«€1000 za pasłuhi ahientaŭ — heta ŭžo norma». Što zaraz adbyvajecca z šenhienam i na što iduć biełarusy dziela vizy
Jašče zusim niadaŭna biełaruskija turysty hreli siabie nadziejaj, što voś-voś adbudziecca cud, i my znoŭ budziem, jak raniej, atrymlivać svaje hadavyja šenhienskija vizy prosta tak, «miž inšym». U vyniku ruchajemsia da taho, što chutka cudam stanie ličycca adnarazovaja ispanskaja viza, atrymanaja ŭsiaho za niejki miesiac, razam z tonaj lišnich viedaŭ pra čaty, boty, słoty i inšyja «sšytki Aleha».
Onliner.by piša, što što naohuł zaraz adbyvajecca ź vizami i ci realna atrymać zapavietnuju nalepku ŭ pašpart raniej, čym da letniaha adpačynku ŭ 2026-m?
Jak situacyja z šenhienam źmianiłasia za hod?
Kab detalova razabracca ŭ dastupnych varyjantach pa šenhienie, žurnalisty Onliner.by pahavaryli z Hlebam Łaryjonavym — dyrektaram vizavaha ahienctva Tutvisa.by. Spytaŭšy ŭ ekśpierta, jak źmianiłasia situacyja z sakavika-krasavika 2024-ha, atrymali chutki i niesuciašalny adkaz: stała tolki horš.
Kali jašče hod tamu cana ŭ €1000 za pasłuhi ahienta zdavałasia varjactvam, to ciapier heta patrochu stanovicca normaj. A turystam, jakija pytajucca, kudy iści pa šenhien, Hleb usio čaściej rekamienduje krainy Azii: i vizu zrobiać tanna za čatyry dni, i pahladzieć budzie na što.
«Zachavałasia mahčymaść padačy ŭ niamieckuju ambasadu: sam zajšoŭ na sajt, zapoŭniŭ paru radkoŭ u formie, adpraviŭ — čakaješ čarhu. Ale z-za taho, što niemcy nastolki mocna spraścili praces padačy, da ich pajšli ŭsie, kamu nie lanota, navat pa druhim i trecim kole. U vyniku čas čakańnia raściahnuŭsia ŭžo da 15 miesiacaŭ, pačalisia niejkija historyi sa zbojami ŭ sistemie i samavolnymi admienami», — kaža Łaryjonaŭ.
Italija prypyniła zapis u žyvuju čarhu
U hetaj čarzie ŭžo blizka 30 tysiač zajaŭnikaŭ. Tam taksama ŭtvaryŭsia sapraŭdny śniežny kom.
«My dziela cikavaści pytalisia ŭ ludziej, što stajali pad vizavym centram: navošta hetyja pakuty? Mnohija adkazvali — maŭlaŭ, staim ad niama čaho rabić, heta ž biaspłatna», — raspaviadaje ekśpiert.
Novyja prablemy i novyja «fiški»
Voś jašče statystyka: mahčymaść padać na vizu ŭ ambasady Ispanii i Polščy adrezała płast ludziej, jakija ź niejkich pryčyn nie chočuć karystacca smartfonami abo nie majuć mahčymaści chutka prajści vieryfikacyju pa tvary paśla apaviaščeńnia — a jano moža pryjści ŭ luby čas. Nie paśpieŭ paćvierdzić — čakaj nastupnaj «razdačy» dat na padaču.
Ispancy zvyčajna adkryvajuć hetyja daty dvojčy na miesiac. Źjavilisia novyja varyjanty padačy na šenhien u Maskvie.
Zaraz arhanizavanuju hrupu achvotnych viazuć aŭtobusam u ambasadu Ispanii. Heta, viadoma, nie samy zručny varyjant, ale trochi chutčejšy: padača — na praciahu dvuch tydniaŭ, jašče praz try-čatyry tydni možna atrymać pašpart ź vizaj. Pry padačy ŭ Minsku na vizu daviadziecca čakać kala piaci-šaści tydniaŭ.
Ambasada Italii ŭ Maskvie prymaje biełarusaŭ pry najaŭnaści časovaj rehistracyi ŭ Rasii. I ludziej, jakija jaje majuć abo hatovyja zrabić, taksama chapaje.
A jak spravy ŭ inšych ambasadach i «ciomnych koniach» kštałtu Rumynii i Charvatyi?
Hleb Łaryjonaŭ kaža, što padacca na šenhien u maładaśledavanuju ambasadu, kaniešnie, možna. Ale kali vy tam niešta i atrymajecie, to praktyčna sa 100% vierahodnaściu heta budzie viza pad kankretnuju pajezdku.
Čym heta drenna? Tym, što pierad hetym zamiest vas u «adpačynak» na poŭnyja paŭhoda moža źjechać vaš pašpart: takuju strašyłku jašče z 2023-ha raspaviadajuć, naprykład, pra ambasadu Charvatyi.
— Ale ŭ astatnich krainach, nasamreč, terminy bolš-mienš standartnyja. U kahości i patrabavańni davoli kamfortnyja: taja ž Rumynija choć i daje vizu pad pajezdku, ale nijakaj spravazdačnaści pra jaje nie patrabuje. Bałharyja — taksama praz raz.
Kudy bolš stroha z hetym u Vienhryi. U pryncypie, vienhierskaja ambasada — niadrenny varyjant dla padačy, trapić tudy realna na praciahu miesiaca. Ale abaviazkova treba apłacić hatel z asabistaj kartki, a potym paćvierdzić vypiskaj z banka, što hrošy syšli. Admianiać braniravańnie nielha, inakš pryjdzie «list ščaścia» pra toje, što viza anulavana. Realnyja kiejsy jość.
Pavodle słoŭ Hleba, padobnym pačała zajmacca i kaliści papularnaja Hrecyja. Tak, vizu ŭsim zapar z-za admieny hatela nie anulujuć, ale vypadkaŭ stała bolš. Akramia taho, hreki słaviacca admovami — navat u siezon. Mnohija ŭžo pierastali razhladać hetu ambasadu, bo varyjantaŭ tam dva: admova abo adnarazoŭka. Hrecki turystyčny šenhien chacia b na paŭhoda — heta ŭžo niešta z vobłaści fantastyki.
Top varyjantaŭ dla atrymańnia šmatrazovaha šenhiena na hety momant
Dyk što rabić, kali vy siaredniestatystyčny biełarus bieź blizkich svajakoŭ, dziełavych suviaziaŭ i inšych pryvilejaŭ u krainach Šenhiena i zusim nie žadajecie marnavać adpačynak u turaŭskim aŭtobusie?
Ekśpiert raić nastupnuju bazavuju stratehiju prachodžańnia šlachu da vizy za bolš-mienš prystojny termin.
-
Pačynajem z Hiermanii. Samastojna zapisalisia — zabyli.
-
Prabivajem Ispaniju. Kali mora nie prosta šepča, a ŭžo adkryta kryčyć u słuchaŭku z patrabavańniem pryjechać jak maha chutčej, vizavyja ahienty pasprabujuć arhanizavać zapis ź biezasabovaj padačaj navat siońnia na zaŭtra. U bolš spakojnym tempie možna łavić daty samastojna. Kali pašancuje i paśpiachova projdziecie fotavieryfikacyju, to na praciahu miesiaca, chutčej za ŭsio, trapicie ŭ ambasadu.
-
Nie adkidvajem maskoŭskija varyjanty — iznoŭ Ispanija abo Italija. Heta, viadoma, abydziecca daražej: za afarmleńnie toj ža italjanskaj vizy «pad kluč» daviadziecca addać €700. Zatoje kali za apošnija try hady zdavali adbitki palcaŭ u jakoj-niebudź ambasadzie ci VC, asabista jechać nikudy nie pryjdziecca.
— Naohuł, biełarusy ŭsio čaściej pačynajuć rabić vizy praz Maskvu, — dzielicca nazirańniami Hleb Łaryjonaŭ. — I heta zrazumieła: pakiet dakumientaŭ adzin i toj ža, ale ŭ Minsku tabie, chutčej za ŭsio, pastaviać pieršy šenhien na 30 dzion, a ŭ Maskvie mohuć dać i na paŭhoda, i na hod, časam zdarajecca navat na dva.
Chutka moža źjavicca i maskoŭski varyjant Francyi — minskaja ambasada zaraz praktyčna nie daje dat, akramia jak pad tury, tamu ja jaje navat nie zhadvaju.
A jakija raskłady pa «prostych» samastojnych padačach?
Žurnalisty paprasili čytačoŭ padzialicca śviežymi historyjami atrymańnia vizy biez pasiarednikaŭ. Nie čakali niejkich niečakanych łajfchakaŭ ź finałam u duchu «vienhry dali hod u čysty pašpart» — i sapraŭdy, takoha nie było. Z čatyroch dziasiatkaŭ tych, chto adhuknuŭsia, pryblizna pałova ŭsio ž taki źviarnułasia pa dapamohu da svajakoŭ za miažoj, astatnija — pieravažna z tych, chto doŭhija miesiacy ciarpieŭ u čakańni pachodu da niemcaŭ.
Nižej — niekalki kiejsaŭ, jakija abo natchniać, abo prymusiać usio ž zirnuć kudyści ŭ bok Paŭdniovaj Karei ci Tajłanda.
«Stajała na «avaryjcy» i chutka adpraviła zajaŭku»
Alena zdavała ŭ italjanski vizavy centr pašparty adrazu piaci čałaviek: svoj, muža, maci i dvuch dziaciej. U žyvuju čarhu biełaruska zapisałasia jašče ŭ žniŭni 2024 hoda, a słot na padaču atrymałasia złavić tolki ŭ kancy studzienia 2025-ha.
— Uvieś dzień čakała paviedamleńnia pra adkryćcio słotaŭ. Daviałosia vyjechać pa dačku, paprasiła siabroŭku abnaŭlać sajt VC. Tolki vyjechała na trasu — telefanuje, kaža, što prymajuć zajaŭki. Ja tut ža stała na «avaryjku» i chutka adpraviła zajaŭku, na ščaście, usio patrebnaje ŭžo było padrychtavana. Padača była pryznačanaja na 4 sakavika, dakumienty na hety raz razhladali doŭha: pašparty viarnuli praz 20 dzion. U vyniku nam z mužam i dziećmi dali na try hady, mamie — uvohule na piać hadoŭ.
U inšaj čytački i jaje maładoha čałavieka historyja adnosin ź italjanskaj ambasadaj jašče daŭžejšaja, ale taksama ščaślivaja.
— Upieršyniu biełaruska zapisałasia ŭ znakamity «sšytak Aleha» vosieńniu 2023 hoda. Padacca i paśpiachova atrymać šenhien na try miesiacy atrymałasia viasnoj 2024-ha.
— Vizu vykarystali pa pryznačeńni: źjeździli na mory ŭ Italiju. Potym udała złavili premium-zapis, i naša nastupnaja padača pryjšłasia jakraz na kaniec adpačynku. Pa druhuju vizu pajšli ŭžo z usimi paćvierdžańniami znachodžańnia ŭ krainie. Dźvie tydni čakańnia — i hadavy šenhien u pašparcie.
Pa vydatkach atrymałasia tak:
- €35 — konsulski zbor,
- €19 — pasłuhi vizavaha centra,
- 190 rubloŭ — premium-padača.
— Vynik, liču, šykoŭny. Rada, što samastojna va ŭsim razabrałasia i hrošy my patracili ŭ Italii, a nie addali «dapamožnikam». Numarok u čarzie na treciuju padaču, darečy, taksama ŭžo jość.
«Čakaŭ paŭtara hoda — atrymaŭ vizu na 15 dzion»
Adzin z našych čytačoŭ, jaki atrymaŭ vizu ŭ niamieckaj ambasadzie, čakaŭ svajoj čarhi ź listapada 2023-ha pa luty 2025-ha. Da taho ž, heta byŭ užo treci jaho pachod da niemcaŭ: da hetaha ŭ pašpart paśpiachova ŭkleili dźvie turystyčnyja vizy na try miesiacy.
— Na hety raz atrymaŭ hadavuju. Usio rabiŭ sam. Liču, što ŭ niemcaŭ samaja sumlennaja padača, bo luby čałaviek u stanie samastojna zapisacca i sabrać patrebnyja dakumienty. Ź minusaŭ — vielmi vialiki termin čakańnia, nu i, sudziačy pa statystycy, doŭhaterminovuju vizu atrymać udajecca nie zaŭsiody.
A voś Alaksandr, naadvarot, zajaŭlaje, što paśla niadaŭniaha vizitu da niemcaŭ «pakryŭdziŭsia na ich i bolš nie pryjdzie». Historyja ź vizaj u biełarusa sapraŭdy atrymałasia davoli niepryjemnaja. Na padaču Alaksandr zapisaŭsia jašče ŭ kastryčniku 2023 hoda, pryjšoŭ u ambasadu z dakumientami ŭ lutym 2025-ha. Prykinuŭšy svoj bahaty dośvied pajezdak pa Jeŭropie, vyrašyŭ nie raźmieńvacca i zapytaŭ šenhien adrazu na piać hadoŭ.
— Praz 10 dzion uvieś taki radasny pryjšoŭ pa pašpart, spadziejučysia ŭbačyć u im vizu chacia b na hod. Adnak paśla paŭtara hoda čakańnia atrymlivaju vizu na «cełych» 15 dzion. Na emocyjach napisaŭ skarhu pasłu, ale, naturalna, majo piśmo pieranakiravali ŭ vizavy adździeł, i ich adkaz źvioŭsia da taho, što «čas čakańnia nie źjaŭlajecca kryteryjem dla terminu dziejańnia vizy».
«27 studzienia złaviŭ zapis da ispancaŭ na 29-je»
A voś jašče para ščaśliva skončanych pachodaŭ u ambasadu Ispanii. Pieršuju vizu ŭ siaredzinie 2024 hoda čytač zrabiŭ z dapamohaj ahientaŭ. Pahladzieŭ, jak uładkavany ŭvieś praces, i vyrašyŭ, što z nastupnaj spravicca sam.
— Praź niekalki miesiacaŭ pačaŭ manitoryć słoty dla zapisu. Ispancy na toj momant spraścili sistemu, kab zvyčajnym ludziam stała realna zapisacca biez pasiarednikaŭ. Paśla źjaŭleńnia miescaŭ słoty zastavalisia svabodnymi jašče niekalki dzion. U vyniku ja zapisaŭsia za dva tydni napierad.
Praź jašče paru tydniaŭ atrymaŭ zapavietnuju vizu na 90 dzion z šmatrazovym ujezdam. Radaści nie było miežaŭ! Uvieś praces atrymańnia vizy padaŭsia jašče praściejšym, čym praz ahienctva: na sajcie jość zrazumiełyja instrukcyi.
Druhaja čytackaja historyja vyhladaje zusim jak toj samy vypadak «adnaho znajomaha inšych znajomych», jakomu ŭsio zaŭsiody dajecca lohka i chutka. Z dapamohaj bota, jakoha pakazali ŭ tematyčnym telehram-čacie, biełarus 27 studzienia zdoleŭ vychapić svabodny słot na 29-je.
— Za dva dni padrychtavaŭ usie dakumienty i zavioz u vizavy centr. Apošni šenhien da hetaha byŭ u 2019 hodzie — hrečaski. Dakumienty rychtavaŭ sam pavodle hajdu z čata, ankietu naohuł zapoŭniŭ ad ruki. Praz try tydni, 19 lutaha, zabraŭ pašpart — atrymaŭ turystyčny mulcik na try z pałovaj miesiacy. Paśla hetaha z žacham čytaŭ, jak niechta čakaje niamieckuju vizu ceły hod.
Kamientary
( Navierno)
Vsio priekrasno dielitsia mieždu ahientami, turističieskim biuro i.... rabotnikami ambasady ili konsulata.... I nikakoj politiki