Julija padała dakumienty na lačebny fakultet. U budučyni jana bačyć siabie lekaram akušeram-hiniekołaham i ličyć, što važna hadavać zdarovaje pakaleńnie, a pačynać treba mienavita z mamy. I nie tolki tamu, što maje za plačyma bahaty dośvied maciarynstva. Bolš za 12 hadoŭ tamu Julija vyrašyła, što choča źviazać svajo žyćcio ź miedycynaj i ŭvieś hety čas uparta išła da mety, kab ździejśnić svaju maru.
— Ab pastupleńni ŭ miedycynskuju VNU ja zadumvałasia i ŭ vypusknym kłasie škoły, ale tak i nie vyrašyłasia zdavać ustupnyja ekzamieny pa chimii i bijałohii. U toj čas pradmiety, nieabchodnyja dla pastupleńnia, zdavalisia mnie vielmi składanymi. Zatoje dobra davalisia movy, tamu ja vybrała fiłałahičnuju śpiecyjalnaść i stała vykładčykam anhlijskaj movy. Paśla zakančeńnia ŭniviersiteta vučyłasia ŭ mahistratury, vykładała ŭ škole i VNU. Ale potym zvolniłasia i vyrašyła iści da svajoj daŭniaj mety — vyvučeńnia miedycyny.
Pieršapačatkova ŭ šmatdzietnaj mamy paprostu nie było mahčymaści jaje ažyćciavić: pakolki pieršuju vyšejšuju adukacyju Julija atrymlivała za košt srodkaŭ biudžetu, druhuju treba było atrymlivać płatna. Hetaha nie dazvalała finansavaje stanovišča. Da taho ž dzieci jašče byli zanadta maleńkimi. A ciapier, jak adznačaje šmatdzietnaja mama, u jaje žyćci narešcie nadyšoŭ taki momant, kali jana, zaručyŭšysia padtrymkaj siamji i muža, moža ažyćciavić svaju maru. Dzieci padraśli, a ŭ Julii narešcie źjaviŭsia čas na vučobu.
— U nas z mužam dźvie starejšyja dočki-dvajniatki, jakim pa 17 hadoŭ, jość jašče 14-hadovaja dačka i dva syny. Starejšy ź ich u nastupnym hodzie pojdzie ŭ škołu, małodšamu ŭ krasaviku spoŭniłasia try hady.
Dziakujučy dočkam-dvajniatkam, jakija ŭ hetym hodzie skončyli škołu, Julija ŭsio-taki advažyłasia pastupić u miedycynski ŭniviersitet i stała razam ź imi rychtavacca da CT. Adna ź dziaŭčynak abrała psichałohiju, druhaja — hrafičny dyzajn. U siamji navinu pra toje, što mama płanuje stać abituryjentkaj, uspryniali z razumieńniem. A voś siarod znajomych byli i tyja, chto sprabavaŭ adhavaryć Juliju ad hetaj idei.
— Byli takija ludzi, jakija mnie kazali: «Ty sabie ŭjaŭlaješ, što ty dypłom atrymaješ u 42 hady?! Ty ŭžo navat nie paśpieješ papracavać!» — raskazvaje šmatdzietnaja mama. — U pryncypie takija kamientary mahli b spynić, ale mianie jany tolki pierakanali ŭ tym, što ja ŭsio rablu pravilna.
Centralizavanaje testavańnie šmatdzietnaja mama vyrašyła zdavać pastupova: častku ŭ minułym hodzie, častku ŭ hetym. U vyniku razam z atestatam, darečy, asablivaha ŭzoru, u Julii 316 bałaŭ. Lepš za ŭsio na CT šmatdzietnaja mama zdała ruskuju movu — na 77 bałaŭ. Centralizavanaje testavańnie pa chimii taksama było paśpiachovym — na 71 bał.
Julija śćviardžaje, što pryvykła vučycca i pracavać razam ź dziećmi. Jany zaŭsiody byli ŭklučanyja ŭ praces navučańnia mamy i ni ŭ jakim razie jamu nie pieraškadžali. Kali Julija zakančvała ŭniviersitet, u ich z mužam užo było troje dziaciej. Tamu da studenckich budniaŭ šmatdzietnaja mama maralna hatovaja.
