Mužčynu, jaki pafarbavaŭ svoj dom kala čyhunki ŭ BČB, paśla «sutak» zvolnili z pracy
Žychara vioski Alešča Połackaha rajona Anatola Kachančyka, jakoha asudzili na 7 sutak aryštu za toje, što jon pafarbavaŭ svoj pryvatny dom u kolery BČB-ściaha, zvolnili z pracy. Mužčyna 38 hadoŭ adpracavaŭ na čyhuncy. «Siońnia zabraŭ pracoŭnuju», — raspavioŭ Tut.by Anatol. Viaskoviec kaža, što zafarboŭvać biełyja i čyrvonyja pałosy na svaim žylli nie źbirajecca — choć milicyja prosić jaho ab hetym.
Nahadajem, žychara vioski Alošča Połackaha rajona Anatola Kachančyka zatrymali ŭviečary 9 lutaha. Na jaho skłali pratakoł pa artykule 23.34 KaAP (Parušeńnie paradku arhanizacyi abo praviadzieńnia masavych mierapryjemstvaŭ) — za toje, što častka jaho doma pafarbavanaja ŭ kolery nacyjanalnaha ściaha.
Mužčyna znachodziŭsia ŭ IČU.
11 lutaha sudździa suda Połackaha rajona i Połacka Uładzimir Biasiecki abvinavaciŭ Kachančyka ŭ niezakonnym pikietavańni i asudziŭ na 7 sutak aryštu.
— Učora, 16 lutaha, vyjšaŭ ź izalatara časovaha ŭtrymańnia — a siońnia mianie zvolnili z pracy. Zabraŭ pracoŭnuju knižku. Ja adpracavaŭ na čyhuncy 38 hadoŭ, byŭ bryhadziram puci. Zvalnieńnie aformili «po sohłašieniju storon», — raskazaŭ Kachančyk.
Svoj dom na vulicy Čyhunačnaj u vioscy Alošča mužčyna pafarbavaŭ u BČB jašče letaś, paśla vybaraŭ:
— Adrazu, u žniŭni, ja paviesiŭ na dom bieł-čyrvona-bieły ściah. A praź niekatory čas vyviesiŭ «Pahoniu» i pafarbavaŭ chatu. Našy nacyjanalnyja hierb i ściah — dla mianie śviatyja simvały. Zaraz na ich pačalisia asablivyja hanieńni, tamu ja i vyrašyŭ upryhožyć hetaj simvolikaj chatu. Dom dobra bačny z čyhunki — ad majho padvorka da čyhunačnych puciej nie bolš za 30−40 mietraŭ. Ad našaj stancyi Alošča da Połacka — 42 kiłamietry.
Uzimku ŭ Aloščy niešmatludna — tut pastajanna žyvuć čałaviek 20. Ale ŭ ciopły čas hoda siudy pryjazdžaje šmat dačnikaŭ, a taksama hrybnikoŭ i jahadnikaŭ. BČB-dom, pa słovach Kachančyka, bolšaści padabajecca, ale jość i niadobrazyčliŭcy.
Anatol kaža, što milicyja prasiła jaho zafarbavać BČB-ściah na domie:
— Ja skazaŭ: «Nie budu!» Supracoŭniki adkazali: «Značyć, znoŭ za taboj pryjedziem i zabiarom u izalatar».
Zaŭtra, 18 lutaha, Anatolu spoŭnicca 62 hady. Mužčyna kaža, što pracy ŭ jaho vioscy niama, uładkavacca kudyści budzie składana. Ale nie hublaje aptymizmu:
— Uletku hryby-jahady pojduć, nie prapadu.
-
Były palitviazień Viktar Łosik raspavioŭ pra svajo vyzvaleńnie i pierajezd ź siamjoj u Polšču
-
«My pieramahli». Chłopčyku z Mahilova ŭviali samy darahi preparat ad śmiarotnaha zachvorvańnia
-
Što za Itała-ałbanskaja katalickaja carkva, da jakoj naležyć novy nuncyj? I jak heta moža paspryjać adnaŭleńniu ŭnijactva ŭ Biełarusi
Ciapier čytajuć
«Niečym treba zaŭsiody achviaravać. Mnie pryjšłosia achviaravać siamjoj»: syn Iny Afanaśjevaj pra pavaroty losu12
Kamientary