Były ambasadar Laščenia syšoŭ sa «Schodu», ale źjazdžać ź Biełarusi nie źbirajecca
Ihar Laščenia publična abviaściŭ, što syšoŭ z pasady staršyni «Schodu» i spyniaje ŭdzieł u pracy płatformy, pakolki ličyć jaje nieefiektyŭnaj. Źjazdžać ź Biełarusi były dypłamat nie płanuje.
11 žniŭnia byŭ zatrymany i źmieščany ŭ izalatar časovaha ŭtrymańnia były ambasadar Biełarusi ŭ Słavakii Ihar Laščenia. Paśla vybaraŭ jon asudziŭ hvałt u dačynieńni da pratestoŭcaŭ, udzielničaŭ u hramadskich palityčnych inicyjatyvach. Praz tydzień Laščeniu vyzvalili, jon zastajecca ŭ statusie padazravanaha pa kryminalnaj spravie (pa jakim artykule, publična nie paviedamlałasia).
Ihar Laščenia napisaŭ u sacsietkach, što jašče dva miesiacy tamu syšoŭ z kiraŭnictva płatformy «Schod», učora jon zrabiŭ heta aficyjna.
«Schod» moh mieć sens, jak dziejučaja ŭ pravavym poli hramadzianskaja inicyjatyva dla tych, chto znachodzicca ŭ Biełarusi, — patłumačyŭ Laščenia. — Mnohija vyłučalisia ŭ delehaty, tamu što pavieryli, što heta biaśpiečna i lehalna. I sapraŭdy, «Schod» nikoli nie zaklikaŭ da arhanizacyi i praviadzieńnia masavych mierapryjemstvaŭ. Ale jon chutka pieratvaryŭsia ŭ pustuju bałbatniu. Da abmierkavańnia ŭ pryhožaj vokładcy stali prymacca dastatkova pravakacyjnyja idei. Maje sproby patłumačyć sens pravakacyj mieli častkovy pośpiech, a prapanavany miechanizm adfiltroŭvańnia takich tem nie byŭ pryniaty».
Laščenia padkreślivaje, što nie źbirajecca źjazdžać ź Biełarusi. Zrešty, paśla tydnia na Akreścina ŭ statusie padazravanaha nie fakt, što jon lehalna moža heta zrabić.
«Liču, što nie ździajśniaŭ nijakich supraćpraŭnych dziejańniaŭ u miežach «Schodu». Ciapier, kali ja znachodžusia doma, niapravilna ličyć mianie palitviaźniem», — zajaviŭ Ihar Laščenia.
Kamientary