Bresckaja drukarnia admoviłasia drukavać hazietu «Hancavicki čas» u 2022 hodzie
Drukarnia apaviaściła redakcyju, što nie budzie praciahvać damovu na palihrafičnyja pasłuhi, termin dziejańnia jakoj zakančvajecca ŭ kancy 2021 hoda. Takim čynam drukavacca ŭ Breście ŭ nastupnym hodzie «Hancavicki čas» nie zmoža, paviedamlaje BAŽ.
Paviedamleńnie ab skasavańni damovy pryjšło ŭ redakcyju haziety 30 listapada pa elektronnaj pošcie za podpisam namieśnika dyrektara Bresckaj drukarni Iryny Ivanisik. Pry hetym na praciahu mnohich hadoŭ redakcyja «Hancavickaha času» rehularna apłočvała pasłuhi, kab nadrukavać hazietu.
Darečy, u paviedamleńni z drukarni čamuści pamyłkova paznačana imia pa baćku hałoŭnaha redaktara haziety: nasamreč, jaho kličuć Piotr Paŭłavič Huzajeŭski.
Paśla zadadzienaha pa telefonie pytańnia, što stała pryčynaj skasavańnia damovy, Iryna Ivanisik adkazała: «U nas zahruzka mianiajecca». Na dadatkovaje pytańnie, čamu ab hetaj zahružanaści drukarni nie było ŭkazana ŭ paviedamleńni (jakoje, darečy, pryjšło pa elektronnaj pošcie), Iryna Uładzimiraŭna adkazała svaim pytańniem: «A navošta?».
Varta zaŭvažyć, što na druk štotydniovaha numara «Hancavickaha času» ŭ bresckaj drukarni išoŭ ŭ siarednim 20-30 chvilin. Atrymlivajecca, što «zahruzka» ciapier pavinna być vielmi surjoznaj, kali druk nakładu «Hancavickaha času» staŭ takim pryncypovym momantam.
Jak zaznačyŭ hałoŭny redaktar vydańnia Piotr Huzajeŭski, 20 hadoŭ «Hancavicki čas» sumlenna vykonvaje svaju pracu na karyść čytačoŭ u rajonie i daloka za jaho miežami.
«My sprabavali dapamahčy šmatlikim ludziam, i heta spracavała: uzdymali aktualnyja prablemy, trymali čytačoŭ u kursie padziejaŭ, jakija adbyvalisia ŭ Hancavickim rajonie i nie tolki. My abjektyŭna aśviatlali padziei i pisali historyju rajona. Dziakuj usim, chto padtrymlivaŭ i daviaraŭ nam», — raspavioŭ Piotr Huzajeŭski.
Kamientary