Kitajski ŭrad ličyć, što elektraaŭtamabili Tesla mohuć stać krynicaj uciečki źviestak, što tyčacca nacyjanalnaj biaśpieki.
Pa słovach kitajskich čynoŭnikaŭ, hety krok vyklikany pravierkaj biaśpieki elektramabilaŭ, bo kamiery Tesla mohuć pastajanna zapisvać vyjavy navakolnaha asiarodździa, a čujniki atrymlivać źviestki, dzie i jak vykarystoŭvajecca aŭtamabil. Da taho ž Tesla moža atrymlivać śpis kantaktaŭ mabilnych telefonaŭ, jakija sinchranizujucca z kampjutarnaj sistemaj.
Tamu kitajski ŭrad zaniepakojeny, što heta infarmacyja moža trapić u ZŠA, paviedamlaje The Wall Street Journal.
Kitajski lidar Si Czińpin uvodzić usio bolš abmiežavańniaŭ na zamiežnyja technałohii pa miery taho, jak uzmacniajecca technałahičnaja baraćba z ZŠA.
Taki krok, chutčej za ŭsio, źjaŭlajecca adkazam na amierykanskija abmiežavańni na vykarystańnie pradukcyi kitajskaj kampanii Huawei. Urad ZŠA pierakanany, što technałohii hetaj kampanii ŭjaŭlajuć saboj pahrozy nacyjanalnaj biaśpiecy, bo kampanija moža zajmacca špijanažam.
Kitajski ŭrad zahadaŭ kiraŭnikam niekatorych dziaržaŭnych ustanoŭ paprasić supracoŭnikaŭ nie vykarystoŭvać na pracy amierykanski elektramabil. Taksama paviedamlajecca, što była ŭviedziena zabarona na ŭjezd na Tesla ŭ žyłyja kompleksy dla siemjaŭ supracoŭnikaŭ, jakija pracujuć u halinie dziaržaŭnaj abarony.
Kampanija Tesla admoviłasia kamientavać hety krok kitajskaha kiraŭnictva. Adnak pradstaŭniki spasyłajucca na papiarednija kamientary kampanii nakont biaśpieki źviestak: «Palityka achovy kanfidencyjalnaści Tesla adpaviadaje kitajskim zakonam i praviłam».
Kamientary