Biełaruś uručyła notu pratestu Ukrainie za zamienu čyrvona-zialonaha ściaha kala meryi Dniapra na bieła‑čyrvona‑bieły
Pasolstva Biełarusi zajaviła «rašučy pratest» Ukrainie z-za adsutnaści reakcyi miascovych uładaŭ na zvarot ambasadara paśla taho, jak mer horada Barys Fiłataŭ vyrašyŭ zamianić raźmieščany la budynka meryi čyrvona-zialony ściah Biełarusi na bieła-čyrvona-biełym.
Zajavu ambasada apublikavała na svaim sajcie.
Zamienu ściaha pasolstva nazvała «aktam dziaržaŭnaha vandalizmu», a samu situacyju rascaniła jak «cyničnuju prajavu niedružalubnaha staŭleńnia da suvierennaj biełaruskaj nacyi». Biełaruś zapatrabavała viartańnia dziaržaŭnaha ściaha, aficyjnych vybačeńniaŭ ad Ukrainy, razboru «pa fakcie apahańvańnia aficyjnych simvałaŭ zamiežnaj dziaržavy» i «pryniaćcia vyčarpalnych mier pa niedapuščeńni paŭtareńnia padobnych faktaŭ u budučyni».
9 lutaha ŭłady Dniapra zamianili dziaržaŭny čyrvona-zialony ściah Biełarusi, raźmieščany kala meryi, na bieła-čyrvona-bieły. Mer horada Barys Fiłataŭ patłumačyŭ takoje rašeńnie «narodnaj inicyjatyvaj» i niazhodaj z palitykaj Alaksandra Łukašenki ŭ dačynieńni da Ukrainy. Pieršapačatkova Fiłataŭ paviedamiŭ pra heta ŭ Fejsbuku, adnak ciapier post niedastupny.
Paźniej Fiłataŭ adreahavaŭ na zajavu ambasady inšym dopisam. U im jon zajaviŭ, što žyvie «ŭ svabodnaj krainie».
«Tamu, kali miascovaja moładź za biudžet udziełu ŭstanaviła ŭ meryi fłahštoki sa ściahami nacyjanalnych supołak, to jana maje prava hetyja ściahi mianiać tak, jak joj zachočacca. Tym bolš, što ŭ adroźnieńnie ad nacysckaj i kamunistyčnaj simvoliki, bieła-čyrvony-bieły ściah nie źjaŭlajecca zabaronienym va Ukrainie», — rastłumačyŭ jon.
Vylecieła ŭ nieviadomym kirunku śpikierka KR Anžalika Mielnikava30
Kamientary