Minčukoŭ aryštavali na 15 sutak za žadańnie pastavić śviečku i łampadku ŭ pamiać ab achviarach Čarnobylskaj katastrofy, paviedamlajuć pravaabaroncy.
Siońnia ŭ Leninskim sudzie Minska razhledzieli spravy zatrymanych minčukoŭ. Juryja Łankieviča i Anastasiju Vajtovič zatrymali ŭčora ŭviečary na płoščy Svabody. U RUUSie na ich skłali pratakoły pa art. 24.23 KaAP nibyta za ŭdzieł u niesankcyjanavanym pikietavańni šlacham «vykrykvańnia pravakacyjnych łozunhaŭ kala prajeznaj častki».
Na sudzie Anastasija raspaviała, što pryjšła da kaścioła na płoščy Svabody, kab pastavić śviečku. Ale kaścioł užo byŭ začynieny, tamu dziaŭčyna pastajała niekalki chvilin kala jaho i źbirałasia sychodzić. Ale ŭ hety momant da jaje padyšoŭ supracoŭnik AMAPa i paprasiŭ pakazać dakumienty, paśla čaho joj «prapanavali» prajechać u RUUS.
Sudździa Julija Šut paličyła žadańnie pastavić śviečku niesankcyjanavanaj akcyjaj i aryštavała Anastasiju na 15 sutak.
35-hadovaha navukovaha supracoŭnika Akademii navuk Juryja Łankieviča zatrymali napiaredadni pieradabarony jaho kandydackaj. Sa słovaŭ navukoŭca, pierad zatrymańniem jon kuryŭ na prypynku na płoščy Svabody. Kala 20:30 da jaho padyšli supracoŭniki milicyi i paprasili pakazać zaplečnik, u jakim znajšli łampadku. Heta stała pryčynaj jaho zatrymańnia.
Juryja aryštavali na 15 sutak.
U kancy Juryj źviarnuŭsia da śviedki-milicyjaniera:
— Vy razumiejecie, śviedka, što svaimi pakazańniami vy stavicie pad pahrozu maju pracu ŭ Akademii navuk, pieradabaronu i abaronu kandydackaj? Sprava ciapier nie ŭ 15 sutkach, vy heta razumiejecie?
Ciapier čytajuć
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata1616
Kamientary