«Uziali dudy, kab padkreślić mirny charaktar šeścia»: pačaŭsia sud nad udzielnikami Irdorath Uładzimiram i Nadziejaj Kałačami
Sud Savieckaha rajona Minska 9 śniežnia pačaŭ razhlad kryminalnaj spravy palitviaźniaŭ, udzielnikaŭ muzyčnaha fentezi-fołk-hurta Irdorath Uładzimira i Nadziei Kałač.
Ich abvinavačvajuć u arhanizacyi i padrychtoŭcy dziejańniaŭ, jakija hruba parušajuć hramadski paradak (č. 1 art. 342 KK) i navučańni ci inšaj padrychtoŭcy asob dla ŭdziełu takich dziejańniach, a roŭna finansavańni ci inšym materyjalnym zabieśpiačeńni takoj dziejnaści (č. 2 art. 342 KK), paviedamlajuć pravaabaroncy.
Spravu razhladaje sudździa Alaksandr Jakunčychin, dziaržabvinavaŭca — pamočnik prakurora Volha Jemieljančanka.
Uładzimira i Nadzieju Kałačoŭ i jašče 14 čałaviek zatrymali 2 žniŭnia 2021 hoda na śviatkavańni dnia narodzinaŭ Nadziei.
Spačatku ŭsich vinavacili ŭ niepadparadkavańni supracoŭnikam milicyi (art. 24.3 KaAP) za toje, što nie adčynili varoty doma pad Minskam. A potym stała viadoma, što na šaściarych ź ich zaviali kryminalnyja spravy. Da suda Uładzimir i Nadzieja ŭtrymlivalisia ŭ SIZA №1 Minska.
Pres-słužba MUS paviedamlała, što «ŭ žniŭni minułaha hoda hrupa «dudaroŭ» nieadnarazova ŭznačalvała kałonu pratestoŭcaŭ i z vykarystańniem muzyčnych instrumientaŭ załučała ŭ niesankcyjanavanaje masavaje šeście hramadzian. Pierformans kaardynataraŭ uzmacniaŭ pratesny nastroj udzielnikaŭ i šturchaŭ ich da supraćpraŭnych dziejańniaŭ u dačynieńni da milicyjantaŭ».
Uładzimir Kałač patłumačyŭ u sudzie, što 16 vieraśnia, daviedaŭšyja z sacyjalnych sietak pra marš, pryniaŭ rašeńnie razam z Nadziejaj dałučycca da jaho. Ztelefanavalisia z muzykaj Dźmitryjem Šymanskim (Dźmitryj byŭ zatrymany razam z Kałačami, mužčynu užo asudzili pa art. 342 KK da 3 hadoŭ «chimii»).
«Pakolki my zaŭsiody vystupali i vystupajem suprać hvałtu, uziali z saboj dudy i ŭpryhožyli ich kvietkami, kab padkreślić mirny charaktar šeścia. Sustrelisia kala płoščy Jakuba Kołasa ź siabrami, jakija taksama ŭziali muzyčnyja instrumienty — dudy, hitary, bubny. Padyšli Piotr i Jula Marčanki (palitviaźni, zatrymanyja razam z Kałačami, čakajuć suda).
«Ahresii nijakaj nie było, atmaśfiera śviatočnaja, usie vakoł uśmichalisia. Usie razam prajšlisia praśpiektam Niezaležnaści da płoščy Pieramohi, potym pa Pieramožcaŭ kałona pajšła da Steły. Patrabavańniaŭ i papiaredžańniaŭ ab niezakonnaści akcyi nie čuŭ, bo hučała muzyka. Dalej šlach byŭ pierakryty i ludzi paviarnuli ŭ advarotny bok. Niekalki razoŭ vykonvali kampazicyju Coja «Pieriemien!», a potym razyjšlisia», — patłumačyŭ jon u sudzie.
Pa padziejach 25 kastryčnika Uładzimir Kałač adznačyŭ, heta byŭ vychadny dzień, ludzi išli pa vulicy Janki Kupały i Bahdanoviča, ruch nie pierakryvali. Muzyki išli na pačatku kałony, vykonvali kampazicyi i hramadski paradak nie parušali.
I Uładzimir, i Nadzieja vinu ŭ sudzie pryznali tolki pa častcy pieršaj art. 342, pa častcy druhoj — navučańnie i finansavańnie asob dla hrupavych dziejańniaŭ — nie.
Nadziei Kałač staviacca ŭ vinu try epizody: udzieł u akcyjach pratestu 16 žniŭnia, 6 vieraśnia i 25 kastryčnika.
Pad čas dopytu ŭ sudzie jana kazała, što pra mierapryjemstva daviedałasia z sacyjalnych sietak, viedała, što šmat zatrymlivali ludziej na papiarednich akcyjach, viedała pra hvałt, jaki čyniać siłaviki pry razhonach.
«16 vieraśnia my vyrašyli dałučycca da maršu, ź siabrami pra sustreču papiarednie nie damaŭlalisia, ubačylisia ŭžo na płoščy Jakuba Kołasa. Łozunhaŭ nijakich nie vykrykvała, u dałoni nie plaskała. Uśviadomiła, što prymaju ŭdzieł u niesankcyjanavanym masavym mierapryjemstvie nie adrazu, dy i to ličyła, što heta padlahaje administracyjnaj adkaznaści ŭ horšym vypadku», — kazała jana ŭ sudzie.
Pakazańni Nadziei Kałač mała čym adroźnivajucca ad pakazańniaŭ jaje muža Uładzimira.
Za čas znachodžańnia pad vartaj, a heta čatyry z pałovajaj miesiacy, u jaje pahoršyŭsia stan zdaroŭja, patrebnaje chirurhičnaje ŭmiašalnictva.
Abvinavaŭca zaprasiła muzykam pa 2 hady turmy. Prysud budzie abvieščany ŭ aŭtorak.
Kamientary