Baćki Ihara Łosika: «Žyviom vieraj, što niešta pamianiajecca. Moža zaŭtra, moža praź miesiac. Tolki vieraj i žyvieš»
Žurnalist Radyjo Svaboda Ihar Łosik za kratami bolš jak paŭtara hoda. Jaho baćki Alaksandar Alaksandravič i Natalla Vitaljeŭna raskazali ŭ interviju Svabodzie, jak jany žyvuć, pakul ich syn u turmie.
Praces u spravie Ihara Łosika, Siarhieja Cichanoŭskaha, Mikoły Statkieviča i inšych abvinavačanych idzie amal 5 miesiacaŭ. Usie jany byli zatrymanyja ŭ kancy traŭnia — červieni 2020 hodu, zadoŭha da daty prezydenckich vybaraŭ. Advakaty padsudnych dali padpisku ab nievydavańni materyjałaŭ spraŭ svaich padabaronnych i detalaŭ pracesu. U vyniku nieviadomyja navat usie artykuły Kryminalnaha kodeksu, pavodle jakich abvinavacili Ihara Łosika.
Vyrak žurnalistu Radyjo Svaboda majuć abviaścić 14 śniežnia.
«Žyviom vieraj, što niešta pamianiajecca. Moža zaŭtra, moža praź miesiac. Tolki vieraj i žyvieš. Što da vyraku, 10 ci 12 hadoŭ — dyk možna dać 100 hadoŭ, ad hetaha ŭžo ničoha nie mianiajecca. Mohuć dać 15 hadoŭ, a zaŭtra za skasavańnie sankcyj — vypuścić. Mohuć dać 5 hadoŭ — i ŭsie 5 hadoŭ jon adsiedzić», — kaža baćka Ihara Łosika Alaksandar.
Daša Łosik, žonka Ihara, zmahła trapić na spatkańnie z mužam. Baćkam u spatkańni admovili, patłumačyli, što dazvoł jość tolki na adnu sustreču. Užo dva miesiacy baćki Ihara nie atrymlivajuć ad jaho listoŭ.
«Naviny pra syna atrymlivajem z telehram-kanałaŭ. Advakat pad padpiskaj, tamu možna daviedacca tolki pra nastroj Ihara, i ŭsio», — kaža maci Ihara Natalla.
Na znak niazhody Ihar Łosik dvojčy abviaščaŭ haładoŭki, adna ź ich praciahvałasia 42 dni.
«Pamiataju, napisaŭ Iharu list, kali jon haładaŭ. Mahčyma, heta paŭpłyvała na toje, što jon pierastaŭ haładać. I pra Paŭlinku, jakoj patrebny budzie baćka ŭ budučyni, i pra plany. Kamu budzie lahčej? Usie, chto lubić, buduć płakać, a tyja, chto pracuje ŭ turmie, im usio adno budzie», — uzhadvaje baćka Ihara Alaksandar.
Dačce Ihara Łosika Paŭlincy 2 hady. U listach jon prosić nie raskazvać pra Paŭlinku, bo mocna pieražyvaje, kali čytaje pra dačku. «Ja pačynaju płakać, kali ŭjaŭlaju, jak jana raście», — piša Ihar baćkam.
Paŭlinie kažuć, što jaje baćka ŭ kamandziroŭcy. Jana paznaje jaho na fota, pamiataje imia.
«Siamja dapamahaje pieražyvać hety čas. Unučka, praca, padtrymka, sabaka — usio heta ratuje. Kali b byŭ adzin, było b našmat ciažej», — kaža baćka Ihara.
Žurnalista Radyjo Svaboda Ihara Łosika zatrymali doma ŭ Baranavičach 25 červienia 2020 hodu. Sud u jahonaj spravie pačaŭsia tolki praz hod. Dakładna viadomyja dva artykuły abvinavačańnia z troch («udzieł u masavych biesparadkach» i «arhanizacyja albo padrychtoŭka dziejańniaŭ, jakija hruba parušajuć hramadzki paradak»).
Na znak niazhody jon dvojčy abviaščaŭ haładoŭki, adna ź ich praciahvałasia 42 dni. Paśla vystaŭleńnia abvinavačańniaŭ pavodle treciaha artykuła ŭ sakaviku 2021 hodu Ihar Łosik na vačach u śledčaha i advakata paškodziŭ sabie vieny na ruce. Palitviaźniem jaho pryznali ŭ kancy červienia 2020 hodu.
«Tania, my z taboj!» Ułady zapuścili fłešmob u padtrymku žančyny ŭ čyrvona-zialonym VIDEA27
Kamientary