Źmicier Daškievič patłumačyŭ, čamu Łosiku varta spynić haładoŭku
Administratara telehram-kanału «Biełaruś hałaŭnoha mozhu» i kansultant Radyjo Svaboda haładaje ŭžo amal miesiac.
Były lider «Maładoha frontu», aktyvist Źmicier Daškievič abviaščaŭ haładoŭki pratestu niekalki razoŭ. U razmovie sa Svabodaj jon raskazaŭ, što adčuvaje čałaviek za kratami, kali admaŭlajecca ad ježy.
«Iharu ciapier značna ciažej, čym mnie ŭ 2012-m»
«Kali ŭ krainie 20 palitviaźniaŭ i niechta abviaščaje haładoŭku, niejkija inšyja metady baraćby vykarystoŭvaje, to ŭvahi da hetaha bolš, čym u sytuacyi, kali siadziać sotni ludziej, — kaža Źmicier Daškievič. — Tady, u 2012-m (u 2012 hodzie Daškievič dva tydni trymaŭ haładoŭku na znak pratestu suprać dziejańniaŭ administracyi mazyrskaj kalonii. — RS), sytuacyja była takoj, što Łukašenka paśla začystki 2010 hodu dumaŭ, jak heta ŭsio załahodzić. Jak adhadavać kryło na Zachad. Prynamsi, nas presavali ŭ turmach, stvarali ŭmovy psychalahičnaha hvałtu, fizyčnych ciažkaściaŭ. Chadzili i kazali — pišy na «pamiłuchu» i idzi. Sami šukali srodak, jak ciabie vyzvalić. Tut, u 2020-m, naŭrad ci ŭłady šukajuć srodak vyzvalić palitviaźniaŭ. Chiba što chtości, jak toj «ministar kruhłych stałoŭ», dušu satanie pradaść. Ciapier sytuacyja adroznaja. Vielmi šmat palitviaźniaŭ, i adbyvajecca nie adkručvańnie hajek, a ich zakručvańnie. Tamu Iharu ŭ hetym planie značna ciažej».
Daškievič abviaščaŭ haładoŭki pratestu dvojčy. U abodvuch vypadkach aktyvist admaŭlaŭsia ad ježy, ale piŭ vadu. Akramia haładoŭki ŭ mazyrskaj kalonii, Źmicier Daškievič taksama trymaŭ haładoŭku pratestu na voli ŭ 2010 hodzie razam z paplečnikami pa «Maładym froncie». Tady jana praciahvałasia 21 dzień.
«Što ja adčuvaŭ padčas haładoŭki? Było vielmi chałodna, — zhadvaje Źmicier. — Heta asnoŭnaja prablema haładovak za kratami. Choład dla mianie byŭ prablemaj. Jon adčuvaŭsia značna macniej paśla taho, jak pačałasia haładoŭka.
U izalatary ŭ ciabie tolki tonieńkaja roba, bolš ničoha. Inšych prablem nie ŭźnikła, sa zdaroŭjem taksama. Ale 15 dzion — heta nie taki vialiki termin. Hałoŭnaje było vychodzić aściarožna z haładoŭki. Ale ŭ vypadku ź Iharam, kali termin užo dajšoŭ da miesiaca, heta moža mieć značna bolš składanyja nastupstvy. Na maju dumku, jamu treba spyniać haładoŭku».
Daškievič taksama pryhadvaje, što asablivaha nahladu z boku turemnych daktaroŭ paśla abviaščeńnia im haładoŭki nie było. Tolki kali jon sam pačynaŭ skardzicca na cisk albo štości inšaje. Vychodziŭ z haładoŭki Daškievič z dapamohaj supu. Tak było ŭ turmie. Paśla 21 dzion haładoŭki na voli aktyvist spačatku piŭ fizrastvor, zatym bulony.
«Siońnia dla nas samaje važnaje źbierahčy svaje siły, — kaža aktyvist. — Fizyčnaje i duchoŭnaje zdaroŭje.
Toje, što epocha Łukašenki skončanaja, heta vidavočna. Ale jaho sychod moža zaniać niekatory čas. I budzie niapravilnym, kali Łukašenka źniknie, a my budziem fizyčna albo duchoŭna i maralna nieprydatnyja dla taho, kab dalej pracavać i dziejničać dziela Biełarusi. Ciapier tyja ŭmovy, u jakich apynuŭsia Ihar, ad jaho haładavańnia albo niehaładavańn, ja dumaju, nia vielmi zaležać. Jon ździejśniŭ hieraičny vyčyn. Źviarnuŭ na siabie našuju ŭvahu i ŭvahu hramadztva. Ale ciapier samaje hałoŭnaje — siabie zachavać fizyčna i duchoŭna. Napieradzie vielmi šmat ciažkaj pracy. My musim sustreć sychod Łukašenki natchnionymi i radasnymi, a nie zmarniełymi i stomlenymi. Tamu ja asabista zaklikaju Ihara da spynieńnia haładoŭki».
Kamientary