Zamovili ekskursiju i zatrymali. Hida Aksanu Mankievič aryštavali na 15 sutak za «niepadparadkavańnie»
Ranicaj 2 listapada na Płoščy Svabody ŭ Minsku była zatrymanaja ekskursavodka Aksana Mankievič. Siońnia jaje sudzili ŭ sudzie Centralnaha rajona za niepadparadkavańnie milicyjantam pa art. 24.3 KaAP.
Zhodna z pratakołam, Mankievič 2 listapada ŭ 15:10 na vulicy Arłoŭskaj 58/1 «akazała niepadparadkavańnie Aleksandroviču, admoviłasia prajści ŭ RUUS pa fakcie raźbiralnictva ŭ padazreńni ŭ zachoŭvańni ekstremisckich materyjałaŭ, upirałasia nahami, chapałasia za formiennaje abmundziravańnie», paviedamlajuć pravaabaroncy.
Vinu na sudzie Aksana nie pryznała. Jana raspaviała, što na vychodnych patelefanavaŭ małady čałaviek, pradstaviŭsia Alaksiejem i zamoviŭ ekskursiju dla svajoj dziaŭčyny. Jany damovilisia sustrecca ŭ 11 hadzin 2 listapada na Płoščy Svabody, 4.
Kali Aksana pryjšła ŭ pryznačanyja miesca i čas, to nie ŭbačyła nijakaj dziaŭčyny. Padyšoŭ małady čałaviek, pakazaŭ paśviedčańnie i akazałasia, što heta i byŭ toj Alaksiej, jaki zamaŭlaŭ ekskursiju.
«Spačatku niešta skazaŭ pra słužbovy aŭtamabil, ale potym skazaŭ, što chutčej budzie pieššu dajści. I ja zrazumieła kudy my pojdziem, bo pobač Revalucyjnaja, 3 [tam znachodzicca budynak HUBAZiKa]».
Pa słovach Aksany, tam u jaje zapatrabavali ŭvieści parol na telefonie, kab jaho razbłakavać. Z-za chvalavańnia jana nie mahła ŭspomnić. Praz toje, što niekalki razoŭ prykładvali palec, parol źbiŭsia. Potym usio ž taki ŭskryli telefon, ale ničoha patrebnaha tam nie vyjavili. Dziaŭčynie ŭ HUBAZiKu prapanavali zapisać pakajalnaje videa, ale jana admoviłasia, bo «nie razumieła, u čym treba kajacca».
Paśla hetaha supracoŭniki pajechali da Aksany dadomu i praviali pieratrus. Paśla hetaha jany jašče raz zajechali ŭ HUBAZiK i pavieźli Aksanu ŭ Centralnaje RUUS.
«Tam pryparkavalisia kala tratuara. Jany bačyli, što ja adekvatna siabie viadu i navat nie trymali mianie za ruku. Prajšli spakojna razam u RUUS».
Na sudzie ŭ jakaści śviedki byŭ dapytany milicyjant Aleksandrovič, jaki zajaviŭ, što Mankievič była zatrymanaja ŭ «padazreńni ŭ zachoŭvańni ekstremisckich materyjałaŭ». Na sudzie jon błytaŭsia ŭ pakazańniach (naprykład, kazaŭ, što Aksana była ŭ sinim kaściumie, a nasamreč — u šerym palito) i paviedamiŭ, što zdymka videarehistrataram u toj dzień nie viałasia. Na sudzie hety supracoŭnik byŭ pradstaŭleny jak toj, što zatrymlivaŭ Mankievič, chacia jana abvierhła heta.
U vyniku, sudździa Šabunia aryštavała Aksanu na 15 sutak.
Raniej Aksanu ŭžo zatrymlivali: 1 lutaha Aksanu asudzili da 15 sutak paśla taho, jak zatrymali na praśpiekcie Niezaležnaści cełuju ekskursiju i abvinavacili ich u pikietavańni.
Akaŭnt Kabančuka ŭzłamali — ale ci biełaruskija śpiecsłužby?11
Kamientary