Адвакат беларуса, які вінаваціць амапаўцаў у катаваннях, падаў у Цэнтральную ўправу па барацьбе з арганізаванай злачыннасцю Чэшскай Рэспублікі заяву аб злачынствах, да якіх, паводле пацярпелага, мелі непасрэднае дачыненне высокапастаўленыя супрацоўнікі АМАПа, паведамляе Радыё Свабода.
У Чэхіі гэта першая пададзеная заява супраць беларускіх сілавікоў, на падставе якой можа быць распачатая крымінальная справа. Раней паведамлялася, што ў Чэхіі да падачы паводле ўніверсальнай юрысдыкцыі падрыхтаваныя ўжо 10 заяў. Нагадаем, што ў межах чэшскай медычна-гуманітарнай праграмы праходзяць рэабілітацыю больш за 50 чалавек з Беларусі.
Адвакат беларуса Аляксей Крэнке паведаміў радыё «Свабода»: «Сёння нашым адвакацкім бюро па просьбе кліента, які сур’ёзна пацярпеў ад рук прадстаўнікоў сілавых структур Беларусі, у Цэнтральную ўправу па барацьбе з арганізаванай злачыннасцю Чэшскай Рэспублікі пададзенае паведамленне аб учыненні цэлага шэрагу цяжкіх крымінальных злачынстваў супраць чалавечнасці.
У гэтым паведамленні пацярпелы ў дэталях інфармуе пра факты нялюдскіх здзекаў і катаванняў, якія над ім учынілі супрацоўнікі АМАПа Горадні ў жніўні 2020 году, называючы канкрэтных асоб. Гэтыя факты пацвярджаюцца паказаннямі сведак і іншымі доказнымі матэрыяламі.
Факты, апісаныя ў паведамленні нашага кліента, сведчаць пра дзеянні, якім няма месца ў цывілізаваным грамадстве. Чэшскі крымінальны кодэкс прадугледжвае магчымасць пераследу паводле прынцыпу ўніверсальнасці такога тыпу злачынстваў на тэрыторыі Чэхіі, незалежна ад таго, у якой краіне яны былі ўчыненыя. Мы разлічваем, што следчыя органы Чэшскай Рэспублікі возьмуць справу на разгляд».
Пацярпелы, які пажадаў захаваць ананімнасць, верыць, што злачынцаў пакараюць:
«Той, хто ў XXI стагоддзі ўтрымлівае ўладу пры дапамозе гвалту, паказвае сваю слабасць. Выконваць бяздумна загады, сцвярджацца за кошт мірных людзей, прыніжаючы іх — гэта садызм. Веру і ведаю, што патрэбны час і сілы, каб пакараць тых, хто даваў загады і іх выконваў. Але гэты дзень абавязкова прыйдзе!»
Прадстаўніца Гуманітарнага кансіліуму, які са жніўня дзейнічае ў Чэхіі для аказання гуманітарнай дапамогі рэпрэсаваным з Беларусі, патлумачыла: «Заявы, якія цяпер падаюцца ў краінах Еўрасаюза, маюць на мэце прыцягнуць да адказнасці людзей, якія думаюць, што ў іх ёсць карт-бланш на гвалт і ім за гэта ніколі нічога не будзе».
Цяпер чытаюць
Расійскія прапагандысты выдумалі ўдар дрона па турыстычным аўтобусе. Але ў гісторыі ёсць загадкавыя фуры4
Каментары