Stała viadoma, u čym Makiej abvinavačvaje pradstaŭnictva AAN u Biełarusi
Padčas sustrečy z hienieralnym sakratarom AAN Antonia Huteryšam, jakaja adbyłasia ŭ ramkach Hienieralnaj asamblei AAN u Ńju-Jorku, Uładzimir Makiej paviedamiŭ vysokamu čynoŭniku, što niekatoryja pradstaŭniki kamandy arhanizacyi ŭ Biełarusi vykarystoŭvali hrošy, jakija vydzialalisia dla ludziej ź invalidnaściu, na padtrymku ludziej, jakija ŭdzielničali ŭ pratesnych akcyjach.
U kamientary biełaruskamu telebačańniu jon paabiacaŭ nieŭzabavie raskryć padrabiaznaści rasśledavańnia. I voś siońnia pastajannym pradstaŭnictvam Biełarusi pry Adździaleńni AAN u Ženievie była apublikavana zajava «Ab niametavym vykarystańni finansavych srodkaŭ piersanałam Pradstaŭnictva AAN u Biełarusi». Heta reakcyja biełaruskaha boku na dakład hienieralnaha sakratara AAN «Supracoŭnictva z AAN, jaje pradstaŭnikami i miechanizmami ŭ halinie pravoŭ čałavieka», padrychtavanym da 48-j siesii SPČ.
Jak zajaŭlaje biełaruskaje pradstaŭnictva, u dakład uklučanaja niedakładnaja infarmacyja pra Siarhieja Drazdoŭskaha. Na dumku biełaruskaha boku, Drazdoŭski «staŭ «achviaraj» niedapuščalnaj, nieprafiesijnaj i palityčna matyvavanaj dziejnaści supracoŭnikaŭ Pradstaŭnictva AAN u Respublicy Biełaruś», a daradca pa pravach čałavieka ŭ ofisie pastajannaha kaardynatara AAN u Biełarusi inicyjavaŭ niametavaje vykarystańnie finansavych srodkaŭ UVKPČ.
Biełaruski bok zajaŭlaje, što paśla pratestaŭ u žniŭni 2020 hoda pa inicyjatyvie čynoŭnika AAN dvuma supracoŭnikami ofisa AAN u Biełarusi była raspracavana i realizavana schiema apłaty pasłuh advakataŭ biełaruskim hramadzianam, jakija nie źjaŭlajucca invalidami abo achviarami hvałtu. Takim čynam byli apłačany pasłuhi advakataŭ dla 23 hramadzian.
«Afarmleńnie płaciežnych dakumientaŭ ažyćciaŭlałasia tajemna, u abychod aficyjna ŭzhodnienaj dziejnaści, praz uciahnutaha ŭ takuju supraćpraŭnuju dziejnaść, ź jaho ŭśviadomlenaha viedama, Siarhieja Drazdoŭskaha, dyrektara «Ofisa pa pravach ludziej ź invalidnaściu» i pry niepasrednym udziele jurysta hetaj ustanovy. Takim čynam, biełaruskija hramadzianie Drazdoŭski i juryst uznačalenaj im ustanovy z padačy i pry ŭdziele šerahu supracoŭnikaŭ Pradstaŭnictva AAN u Biełarusi praviali finansavuju machinacyju sa srodkami AAN, vyłučanymi dla dziaržavy na akazańnie dapamohi invalidam i achviaram chatniaha hvałtu, što źjaŭlajecca kryminalna karalnaj dziejaj», — havorycca ŭ zajavie pastajannaha pradstaŭnictva Biełarusi.
Drazdoŭski i juryst Ofisa pa pravach ludziej ź invalidnaściu Hrableŭski abvinavačvajucca pa č. 2 art. 209 KK (Machlarstva, ździejśnienaje paŭtorna albo hrupaj asob). Jany znachodzilisia pad chatnim aryštam, zatym miera strymańnia była źmienienaja, ciapier jany na voli.
Ciapier čytajuć
18‑hadovaha chłopca abvinavacili ŭ admaŭleńni hienacydu biełaruskaha naroda29
18‑hadovaha chłopca abvinavacili ŭ admaŭleńni hienacydu biełaruskaha naroda
«Byŭ hałodny, jak z Aśviencima, nie jeŭ ni miasa, ni harodniny». Što viadoma pra śmierć babrujskaha žurnalista, na jakoha zaviali kryminalnuju spravu ŭ Polščy1616
Kamientary