazvołu vyjści na łodžyju? Jakoje moža być pikietavańnie va ŭłasnaj kvatery?» — z abureńniem pytałasia aktyvistka.
Aktyvistku i błohierku Alenu Januškoŭskuju za «pikiet na łodžyi» ŭžo pakarali štrafam u 945 rubloŭ niekalki tydniaŭ tamu.
Ciapier čytajuć
Biełaruska narakaje, što siem hadoŭ nie moža znajści pastajannuju pracu. A ŭ emihracyi stała jašče składaniej11
Kamientary