U rasijskich zahsach ažyjataž na «lustranuju» datu 22.02.2022. A što ŭ nas?
Zahsy Rasii aktyŭna šturmujuć amatary pryhožych dat. Užo źjavilisia navat abjavy ab prodažy miescaŭ u zahsach na datu-palindrom — 22.02.2022. Košty vahajucca ad 50 tysiač da 1,5 miljona rasijskich rubloŭ (ad 1,6 da 50 tysiač biełaruskich). A što ŭ Biełarusi? «Naša Niva» patelefanavała ŭ staličnyja zahsy i daviedałasia, kolki ŭžo ludziej žadaje ažanicca 22 lutaha.
U zahs Partyzanskaha rajona pakul što pastupiła 10 zajaŭ. Pa słovach načalnika adździeła Iryny Hantarenka, heta ličba jašče moža za miesiac pavialičycca ŭ niekalki razoŭ.
«Sto paraŭ, viadoma, za adzin dzień my fizična nie paśpiejem zarehistravać, — kaža Iryna Kantarenka. — My nikomu nie admovili, chto da nas źviarnuŭsia. Ale takaja tendencyja ŭžo nie pieršy hod. U 2021 hodzie taksama takoje było 11 listapada (11.11). Lustranyja daty, mahčyma, na ščaście».
U zahsach Centralnaha i Maskoŭskaha rajonaŭ taksama pakul što pa 10 zajaŭ. Bje rekordy zahs Leninskaha rajona — 26.
«Pracujem z 11 da 20:00 hadzin. Taki ažyjataž nie pieršy hod, da i my samy papularny zahs. Upeŭniena, što jašče buduć pary. Usio ž taki jašče ceły miesiac», — kaža načalnik adździeła zahsa Leninskaha rajona Julija Skirpičnikova.
U zahsie Frunzienskaha rajona zaraz bolš par na 23 lutaha, čym na 22.
«Asabista dla mianie lubaja data pryhožaja, ale dla niekatorych ludziej heta važna. Na Dzień abaroncy Ajčyny — 11 par, a na lustranuju datu pakul 8. Ale my jašče prymajem zajavy. I składana skazać, kolki ich budzie ŭ vyniku», — prakamientavała «NN» načalnik adździeła Natalla Redźkova.
U zahsie Zavadskoha i Savieckaha rajona pryniali ŭžo 20 zajaŭ. Načalniki adździeła zapeŭnivajuć, što admaŭlać nikomu ŭ rehistracii šlubu na hety dzień nie buduć.
«Viadoma, data lustranaja, pryhožaja. Ludziam padabajecca hetaja mahija. Kolki budzie achvočych, stolki i voźmiem! Nie budziem pakul admaŭlać. I pracavać u hety dzień budziem z 11:00 i da 20:00», — kaža načalnik adździeła Volha Kipier.
A voś u zahsie Pieršamajskaha rajona ažanicca 22 lutaha pakul što chočuć 13 par.
«Na takija lustranyja daty ŭ nas jość popyt prykładna z 2008 hoda. Spadziajucca ludzi, što takija pryhožyja ličby pryniasuć maładym doŭhi i ščaślivy šlub. Naohuł rehistracyja prachodzić u čaćvier, piatnicu i subotu. Ale kali pryhožaja data vypadaje na aŭtorak, to my adkładziom usie našy spravy, i budziem zajmacca rośpisam. Darečy, kali ludzi prychodziać razvodzicca, tam ich nie cikavić, u jakuju datu. Aby chutčej», — raskazała načalnik adździeła Julija Vinahradava.
Datelefanavacca da zahsa Kastryčnickaha rajona nie atrymałasia. Ale dumajem, što i jany biez par na 22.02.2022 nie zastalisia.
Takim čynam, u summie ŭ staličnyja zahsy za miesiac da lustranoj daty pastupiła bolš za 117 zajavak achvočych ažanicca.
Čytajcie taksama:
«Prajšlisia za ručku pa kalidory dziesiać mietraŭ — heta cud prosta!» Nievierahodnaja historyja kachańnia Jany i Valera Arabiejki, jakija ažanilisia ŭ kałonii
Udava aktyvista Maksima Čarniaŭskaha raskazała pra jaho pakuty pierad suicydam5
Kamientary