Ekśpiert: Meta Rasii — zamacavacca na terytoryi Biełarusi, pakul jość Łukašenka
— Ciapier heta adzin navučalny centr, a čamu b zaŭtra druhi nie źjaviŭsia albo treci? Takim čynam pastupova adbyvajecca pavieličeńnie kolkaści rasijskich vajskoŭcaŭ na terytoryi Biełarusi, pra jakoje my možam navat i nie viedać, — adznačyła ŭ intervju «Jeŭraradyjo» dyrektar pa daśledavańniach mižnarodnaj biaśpieki Jeŭrapiejskaj ekśpiertnaj asacyjacyi iSANS Maryja Aŭdziejeva.
Vučebna-bajavyja centry stvarajuć mahčymaści dla taho, kab tudy pastajanna jeździli rasijskija vajskovyja śpiecyjalisty. Ale my nie viedajem, čym jany tam buduć zajmacca, źviartaje ŭvahu Aŭdziejeva:
— Kali heta nie aficyjnaja vajskovaja baza, to jany nie abaviazanyja davać spravazdaču, kolki čałaviek tudy pryjechała, jakija tam jość łahistyčnyja mahčymaści i ŭ pryncypie jakaja ich rola akramia taho, što jany tam vučać biełaruskich vajskoŭcaŭ.
Rasija pieraśleduje metu «zamacavacca» ŭ Biełarusi, pakul tam jość Łukašenka. Jon słaby, akazvaje padtrymku. U adkaz na hetuju padtrymku, na toje, što jon pradaje častku suvierenitetu Biełarusi, iduć damoŭlenaści ab tym, kab pavialičyć vajskovuju prysutnaść u Biełarusi, ab ekanamičnym zroščvańni. Faktyčna heta paŭzučaja anieksija. Ale heta ŭsio treba zrabić tak, kab potym heta było składana adyhrać. Kab, kali źmienicca Łukašenka, nastupny, chto pryjdzie, nie moh admianić hetyja damoŭlenaści.
Na dumku Aŭdziejevaj, stałaja vajskovaja prysutnaść u Biełarusi taksama daje Rasii hieapalityčny ryčah u razmovach z Zachadam. Rasieija sprabuje pakazać, što Biełaruś — heta śfiera pryjarytetnaj cikavaści.
— Maŭlaŭ, my tut možam upłyvać na situacyju, a akramia nas tut nichto ničoha nie razumieje, dajcie nam paŭnamoctvy — my tut sami raźbiaromsia, heta naohuł spradviečna naša terytoryja, my viedajem, jak navieści tut paradak.
Toje ž samaje Pucin sprabavaŭ u dačynieńni da Ukrainy zrabić. Nie vielmi atrymałasia, ale tym nie mienš nastupstvy dla Ukrainy takija, jakija my siomy hod sprabujem pieramahčy, — dadaje Maryja.
— Naŭmysna padymajecca hradus napružańnia, tamu što ES i Ukraina nie mohuć nie reahavać na toje, što rasijskaja baza faktyčna budzie stvoranaja blizka da ich miežaŭ. Uličvajučy jašče toje, što ŭ Krymie i na ŭschodzie Ukrainy vialikaja kolkaść rasijskaha ŭzbrajeńnia, terytoryja Ukrainy apynajecca ŭ poŭnaj dastupnaści dla rasijskich srodkaŭ SPA.
Zachodnija krainy pavinny buduć pierabudoŭvacca, być hatovymi na hetuju pahrozu adkazać. Takuju taktyku «patorhvańniaŭ» i niejkich drobnych hadaściaŭ Rasija zaŭsiody paśpiachova vykarystoŭvała. Treba heta ŭličvać, — ličyć ekśpiert.
Čytajcie taksama: Łukašenka anansavaŭ źjaŭleńnie ŭ Biełarusi «dziasiatkaŭ samalotaŭ i viertalotaŭ» z Rasii — ale ŭ nas niama stolki piłotaŭ. Ruskija zastanucca?
Muzyka Cim Suładze: Roźnica 30 hadoŭ — toje, što adpaviadaje maim ujaŭleńniam pra adnosiny41
Kamientary