«Krot» u domie sastarełych, łakdaŭn va Uchani, padziemny špital u Siryi: piać dakumientalnych pretendentaŭ na «Oskar» pakažuć u Minsku
Cyrymonija ŭznaharodžvańnia premijaj «Oskar» adbudziecca ŭžo praz dva tydni, a hetymi dniami ŭ Minsku raspačnucca pakazy dakumientalnych kinastužak ź liku pretendentaŭ na statuetku. Dźvie ź ich naminavanyja na «Oskar» u katehoryi «Najlepšy dakumientalny poŭnamietražny film» i try ŭziatyja z łonh-lista. Pakazy buduć prachodzić z 14 da 18 krasavika ŭ kinateatry Silver Screen Galileo, a paśla prahladu praduhledžany dyskusii z kinaekśpiertami.
Prahrama «Oscars.doc. Naminanty i finalisty» pačniecca z nadzionnaha — z dakumienta času «76 dzion», dzie pakazany špital i vulicy Uchania padčas tatalnaha łakdaŭnu ŭ studzieni minułaha hoda.
Nastupnaja ŭ raskładzie — «Piačora» siryjskaha režysiora Fierasa Fajada, što adsiedzieŭ u turmie za ŭdzieł u paŭstańni suprać Bašara Asada i sa svaim filmam užo byŭ naminavany na «Oskar». Karcina pakazvaje špital pad ziamloj u asadžanym siryjskim horadzie, u jakim lekarki majuć spravu z patokam nie prosta chvorych, a paranienych dziaciej.
Na treci dzień zapłanavanaja kranalnaja kryminalnaja historyja z Narviehii «Mastak i złodziej» — pra toje, jak mastačka zbližajecca sa złodziejem, jaki skraŭ jaje karciny.
U apošnija dva dni prahramy buduć pakazany niepasrednyja naminanty na «Oskar», jakich u hetaj katehoryi ŭsiaho piać. Pieršym — rumynski palityčny tryler pra toje, jak žurnalisty vykryvajuć karupcyjnyja schiemy ŭ sistemie achovy zdaroŭja krainy i jak heta ŭpłyvaje na navakolle.
Apošniaj u sieryi stanie dakumientalnaja kamiedyja «Ahient krot»: pryvatny syščyk musić pravieryć, u jakich umovach utrymlivajecca maci klijentki ŭ domie sastarełych. Jon najmaje dla hetaj spravy 93-hadovaha mužčynu, jaki nie maje dačynieńnia da sysku, i dla taho pastaŭlenaja zadača stanovicca sapraŭdnaj avanturaj.
Paśla sieansaŭ filmy možna abmierkavać z prahramnym dyrektaram «Listapada» Irynaj Dziamjanavaj i daśledčycaj kino Maryjaj Kaściukovič.
Arhanizatar prajekta kampanija «Art Karparejšn», što robić Minski mižnarodny kinafiestyval «Listapad», stała pastaŭlaje na vialiki ekran intelektualnaje aŭtarskaje kino. Na minułym tydni zaviaršylisia «Uikiendy z Kšyštafam Kieśloŭskim», jakija ŭklučyli ŭ siabie siem karcin polskaha i francuzskaha pieryjadaŭ režysiora, a taksama padborku jaho dakumientalnych rabot. Paśla prahramy «Oscars.doc» abiacanyja pakazy Fiederyka Fielini i Paoła Sarencina.
«Pavinien vyjści Pačobut». Polski ministr Sikorski znoŭ zahavaryŭ pra mahčymaje zakryćcio miažy dla hruzaŭ12
Kamientary