Mienharvykankam vydzieliŭ Partyi kamunistaŭ biełaruskaj DK Mienskaha traktarnaha zavodu dla praviadzieńnia čarhovaha źjezdu, jaki projdzie 23 traŭnia.
18 traŭnia Minharvykankam narešcie vydzieliŭ Partyi kamunistaŭ biełaruskaj pamiaškańnie dla praviadzieńnia čarhovaha źjezdu. Jon adbudziecca 23 traŭnia ŭ DK Minskaha traktarnaha zavodu.
Pavodle pres‑sakratara PKB Siarhieja Vaźniaka, na minułych vychodnych plenum CK pryniaŭ rašeńnie, što źjezd projdzie ŭ dva etapy. Pieršy adbudziecca 23 traŭnia, a druhi — u vieraśni ci kastryčniku.
«Najpierš budzie razhledžana pytańnie votumu davieru da Centralnaha kamitetu partyi, a taksama asabista da staršyni Siarhieja Kalakina. Sprava ŭ tym, što niekatoryja siabry partyi vykazali niedavier da ciapierašniaha kiraŭnictva.Dalej płanujecca razhlad varyjantaŭ novaj nazvy partyi. Tolki 9 z 49 siabroŭ CK prahałasavali za pakidańnie staroj nazvy», — kaža S.Vaźniak.
Na dadzieny momant isnujuć šeść varyjantaŭ novaj nazvy dla PKB:
«Biełaruskaja partyja levych» (BPŁ), Partyja demakratyi i spraviadlivaści (PDS), Partyja «Novy kurs», Partyja «Radzima», Partyja «Spraviadlivaści i narodaŭładździe» (PSN), Partyja «Spraviadlivy śviet».
Kali źjezd usio ž prymie rašeńnie ab źmienie nazvy, to z šaści varyjantaŭ buduć abranyja tolki try, jakija i buduć vystaŭlenyja na hałasavańnie padčas druhoha etapu źjezdu. «Heta robicca dla taho, kab ludzi zmahli abdumać prapanovy, a nie prymać rašeńni paśpiešna», — zaznačaje S.Vaźniak.
Taksama na źjeździe budzie razhledžany prajekt novaha statutu partyi. Prynamsi, novy statut dazvalaje stvarać unutry PKB asobnyja płatformy. «Da prykładu heta mohuć być žanočaja, moładzievaja, marksisckaja płatforma», — kaža pres‑sakratar.
Budzie razhledžana taksama Antykryzisnaja płatforma ADS. Tolki vosieńniu partyja budzie padavać dakumienty ŭ Minjust.
U pracy źjezdu miarkujecca ŭdzieł 210 delehataŭ (pa 30 ad Miensku i kožnaj z abłaściej).
Źjezd projdzie ŭ zakrytym režymie. Na jaho buduć zaprošanyja tolki pradstaŭniki Minjustu, nie budzie žurnalistaŭ, zamiežnych delehacyj, haściej. «Heta robicca dla taho, kab dyskusija była bolš raźniavolenaj», — padsumoŭvaje S.Vaźniak.
Kamientary