BDUIR nie praciahnuŭ kantrakt z dekanam fakulteta kampjutarnych sietak i sistem (FKSiS) Natallaj Babrovaj. Uvosień 2020 hoda jana pryjšła na źmienu Marynie Łukaševič, jakaja admoviłasia padpisvać zahad ab adličeńni studentaŭ svajho fakulteta i napisała zajavu pa ŭłasnym žadańni, piša Dev.by.
Infarmacyju ab zvalnieńni Babrovaj paćvierdziŭ adzin z vykładčykaŭ fakulteta. Pryčyny, adznačyŭ jon, nie viadomyja vykładčyckamu składu. Ź jaho słoŭ, Natalla Leanidaŭna «nie zaŭvažanaja ŭ adličeńniach abo zvalnieńniach». I naohuł była «niezaŭvažnaj», u adroźnieńnie ad svajoj papiarednicy.
— Pa adčuvańniach, vialikuju častku pracy rabili jaje namieśniki — Uładzimir Haravy i Uładzimir Łohin. Z taho, što ŭspaminajecca — jaje razmova pra FKSiS na Dni adkrytych dźviarej u BDUIR.
U pres-słužbie BDUIR nam adkazali, što Natalla Leanidaŭna «pierastała zajmać pasadu dekana FKSiS u suviazi sa skančeńniem terminu dziejańnia kantrakta i piensijnym uzrostam, adnak zastajecca pracavać va ŭniviersitecie».
Dekan FKSiS Maryna Łukaševič zvolniłasia z VNU 1 listapada 2020 hoda. Dev.by jana skazała, što zrabiła heta sama bieź jakoha-niebudź cisku. Ad kamientaryjaŭ Maryna Michajłaŭna admoviłasia, a studentaŭ paprasiła ŭ čacie nie ładzić pratestaŭ u suviazi ź jaje sychodam.
Pavodle infarmacyi dev.by, Maryna Łukaševič syšła ŭ bujnuju aŭtsorsinhavuju kampaniju. U samoj kampanii prasili nie pisać pra heta.
Kamientary