«Chaj viedaje inšym razam, jak parušać kanviencyju»

Akazvajecca, nazojlivaja dumka pra piedykuloz pieraśleduje nie tolki vysokaje načalstva :)

«Lidery ADS vyrašyli rasstavić usie kropki nad «i» i pravieryć usie demakratyčnyja subjekty na «vašyvaść». Nieŭzabavie budzie vypracavany Miemarandum ab uzajemadačynieńniach apazicyi z uładami ŭ źmienienych unutry- dy zamiežnapalityčnych umovach».

Taki stylova raźniavoleny kamientar źmieščany nie dzie-niebudź, a na sajcie Abjadnanych demakratyčnych sił.

Ideju paviazać usich «strašnaj klatvaj» spravakavaŭ razbor palotaŭ kiraŭnika BSDP Anatola Laŭkoviča. Majecca na ŭvazie jaho našumiełaje intervju «SB».

Dyk voś, miarkujecca stvaryć dakumient, pad jakim, pavodle Anatola Labiedźki, prapanujuć padpisacca siabram nie tolki ADS, «ale i inšych demakratyčnych arhanizacyj». Karaciej, niešta kštałtu prysiahi: voś za hetu rysu ŭ dačynieńniach z uładaj klaniemsia nie zachodzić!

Zakłapočanaść lideraŭ tytulnaj apazicyi adzinstvam šerahaŭ možna zrazumieć. Ułada napoŭnicu karystajecca novaj situacyjaj (dypłamatyčny praryŭ u Jeŭropu, jakaja, u svaju čarhu, «zdradziła demakratyi»), kab jašče bolej pakałoć svaich unutranych palityčnych apanientaŭ. Z adnych — sfarmavać kandydataŭ na kišennuju apazicyju, inšych — kančatkova vycisnuć u nikudy.

Ad tych, kaho nazyvajuć demakratyčnymi siłami, situacyja patrabuje mazhavoha šturmu, vypracoŭki adekvatnaj paradyhmy dziejańniaŭ va ŭmovach, kali zvykłaja dvuchmiernaja sistema palityčnych kaardynat sapraŭdy papłyła.

Ci dapamoža tut miemarandum?

Padajecca, što jon moža tolki padlić aleju ŭ ahoń, jašče bolej raskałoć apazicyju. Ci zachoča, naprykład, padpisvać klatvu Milinkievič, jaki zaraz, pa Kiplinhu, hulaje sam pa sabie? Voś vam i adzin raskoł. Ź inšaha boku, Alaksiej Janukievič, što ambicyjna zajaviŭ pra žadańnie zmahacca za pasadu kiraŭnika Partyi BNF, zusim nie vyklučaje chaŭrusu z Rucham za Svabodu (treba razumieć: i patrymki Milinkieviča na nastupnych prezidenckich vybarach). Voś vam užo ziarniaty budučych kalizij.

Znoŭ ža: patrabavańnie «strašnaj klatvy» moža pahłybić treščynu miž partyjnaj apazicyjaj i trecim siektaram.

Jaho pradstaŭniki i tak užo bahata atrymali za «kałabaranctva» — u pryvatnaści, za ŭdzieł u roznych kruhłych stałach dy kansultatyŭnych radach.

Ci zachočuć, prykładam, BAŽ, pradprymalnickija asacyjacyi, inšyja struktury aŭtentyčnaha treciaha siektaru źviazvać siabie niejkaj takoj kanviencyjaj? U ich ža jość svaje karparatyŭnyja intaresy, što vymahajuć, u pryvatnaści, hnutkaha ŭzajemadziejańnia z uładnymi strukturami. Biznesoŭcy, žurnalisty, pradstaŭniki inšych prafiesijnych cechaŭ nie mohuć dazvolić sabie raskošy paŭhoda siadzieć skłaŭšy ruki pad hordym łozunham bajkotu. Im treba rabić kankretnuju spravu tut i ciapier.

U rešcie rešt, niša dla demakratyčnych arhanizacyj praduhledžana prahramaj «Uschodniaha partniorstva». Heta — Forum hramadzianskaj supolnaści. U toj ža čas tytulnaja biełaruskaja apazicyja, nie majučy pradstaŭnictva ŭ sistemnaj palitycy, najchutčej što pralacić mima «Jeŭrahniazda» — mierkavanaj mižparłamienckaj asamblei UP.

Voś vam jašče adna kalizija. Miž tym pretenzii viarchoŭki partyjnaj apazicyi na rolu niejkich nośbitaŭ najvyšejšaj palityčnaj marali i tak užo, miarkujučy pa mnohich maich razmovach, pačali dastavać tych ludziej (dastatkova darosłych i sa svajoj hałavoj na plačach), što prachodziać u papierach ADS pad hryfam «pradstaŭnikoŭ demakratyčnaj supolnaści».

Karaciej, ideja paviazać niejkim univiersalnym miemarandumam roznyja siehmienty palityčnaj apazicyi i aŭtentyčnaha, nie kišennaha treciaha siektaru — vyhladaje ŭtapičnaj. Pry stałaj tradycyi pošuku zdradnikaŭ heta moža vylicca ŭ jašče bolšy razdraj.

Siońnia patrebna nie farmalnaja papiera, a mocnaja i hnutkaja stratehija.

Zrešty, jak miarkuje palitołah Juryj Čavusaŭ, ideja miemarandumu moža nie dajści da ŭvasableńnia. «Nie dumaju, što ŭ palitycy maje sens zaklučać takoha kštałtu piśmovyja pahadnieńni, —ličyć jon. — Niejkaje džentlmienskaje pahadnieńnie było b lepšym varyjantam».

Nu, a kali ideja ŭsio ž realizujecca… :)

«— U lejtenanta było try syny, — zaŭvažyŭ Biender, — dva razumnyja, a treci durań. Jaho treba pieraścierahčy.

— Nie treba, — skazaŭ Bałahanaŭ, — chaj viedaje inšym razam, jak parušać kanviencyju».

• 0
• 0
• 0
• 0
• 0
• 0
• 0
• 0