U Čechii padadzienaja pieršaja zajava na biełaruskich siłavikoŭ za katavańni
Advakat biełarusa, jaki vinavacić amapaŭcaŭ u katavańniach, padaŭ u Centralnuju ŭpravu pa baraćbie z arhanizavanaj złačynnaściu Češskaj Respubliki zajavu ab złačynstvach, da jakich, pavodle paciarpiełaha, mieli niepasrednaje dačynieńnie vysokapastaŭlenyja supracoŭniki AMAPa, paviedamlaje Radyjo Svaboda.
U Čechii heta pieršaja padadzienaja zajava suprać biełaruskich siłavikoŭ, na padstavie jakoj moža być raspačataja kryminalnaja sprava. Raniej paviedamlałasia, što ŭ Čechii da padačy pavodle ŭniviersalnaj jurysdykcyi padrychtavanyja ŭžo 10 zajaŭ. Nahadajem, što ŭ miežach češskaj miedyčna-humanitarnaj prahramy prachodziać reabilitacyju bolš za 50 čałaviek ź Biełarusi.
Advakat biełarusa Alaksiej Krenkie paviedamiŭ radyjo «Svaboda»: «Siońnia našym advakackim biuro pa prośbie klijenta, jaki surjozna paciarpieŭ ad ruk pradstaŭnikoŭ siłavych struktur Biełarusi, u Centralnuju ŭpravu pa baraćbie z arhanizavanaj złačynnaściu Češskaj Respubliki padadzienaje paviedamleńnie ab učynieńni cełaha šerahu ciažkich kryminalnych złačynstvaŭ suprać čałaviečnaści.
U hetym paviedamleńni paciarpieły ŭ detalach infarmuje pra fakty nialudskich ździekaŭ i katavańniaŭ, jakija nad im učynili supracoŭniki AMAPa Horadni ŭ žniŭni 2020 hodu, nazyvajučy kankretnych asob. Hetyja fakty paćviardžajucca pakazańniami śviedak i inšymi dokaznymi materyjałami.
Fakty, apisanyja ŭ paviedamleńni našaha klijenta, śviedčać pra dziejańni, jakim niama miesca ŭ cyvilizavanym hramadstvie. Češski kryminalny kodeks praduhledžvaje mahčymaść pieraśledu pavodle pryncypu ŭniviersalnaści takoha typu złačynstvaŭ na terytoryi Čechii, niezaležna ad taho, u jakoj krainie jany byli ŭčynienyja. My raźličvajem, što śledčyja orhany Češskaj Respubliki voźmuć spravu na razhlad».
Paciarpieły, jaki pažadaŭ zachavać ananimnaść, vieryć, što złačyncaŭ pakarajuć:
«Toj, chto ŭ XXI stahodździ ŭtrymlivaje ŭładu pry dapamozie hvałtu, pakazvaje svaju słabaść. Vykonvać biazdumna zahady, śćviardžacca za košt mirnych ludziej, prynižajučy ich — heta sadyzm. Vieru i viedaju, što patrebny čas i siły, kab pakarać tych, chto davaŭ zahady i ich vykonvaŭ. Ale hety dzień abaviazkova pryjdzie!»
Pradstaŭnica Humanitarnaha kansiliumu, jaki sa žniŭnia dziejničaje ŭ Čechii dla akazańnia humanitarnaj dapamohi represavanym ź Biełarusi, patłumačyła: «Zajavy, jakija ciapier padajucca ŭ krainach Jeŭrasajuza, majuć na mecie pryciahnuć da adkaznaści ludziej, jakija dumajuć, što ŭ ich jość kart-błanš na hvałt i im za heta nikoli ničoha nie budzie».
Dziaržaŭnyja sacyjołahi: Biełarusy najpierš źviazvajuć svaju dziaržaŭnaść ź Vialikim Kniastvam Litoŭskim24
Kamientary