Skandał u połackaj škole: maci śćviardžaje, što jaje syna źbili na treniroŭcy pa dziudo — tak chłopca «vychoŭvaŭ» trenier
Videa maci traich dziaciej i błohierki Hanny Zacharavaj za sutki sabrała dziasiatki tysiač prahladaŭ i tysiačy kamientaroŭ na roznych placoŭkach. U im žančyna sa ślaźmi na vačach raskazvaje, što ŭ Połackaj SDIUŠAR jaje syna Klima źbili na treniroŭcy pa dziudo adnahrupniki. Pryčym — sa zhody treniera.
«Ja nie staŭlusia da svaich synoŭ jak da «synočiek-korzinočiek». Ale takoha staŭleńnia ja dakładna nie dazvolu», — paabiacała Hanna.
Pa słovach maci, trenier dazvoliŭ inšym dzieciam «pavychoŭvać syna».
«U Klima nie atrymlivałasia vykanać praktykavańnie, i trenier skazaŭ: «Pakul u Klima nie atrymajecca, usie astatnija prysiadajuć». Heta ciahnułasia niejki čas, i ŭ kancy treniroŭki trenier skazaŭ: «Nu, ja dazvalaju vam jaho za heta pakarać».
Pra situacyju maci raspavioŭ i Klim, i jašče adzin syn Mark, jaki taksama naviedvaje hetyja ž treniroŭki pa dziudo padčas kanikuł.
«Klima źbivaŭ natoŭp adnahrupnikaŭ, Mark sprabavaŭ abaranić brata, ale natoŭp prosta jaho nie puskaŭ. Heta što, takija piedahahičnyja mietady, kali dzicia viartajecca dadomu i ŭ jaho nos sińniu addaje? Ja viedaju, što ŭ mianie Klim nie idealny spartsmien, ale čamu nielha było źviazacca sa mnoj i skazać, što ŭ jaho prablemy?, — zadaje adno pytańnie za inšym žančyna. — Jak by jon siabie ni pavodziŭ, źbivać nielha».
Hanna nie stała publična nazyvać imia treniera SDIUŠAR da skančeńnia raźbiralnictva, ale ŭsia situacyja była pierakazanaja milicyi. Taksama maci pryznačyła indyvidualnuju sustreču z trenieram i źviarnułasia ŭ balnicu dla fiksacyi siniakoŭ. Da spravy padklučylisia miascovyja čynoŭniki i ŚMI, paabiacaŭšy, što zdareńnie «na kantroli».
«Adpaviednyja słužby, u tym liku adździeł sportu Połackaha rajvykankama i kiraŭnictva spartyŭnaj ustanovy, uklučanyja ŭ pracu i prymajuć patrebnyja miery. My imkniomsia da maksimalnaj adkrytaści — jak tolki budzie atrymanaja aficyjnaja infarmacyja, my abaviazkova pra ŭsio raskažam», — napisaŭ «Połacki vieśnik».
U samoj Połackaj SDIUŠAR ad apieratyŭnych kamientaroŭ žurnalistam admovilisia.
Rolik błohierki zapuściŭ šyrokuju dyskusiju pra dazvolenaść mietadaŭ vychavańnia ŭ sporcie, asabliva kali toj źviazany z baraćboj.
Bolšaść biełarusaŭ u kamientarach adnaznačna asudžaje hvałt i vychavańnie siłaj:
«Žudasna, niepiedahahična, žachliva pastupiŭ trenier. Jak by ni pavodziła siabie dzicia (a ja mahu ŭjavić, što časam vyrablajuć chłapčuki), ale takoje nie dazvolena!»;
«Źbivać natoŭpam — heta nie pra spartyŭnyja pavodziny i nie pra vychavańnie, heta 1000000% nienarmalna. Trenier pakazvaje, što, kali niechta niešta robić nie tak, možna źbić natoŭpam. Vyrašać pytańni kułakami — heta naŭprost daroha za kraty»;
«Zabrać terminova dziaciej ad takoha treniera i zvolnić!»;
«Ja trenier. Pisać zajavu, jaho pavinny zvolnić. Heta nie piedahahična. Heta ckavańnie. Zvolniać jaho, i nichto nie voźmie bolš na pracu».
Ale znajšlisia i tyja, chto apraŭdvaje padobnyja mietady:
«Addajcie dzicia na šachmaty, moža, tam jano budzie cełaje i zdarovaje. Kali vy addali jaho ŭ hety sport, vy pavinny razumieć, što i jak budzie adbyvacca z vašym dziciom na treniroŭkach».
Častku kamientaroŭ z apraŭdańniem treniera, jak ličyć Ksienija, napisali siabry mužčyny ci baćki dziaciej, jakija i źbivali jaje Klima.
«U vašaha Klima kožnuju treniroŭku niešta nie atrymlivajecca, moža, heta nie toj sport, u jakim jon moža prahresavać».
«Moj brat chodzić z Klimam na treniroŭki, jaje syn uvieś čas zryvaje ich, i ŭ hety dzień treba było prosta prajścisia hužam, z čym jaje dzicia nie dało rady, i dzieci prysiadali 150 razoŭ, pakul jon nie zrabiŭ praktykavańnie. Klim nie choča zajmacca, abzyvaje dziaciej, pakazvaje siaredni palec i lažyć pad batarejaj, nichto jaho nie źbivaŭ, dali padsračnik adzin raz i ŭsio».
«Kali ŭ jaho adnaho nie atrymlivajecca, čamu inšyja pavinny za jaho adciskacca? Vy addali syna na bajavyja mastactvy. Tak chaj trenier i vyrašaje ŭ takich rečach. A hładzić syna pa hałoŭcy i ŭ dupu jamu dźmuć… Navošta tady addavali ŭ sport? Zajmicie jaho vyšyvańniem!».
Jak by ni raźviłasia historyja dalej, Hanna ŭžo pryniała rašeńnie, što bolš jaje dzieci da takoha treniera ni nahoj.
Ciapier čytajuć
Chto zabaraniaje ŭ Biełarusi knihi — voś hetyja 22 čałavieki15
Chto zabaraniaje ŭ Biełarusi knihi — voś hetyja 22 čałavieki
«Spasibo, Lena! Prodołžajtie viesti nabludienije». Aficer, jaki pisaŭ Charysavaj, paśviŭsia ŭ čatach palitemihracyi, a niekatorym dziaŭčatam navat prapanoŭvaŭ abmianiacca niudsami9191
Kamientary