Pavieł Łatuška zajaviŭ pra stvareńnie Nacyjanalnaha antykryzisnaha kiravańnia
Eks-dyrektar Kupałaŭskaha teatra, siabra Prezidyuma Kaardynacyjnaj rady Pavieł Łatuška razam z pradstaŭnikami demakratyčnych palityčnych sił Biełarusi abviaściŭ pra stvareńnie Narodnaha antykryzisnaha kiravańnia (NAK).
Jak patłumačyŭ u svaim videazvarocie Łatuška, u toj čas jak Kaardynacyjnaja rada stvorana dla praviadzieńnia pieramovaŭ, NAK budzie orhanam, jaki zabiaśpiečvaje dasiahnieńnie metaŭ — pačatku pieramovaŭ i stabilnaści ŭ krainie ŭ momant pierachodu ŭłady da demakratyčnych sił. Orhan taksama budzie vyrašać zadačy, jakija stajać pierad krainaj z momantu sychodu eks-prezidenta da novych vybaraŭ i pierachodu ŭłady da novaha ŭrada.
— Usie, chto pracavaŭ u štabach kandydataŭ u prezidenty, chto dapamahaŭ u jakaści vałancioraŭ, usie, chto vychodzić kožny tydzień na vulicy Biełarusi, usie, chto dałučyŭsia da strajkaŭ, usie, chto pierastaŭ vykonvać zahady abo zvolniŭsia, usie, chto paciarpieŭ za svaju pazicyju, trapiŭ u SIZA, na «sutki», pazbaviŭsia biznesu, pracy — my ŭsio zrabili ŭ hetym hodzie zdavałasia b niemahčymaje. Nastaŭ čas ruchacca dalej. Ułada čarhovym razam praihnaravała patrabavańni naroda vyzvalić palitviaźniaŭ, spynić hvałt, pakarać vinavatych, pryznačyć novyja vybary. Na vulicach znoŭ stralba i vybuchi, paranienyja mirnyja demanstranty, sotni zatrymanych — heta adkaz na prapanovu dyjałohu pa-za miežami SIZA, — zajaviŭ Łatuška.
Jon dadaŭ, što biełaruskija ŭłady — bankruty, i biełarusy sami viedajuć, jak vyjści z palityčnaha i ekanamičnaha kryzisu i pravavoha defołtu, tamu pryniata rašeńnie stvaryć Narodnaje antykryzisnaje kiravańnie.
— Biełarusam patrebnyja dziejańni pa vychadu z kryzisu. Naša kamanda ŭ dapamohu štabu nacyjanalnaha lidara i KR vystupaje z kankretnymi prapanovami: jak likvidavać pryčyny kryzisu, damahčysia pačatku pieramovaŭ, vypravić situacyju ŭ ekanomicy, adnavić zakonnaść i inšyja. Dla hetaha my farmirujem kamandu śpiecyjalistaŭ, adkaznych za raspracoŭku i vykanańnie hetych płanaŭ, — dadaŭ Łatuška.
Da Narodnaha antykryzisnaha kiravańnia mohuć dałučycca ŭsie achvotnyja.
Ciapier čytajuć
«Da akcyi dałučylisia tolki marhinały». Što pisaŭ u čatach paśla svajho vykryćcia kadebešnik, adkazny za biełaruskuju emihracyju3
Kamientary