Chalezin: Abo Łukašenka sychodzić, abo sankcyjnaja piatla zaciahvajecca. Siektaralnyja sankcyi ZŠA čakajucca vosieńniu

— Jak vy ličycie, nakolki surjoznym udaram dla režymu buduć apošnija amierykanskija sankcyi?

— Samy radykalny ŭron varta čakać ad amierykanskich sankcyj, tamu što ZŠA majuć svaju valutu, jakaja źjaŭlajecca reziervovaj dla śvietu i, pa sutnaści, kantralujuć situacyju ŭ bankaŭskim asiarodździ, tamu hety ŭdar budzie nie łakalnym, jak u vypadku z toj ža Šviejcaryjaj, jakaja taksama ŭviała sankcyi, a tatalnym. Amieryka za košt svajoj valuty maje dostup da bankaŭskaj śfiery va ŭsim śviecie i, naturalna, moža macniej upłyvać na situacyju. Da taho ž ZŠA majuć svaju sistemu, kab adsočvać uchileńnie ad sankcyj, i praduhledžvajuć za heta pakarańnie. Kali taki fakt vyjaŭlajecca, iduć druhasnyja sankcyi, užo na struktury, jakija spryjajuć sychodu ad sankcyj. Nichto nie choča svarycca z Amierykaj.

— Pa reakcyi Łukašenki i apošnich dziejańniach režymu vidać, što žadanaha efiektu Zachad pakul nie dasiahnuŭ. Cituacyja z pravami čałavieka paharšajecca: palitviaźniaŭ nie adpuskajuć, naadvarot — zatrymlivajuć jašče bolš ludziej.

— Reakcyja Łukašenki tamu i niervovaja, što sankcyi jaho kranajuć. Treba dakładna razumieć, jakija b sankcyi ni byli, jon budzie rabić situacyju bolš žorstkaj. Nie treba dumać, što kali b nie było sankcyj i mižnarodnaha cisku, heta b źniziła napał unutry krainy. Evalucyja dyktatu pracuje nie tak. Cisk na hramadstva budzie raści ŭ lubym razie. Pamiž roznymi raŭndami sankcyj byli vialikija pieryjady, padčas hetych paŭzaŭ ničoha nie palapšałasia. U mianie niama adčuvańnia, što va ŭsim vinavaty Zachad. Zachad tak adkazvaje na razbureńnie hramadzianskaj supolnaści. Nivodnaja zachodniaja kraina nie pryniała rašeńniaŭ niezaležna ad učynkaŭ Łukašenki.

— My viedajem, jak raniej režym braŭ zakładnikaŭ, a potym pad ciskam sankcyj ludziej vyzvalali. Na vaš pohlad, ciapier mahčymy taki handal?

— Nijakaha handlu nie budzie. Kali režym jašče nie zrazumieŭ, što situacyja źmianiłasia, jamu treba heta zrazumieć. Nichto nie budzie handlavacca ni za jakoha palitviaźnia. Heta možna było rabić u 2006 ci 2011 hodzie, ale nie ŭ 2021-m, tamu što na siońnia cana pytańnia adna: abo Łukašenka sychodzić, abo jon nie sychodzić. Mienavita tak staviać pytańni biełarusy, jakija prosiać Zachad dapamahčy vyrašyć palityčny kryzis u krainie. I zachodnija palityki heta razumiejuć. Bolš niama palityčnaj voli sastupać Łukašenku tolki za vyzvaleńnie palitviaźniaŭ. Usie razumiejuć, što jon sapraŭdy hetak ža moža nabrać novych.

— Jość mierkavańnie, što sankcyi addalajuć Biełaruś ad Zachadu, staviać u jašče bolšuju zaležnaść ad Rasii i niasuć pahrozy suvierenitetu.

— Dla mianie hetaj arhumientacyi nie isnuje, pakolki Biełaruś jak znachodziłasia ŭ śfiery ŭpłyvu Rasii, tak i znachodzicca, ničoha nie źmianiłasia z tych časoŭ. Pa apytańniach, nasielnictva Biełarusi ŭsio bolš addalajecca ad Rasii, i da hetaha pryvodzić palityka Kramla. Da taho ž palityčnaja vola biełarusaŭ da zachavańnia suvierenitetu raście.

Pavialičyć

Ci zmohuć biznesmieny abyści sankcyi? Ci dapamohuć łabisty?

— Ci zmohuć biznesmieny, jakija trapili pad sankcyi, abyści abmiežavańni? Huceryjeŭ, naprykład, vyjšaŭ sa składu dyrektaraŭ «Rusnafty», pieradaŭ svaju dolu bratu. Aleksin pradaŭ MTBank.

— Ja štodnia atrymlivaju infarmacyju pra pradpryjemstvy, jakija trapili pad sankcyi. My viedajem, jak jany sprabujuć abyści abmiežavańni: źmianiajuć partnioraŭ, pierazaklučajucca kantrakty, sprabujuć ścierci ŭ miedyja zhadki pra siabie. Ale ni Huceryjeŭ, ni Aleksin nie źjaŭlajucca ŭdałym prykładam. U ich situacyja horš niama kudy. Možna pieradać aktyvy rodnym ci siabram, ale heta nijak nie vyrašaje prablemy biznesmiena, jakoha ŭsprymajuć užo jak taksičnaha. Ich partniory hatovyja płacić miedyja za toje, kab jany vydalili materyjały, dzie ŭkazvajecca ab supracoŭnictvie. Biznes nie zacikaŭleny, kab heta fihuravała ŭ partfolia: kamuści treba vychodzić na IPO, kamuści zaklučać dziaržaŭnyja kantrakty. Lubaja suviaź z padsankcyjnymi kampanijami moža dyskredytavać biznes. U Huceryjeva pastaŭleny pad pahrozu kantrakt u Biełarusi pa raspracoŭcy kalijnych radoviščaŭ, staić pytańnie ab viartańni kredytu, jaki Kitaj vydaŭ pad dziaržaŭnyja harantyi. Z tytuniovaj fabrykaj Aleksina nie mohuć zaklučać kantrakty pa vytvorčaści filtraŭ, tytuniu, papiery i hetak dalej. Ciapier jany sprabujuć zamiaścić jeŭrapiejskija i amierykanskija kantrakty kitajskimi. Chaj sprabujuć, ale Kitaj nie taja kraina, jakaja lubić mieć spravu z padsancyjnym biznesam.

Pry hetym, sapraŭdy, jość pradpryjemstvy, jakija sprabujuć abyści sankcyi, u niekatorych vypadkach heta ŭdajecca, ale nienadoŭha. Nastupajuć druhasnyja sankcyi — užo na partnioraŭ, jakija dapamahajuć abyści abmiežavańni. I heta biesprecedentny reputacyjny ŭdar. Trapić pad sankcyi lohka, a voś vyjści — nievierahodnaja praca. Uładzimiru Piefcijevu spatrebilisia pasłuhi adnaho z samych darahich advakackich biuro ŭ Jeŭropie i čatyry hady žyćcia.

— Toj ža Aleksin nie adrazu trapiŭ u sankcyjny śpis. Padklučylisia łabisty, jakija na niekatory čas dapamahli jaho źbierahčy. Sutykajeciesia vy z łabistami inšych biznesoŭcaŭ? Jak heta pracuje?

— Łatyšskija jeŭraparłamientaryi sapraŭdy sprabavali adstajać Aleksina. Ja nie viedaju, što ich źviazvaje, i nie chacieŭ by ciapier vykazvać abvinavačvańni. Ale pa fakcie ŭ pieršym vypadku jaho adstajali. Dalej była naša praca adnosna palityki Łatvii pa hetym pytańni. I kali Aleksin byŭ znoŭ uniesieny ŭ sankcyjny śpis, užo nichto nie advažyŭsia jaho abaraniać, pakolki heta reputacyja krainy, jakuju nichto nie choča stavić pad udar canoj svajoj karjery. U Huceryjeva była abarona z boku Hiermanii, pakolki ŭ jaho prajektach pa raspracoŭcy kalijnych šachtaŭ udzielničała Hiermanija, i košt pytańnia byŭ dosyć vysoki — kala 200 miljonaŭ jeŭra. U vyniku sankcyi ŭviali i suprać jaho, tamu što ni adna kraina nie choča ciarpieć reputacyjnyja straty. Usie chočuć adyści ad sankcyj, ale kali heta i atrymlivajecca, to da momantu, pakul na heta nie źviartajuć uvahu. Jak tolki infarmacyja pra heta stanovicca dastupnaj, źnikajuć usie łabisty. Jany mohuć dapamahčy tolki ŭ karotkaterminovaj pierśpiektyvie, a dalej heta stanovicca surjoznaj prablemaj užo dla tych, chto zastupajecca za taki biznes.

— Zajavy Łukašenki pra toje, što Hiermanija, Łatvija i kankretnyja palityki hetych krain źjaŭlajucca naščadkami fašyzmu, škodziać łabizmu? Ci heta šum, na jaki nie źviartajuć uvahu?

— Biezumoŭna, takija zajavy ŭpłyvajuć na situacyju. U łabistaŭ jość svoj intares, ale jon kupirujecca, jak tolki źjaŭlajecca reputacyjnaja niebiaśpieka. I kali režym usio bolš idzie pa šlachu izhoja, adstojvać jaho palityčnyja i ekanamičnyja intaresy nadzvyčaj składana. Kali my havorym pra Jeŭrasajuz, dzie pracavali łabisty, na siońnia ja nie baču ni adnaho imia, usie rastali. Štaty nie biarom, tam nikoli i nie było prychilnikaŭ režymu.

Što budzie z pastaŭkami kaliju ŭ Narviehiju

— Palitołah Dzianis Mieljancoŭ vykazaŭ mierkavańnie, što biełaruskija ŭłady ŭ adkaz na jeŭrapiejskija sankcyi mohuć nacyjanalizavać «Pryjorbank» ci mabilny apieratar A1, heta aŭstryjski biznes. Ci moža takaja pahroza asłabić sankcyjny cisk na režym?

— Heta budzie mieć jašče horšyja nastupstvy dla režymu. Treba razumieć, što niezakonnaja kanfiskacyja ŭłasnaści kampanij — heta złačynstva. I niavažna, što zamach na pryvatnuju ŭłasnaść budzie matyvavany sankcyjami. Nacyjanalizacyja jeŭrapiejskaha biznesu nie budzie stoparam dla jeŭrapiejskich palitykaŭ, heta jašče bolš padšturchnie Zachad uzmacnić cisk. ES znojdzie mahčymaść, jak kampiensavać biznesu straty.

Pavialičyć

— Adno z samych adčuvalnych pytańniaŭ dla biełaruskaj ekanomiki — «Biełaruśkalij». Narviežskaja kampanija Yara na ciapierašni momant praciahvaje pracavać pa zaklučanych kantraktach. Pry hetym dla Narviehii pytańnie vykanańnia pravoŭ čałavieka nie pusty huk.

— Kraina sapraŭdy padzialaje kaštoŭnaści pravoŭ čałavieka. Narviežski Chielsinkski kamitet — adzin z hałoŭnych partnioraŭ hramadzianskaj supolnaści ŭ Biełarusi. Yara ža prosta choča zarablać, nie hublać hrošy. Choć kropka ŭ pytańni nie pastaŭlenaja. Bolš za toje, zajava Litvy ab spynieńni pastavak biełaruskaha kaliju stavić pad pytańnie dalejšaje supracoŭnictva z Yara. Akramia taho, płanujucca siektaralnyja amierykanskija sankcyi, u tym liku pa kaliju. Tak što moža zdarycca tak, što ŭžo niezaležna ad žadańnia Yara praca z «Biełaruśkalijem» budzie niemahčymaj da vyrašeńnia pytańniaŭ, jakija pryviali da sankcyj.

— Pry hetym Yara zmahła damahčysia vyklučeńniaŭ pa biełaruskim kalii ŭ siektaralnych sankcyjach ES: raniej zaklučanyja kantrakty zastajucca ŭ sile, asnoŭnaja liniejka ekspartu biełaruskaha kaliju nie pad zabaronaj.

— Heta była łabisckaja historyja, matyŭ — treba trymać dźviery adčynienymi, kab u režymu była mahčymaść acanić mahčymyja ryzyki i spynić eskałacyju. Nasamreč, pryčyny čysta kamiercyjnyja, heta vyhadna kankretna kampanii Yara. U hetaj historyi prasočvajecca francuzski śled (Narviehija nie źjaŭlajecca siabram ES — NN).

Ci ŭratuje Łukašenku Rasija? I čamu nie ŭvodzić sankcyi Ukraina?

— Ci zmoža Rasija strachavać usie straty, jakija Biełaruś atrymaje ŭ vyniku sankcyj?

— Heta toje samaje, što sprabavać nabrać vadu ŭ dziravaje viadro. Rasija straciła svaje zvyšzdolnaści, čas Savieckaha sajuza, jaki kantralavaŭ krainy Varšaŭskaj damovy, syšoŭ. Rasija paśladoŭna hublaje krainu za krainaj, jana straciła Ukrainu — užo na dziesiacihodździ, ciapier jana straciła Małdovu, daŭno straciła krainy Bałtyi. Partniory Rasii — nie krainy, a niekalki pierson, takija jak Łukašenka, naprykład. Biełarusy z kožnym dniom usio bolš rasčaroŭvajucca ŭ Rasii, navat tyja, chto jašče niadaŭna byŭ joju začaravany. Pryčyna tamu — padtrymka režymu, jaki pajšoŭ na takuju ​​eskałacyju kanfliktu sa svaim narodam. U Rasii, biezumoŭna, jość ekanamičnyja ryčahi. I kali Maskva i dalej choča płacić za abiacańni i pry hetym tryvać reputacyjnyja vydatki, nichto nie moža joj hetaha zabaranić. Ale i tam umiejuć ličyć hrošy.

— Što vy dumajecie pra pazicyju Ukrainy? Kijeŭ nie pryznaŭ Łukašenku paśla vybaraŭ, zakryŭ nieba dla biełaruskich avijakampanij. Kožnuju jaho zajavu pra Krym dosyć niervova ŭsprymajuć ukrainskija palityki. Ale pakul naŭrad ci možna kazać pra surjoznyja ekanamičnyja sankcyi.

— Ukraina razumieje, što za palityk Łukašenka, ale praciahvaje ź im pracavać, pakolki heta pakul ekanamična vyhadna. Zialenski sprabuje manieŭravać, ale robić heta davoli niazhrabna. Liču, što heta niedalnabačnaja palityka. U budučyni, kali ŭ Biełarusi adbudziecca tranzit ułady, krainy, jakija siońnia zajmajuć takuju ​​palityku, stanuć u kaniec čarhi. Pytańnie navat nie ŭ palitykach, jakija pryjduć da ŭłady. Narod nie durny, usio bačyć.

Pra asabistuju biaśpieku i sankcyjnuju piatlu

— Karpiankoŭ zajaviŭ u intervju, što adnojčy za miažoj mohuć znajści cieły apazicyjanieraŭ. Jak vy ličycie, ci mohuć pajści na heta biełaruskija siłaviki i što vy robicie dla asabistaj biaśpieki?

— Ščyra kažučy, ja nie vieru ŭ brutalnuju historyju zabojcaŭ režymu za miažoj. Va Ukrainie heta moža adbyvacca (tam chapaje byłych udzielnikaŭ bajavych dziejańniaŭ, jakija nie hrebujuć takim zarobkam), ale navat u Litvie i Polščy heta nievierahodna składana zrabić, užo nie kažučy pra Anhliju. U Łondanie samaja vialikaja kolkaść videakamier u śviecie. Usio ž taki heta nie taja śpiecsłužba, jakaja zdolnaja vyrašać takija ryzykoŭnyja zadačy. Mnie ciažka ŭjavić, jak biełaruskija siłaviki, jakija nie viedajuć ni adnoj zamiežnaj movy, prakruciać takuju ​​apieracyju. U partniorstvie z Rasijaj mohuć, kali Maskva paličyć, što hetaja piersona pahražaje režymu Pucina.

Pavialičyć

My razumiejem mahčymyja pahrozy i sočym za svajoj biaśpiekaj. Ryzyki razumieje i brytanski ŭrad, i brytanskija śpiecsłužby, jakija nas dahladajuć. Kali my naviedvajem sumiežnyja ź Biełaruśsiu krainy, nam dajuć achovu. Kali zajmaješsia takimi surjoznymi pytańniami, jak sankcyi, zrazumieła, što niadobrazyčliŭcaŭ šmat. Šorhat biełaruskich aliharchaŭ vakoł nas nie spyniajecca. My pastajanna atrymlivajem pahrozy.

— U pačatku razmovy vy skazali, što ciapier pytańnie staić tak: abo Łukašenka sychodzić, abo sankcyi praciahvajucca. Što jašče mohuć zrabić bolš žorstkim?

— Ałharytm mienavita taki: ci jon sychodzić, ci piatla praciahvaje zaciahvacca. ES i ZŠA majuć namier prademanstravać, što sankcyjnyja miechanizmy suprać samavolstva efiektyŭnyja. Z kožnym sankcyjnyja raŭndam sistema ŭdaskanalvajecca. Moža być udar pa bankaŭskaj sistemie. Moža dajści da situacyi, kali ekanomika budzie łakalizavanaja, režym nie zmoža płacić navat biudžetnikam, siłavikam i piensijanieram. A treba razumieć, ciapier nie 90-ja, nichto nie hatovy žyć za 30 dalaraŭ u miesiac. Siektaralnyja sankcyi ZŠA ŭdarać mocna. Čakajem, što jany buduć pryniaty da kastryčnika.

• 1
• 0
• 0
• 0
• 0
• 0
• 0
• 0