«Chaj nie razumničajuć». Jak kiraŭniki milicyi ŭ 2020-m stavili sudździaŭ na miesca
U siecivie źjaviŭsia čarhovy źliŭ razmovaŭ milicejskich načalnikaŭ. Jak śćviardžaje abjadnańnie chakieraŭ, na zapisie były kiraŭnik upraŭleńnia achovy pravaparadku milicyi hramadskaj biaśpieki MUS Raman Mielnik i pieršy namieśnik kiraŭnika Minskaj abłasnoj milicyi Vital Kazłoŭ. Chutčej za ŭsio, razmova adbyvałasia vosieńniu 2020-ha hoda. Na zapisach idzie abmierkavańnie taho, što sudździ ŭ Minskaj vobłaści dajuć zanadta miakkaje pakarańnie zatrymanym na pratestach. I navat nie chavajuć, što buduć vyrašać pytańnie praz staršyniu Viarchoŭnaha suda.
Tak, hołas, padobny da Mielnika, pryvodzić prykład: razhledzieli 209 spravaŭ, a vynieśli administratyŭnych aryštaŭ mienš za 10%.
«A heta aktyŭnyja [udzielniki], samyja miarzotnyja! A štrafy, ščyra kažučy, nu jak pa hałavie pahładzili. Nu što takoje 2-3 bazavyja?»
Na heta čałaviek z hołasam, padobnym da Kazłova, adkazvaje, što sprabavaŭ vyśvietlić pytańnie z kaleham pa Minsku, Iharam Padvojskim, maŭlaŭ, tam milicyja ŭzajemadziejničaje pa «pratesnych» spravach ź Minskim haradskim sudom.
«Ja zaraz skažu načalniku Žodzinskaha rajadździełu, u abłasny sud pierazvaniu», — dadaje jon.
«Vital Anatoljevič, — kaža hołas, padobny da Mielnika. — Treba, padjedźcie ŭ abłasny sud. Adrehulujcie vy hetyja pytańni. Sud pavinien być upeŭnienym. Kažu, jak jość, zatrymlivajuć samych jarych. Pa horadzie [Minsku] u mianie pytańniaŭ niama, ale pa sudach Minskaj vobłaści jość pytańni, kali tam sudździ nie da kanca razumiejuć, pačynajuć kapacca, maŭlaŭ, a dakažycie nam heta, a jašče heta. Blacha-mucha, nu!»
Dalej surazmoŭca adkryta kaža, što AMAPaŭcy, jakija zatrymlivajuć ludziej, nie mohuć vystupać u sudzie śviedkami, tamu na hetu rolu staviać supracoŭnikaŭ rajadździełaŭ, kudy ŭžo pryvoziać zatrymanych. To-bok śviedkami ŭ sudzie vystupajuć ludzi, jakija nasamreč nie byli na miescy zdareńnia, nie bačyli toje, što paśla ŭkazvajuć u pratakołach. Sudździ spraviadliva zadajuć pytańni, ale heta nie zadavalniaje milicejskich načalnikaŭ.
«Ja nie mahu raściahnuć AMAP, kab jany ŭdzielničali ŭ sudovych pasiedžańniach, — zajaŭlaje hołas, padobny da byłoha kiraŭnika milicyi hramadskaj biaśpieki MUS. — Chapaje pracy, heta tyčycca i vašaha AMAPa. Pierakanajcie abłasny sud, što heta samyja zaciatyja [zatrymanyja]. Kali budzie zboj, davajcie mnie kankretnyja fakty, proźviščy, ja tady budu vychodzić na Viarchoŭny sud. Chaj nie razumničajuć, a zajmajuć dziaržaŭnuju pazicyju. Jość u mianie adpaviednyja kanały, ja hatovy ich padklučać».
Čym pradyktavanaje žadańnie, kab zatrymanym davali bolš suvoraje pakarańnie?
«U nas nie prahladajecca efiekt, — davodzić hołas, padobny da Mielnika. — U nas užo iduć paŭtorniki. Tamu što jamu na tym baku zapłacili, ekvivalent sto dołaraŭ, a štrafik jamu dali dźvie bazavyja. Dla jaho heta jak pył. Uklučajcie lubyja ryčahi».
Prosta nahadajem, što farmalna sudovaja ŭłada ŭ Biełarusi niezaležnaja. Nivodny milicejski načalnik nie maje prava ŭkazvać sudździ, jakoje toj pavinien pryniać rašeńnie, heta kryminalnaje złačynstva.
Dalej pryvodzicca razmova, jak adznačajecca, Kazłova z namieśnikam načalnika staličnaj milicyi Iharam Padvojskim. Hołas, padobny da Kazłova, sprabuje vyśvietlić, jak u kalehi atrymałasia vyrašyć pytańnie z sudździami. Udakładniaje, što ŭžo vyrašaje pytańni praz kamitet (najvierahodna, KDB) i vychodziŭ na namieśnika Minskaha abłasnoha suda Hienadzia Klaščonka (u 2008-m pryznačany biesterminova).
«Ja paprasiŭ Purynka i Harusava, maŭlaŭ, padsabicie, kab nie pačynali administratyŭny praces suprać supracoŭnika AMAP, nu tam byŭ kasiak u dačy pakazańniaŭ. Sudździa ŭ Žodzina pačała praces. Ale tam čyk-čyk — i ŭsio pierakreślili. Pazvanili Sukału [staršynia Viarchoŭnaha suda z 1997 hoda] i ŭsio vyrašyli. I ŭsio, paśla hetaha pytańniaŭ nie ŭźnikała», - kaža hołas, padobny da Ihara Padvojskaha.
Kazłoŭ i Padvojski pa-raniejšamu pracujuć u milicyi. Raman Mielnik viasnoj 2021 hoda byŭ pryznačany kiraŭnikom Leninskaha rajona ŭ Minsku.
U siecivie rehularna źjaŭlajucca zapisy, jak śćviardžajuć chakiery, razmovaŭ milicejskich načalnikaŭ. Aproč taho, chakiery ŭzłamali adrazu niekalki milicejskich bazaŭ z asabistymi dadzienymi hramadzian Biełarusi. Adnak siłaviki nijak nie kamientujuć situacyju, infarmacyi pra toje, što pa dadzienych faktach zaviedzienyja kryminalnyja spravy, niama, jak i infarmacyi, jakija namahańni dziaržaŭnyja orhany prykładajuć dla abarony piersanalnych źviestak i razmovaŭ i svaich supracoŭnikaŭ, i prostych hramadzian.
Kamientary